Haji Basiroh menyai ndem saong tuai damuai negar langiu
Daok Angaok jalan Nguyễn An Ninh, Quận 1, ban raya HCM, gah pai darak pasa Bến Thành, nhà hàng Basiroh, pablei pandap mbang Halal (pandap mbang hu sik ngak tui hukum Islam) ka urang tui agama Islam, tuk halei jeng hu rilo tuai tame tabiak mbang menyum . Tuai rilo meng lac mai meng dom negar yau Malaysia, Indonesia, Brunei, Ấn Độ… Po nhà hàng ngui cuk khan aow Cam Islam, thun ni , umo jiak 60, thaik thaot hu rilaow, mbaok meta biak slut mbut tuk halei jeng lanyim klao, rap ar tuai damuai. Hu tuk, muk tapa cửa hàng khan aow pablei pandap ka urang Islam jeng hu angan Basiroh daok di gah daih jalan. Muk nan lac Haji Basiroh lac urang akaok meti peih cửa hàng khan aow song peih quán mbang ka urang Islam angaok jalan hu ieu lac “phố Malaysia” di ban raya HCM. Saai Azit palei daok di tỉnh An Giang, thun ni umo 35 thun , lac sa dalam dom urang hu mbaok meng harei camereip di cửa hàng thời trang song nhà hàng Basiroh angaok jalan Nguyễn An Ninh, Quận 1, ban raya HCM. Saai brei thau:
“Muk Basiroh hu peih cửa hàng pablei salih di pak ni meng thun 2011, pablei pandap thời trang, patui di nan lac quán ăn..”
Mong iek veik bruk padang mbang ngui, yaom lac muk Basiroh pabiar rup lac tong abih bruk mai meng patuah, min meng dom bruk muk ngak, meda mboh lac muk ba abih pren yava, kham merat biak rilo. Muk Basiroh khan lac, dahlau di thun 2000, muk ngak bruk ka công ty roh duah drak pasa di tập đoàn Anh quốc daok di ban raya HCM. Tuk nan, hu dom urang Malaysia mai ngak bruk, urang duah blei khan aow Islam piah ngak pandap alin, abih di nyu nan lac Telekung – mak kha na . Meng nan, muk sahaneng lac, habar drei oh ngak khan aow pablei ka urang Islam ?
Thun 2000, muk likau padeih ngak di công ty, pah labik angaok jalan Nguyễn An Ninh piah peih cửa hàng. Muk Eng drei nao palih ruah tanyiak, duah jeing jhik, jeing pet, cih mẫu pet. Piah ngak ka pandap angan Basiroh nyu karei jang dom pandap karei, muk duah song ngak dom bingu la di urang Chăm, pabak tame dom phụ kiện…Meng tanyiak siam, bingu pet gheih mekre saong song yaom mbiah, pandap di muk hu rilo tuai Malaysia duah blei. Tuai Malaysia mai rivang ban raya HCM ye duah tal muk piah blei. Tuk blei bloh, urang khin duah pandap mbang di urang Islam biak kan nan ye nyim muk ngak. Mboh yau nan, muk peih pablei pandap mbang, camereip tok hu dom janih haong 2 – 3 baoh bàn caik di tapen jalan anak cửa hàng khan aow. Hadei di nan tuai dak harei dak rilo, thun 2011, muk peih nhà hàng glong 3 tal. Hu tuk muk peih tal 3 nhà hàng caik angan Basiroh, rilo di abih angaok jalan Nguyễn An Ninh.
Min, piah ngak ka tuai njauk hatai oh lac mbuan. Muk Basiroh brei thau, lac urang Islam yau gauk min min khẩu vị urang Cam nyu karei urang Malaysia. Pandap mbang urang Cam oh yau pandap mbang di urang Malaysia. Urang mbang taba min biak hang. Muk ngak pandap mbang biak mbak carak. Muk duah thau ka pandap mbang Malaysia, pambuak haong panuac khan di tuai bloh mai ngak. Urakni, pandap mbang di nhà hàng Basiroh hu jiak 100 janih. Langiu di pandap mbang meng kan di urang Cam yau: cari pabe, cari ikan, har palata…thực đơn jeng hu biak rilo pandap mbang Việt yau phở bò, ia bac mesam ikan pathoc, ikan kho tộ, njam puong xao.
Bahrau ini, 2 tạp chí brei ka urang kamei di Malaysia lac Jelita song Kosmo hu caik dua blah báo piah ndom ka cửa hàng khan aow Basiroh song muk po di nyu. Urang oh damen panuac pok meyaom pandap di cửa hàng “Telekung chất lượng glong Basiroh”, “Telekung Việt Nam hu mbaok di Malaysia”…Mai rivang ban raya .HCM, rilo tuai Malaysia, Indonesia, Ấn Độ… biak meyaom món phở bò Việt Nam di nhà hàng Basiroh. Ni jeng lac pren pachreih ba praong piah muk patui bruk pablei salih di drei . Muk Basiroh cong khin lac:
“Lac urang anek Cam, dalam dom janih pandap ngak tabiak jeng hu janih ilamu Cam Việt Nam.
Meng bruk pablei salih khan aow song pandap mbang Islam, yaok thun muk Basiroh duah hu oh takik jang 1 tỷ đồng. Oh lac, hatai khin ngak kaya meda, muk Basiroh daok hu dong ka rilo urang Cam hu rai duik kan kandah yam tagok dalam rai duik. Urang ngak di nhà hàng jeng lac urang Cam hu rai duik kan kandah, muk taduan tame ngak song brei huak lasei, labik ndik, labik dok. Jien duah hu di yaok urang ngak tui kuhria sa bilan lac 5 triệu đồng. Saai Sakigiah daok di quận Phú Nhuận, ban raya HCM lac sa dalam dom urang hu rai duik kan kandah hu muk dong bruk ngak, brei jien piah pasiam veik sang danaok : “Kayua hu anai Basiroh dong ka maik nek hulin hu rai duik tani tanat…”
Muk Basiroh oh lac pablei salih naih joi, muk dok hu bhap bini Cam di ban raya HCM thau tal kayua hatai siam daong ka dom urang kan kathaot./.
Urang lang: HaniPha -27/1
Viết bình luận