Meng thun 1990, “ Play Cam Lòng Hồ” lac angan birau di palei Hòa Lộc, xã Minh Hòa, huyện Dầu Tiếng bhum atah bayah di tỉnh Bình Dương. Dalam palei hu labaih 100 baoh sang ngan saong labaih 400 urang. Taong abih jeng lac urang Cam Islam daok di tỉnh An Giang mai ngak mabng di tapen binek Dầu Tiếng. Labaih 20 thun dahlau, palei Lòng Hồ lac palei kathaot abih di tỉnh Bình Dương. Mikva tok thau nao taong chap ikan saong pablei salih angaok gilai. Mai daok pak ini, abih janih oh ka bhian randap, meng bruk mbang huak tal bruk ngak mbang, diukrai. Meda lac, hagait jeng kurang, nan ye hu oh takik menuac oh ka jia tame bhum taneh bahrau ini. Ong Haji Kho Sanh lac: bruk camereip jeng lac tani tanat raidiuk, labik ngak mbang, ngak huak, bloh meng kuhria tal bruk harei hadei: “Dahlak brei jak ba mikva ngak tui jalan sarak di Ndang saong Karja…”
Jaik 28 thun tapa bloh, urang Cam sahaneng lac drei oh plaih hu raidiuk mbleing mblang angaok sruh ghe gilai meng dom rai ini mai. Hu bruk sangka di huyen Dau Tieng saong xa Minh Hoa, yaok baoh sang hu brei taneh pala drak, gam pablei salih, raidiuk dak harei dak tani tanat saong patagok. Urak ini, palei Hòa Lộc daok 2 baoh sang jaik si kan kathaot min. Dom baoh sang taik tahak dahlau diah hu salih ka baoh sang tauk kiak khang kajap. Bhap bini Cam hu urang jakar pachreih nong daong tacei pato ilamu ky thuat ngak mbang pala drak.. Luac tukvak nan, ong Kho Sanh saong dom urang dalam Ban quản trị Masjid Al Muttaqin tacei pato mikva pandar ba ky thuat tame ngak mbang. Ong Hồ Sanh, Tổ trưởng Tổ 5, palei Lòng Hồ, xã Minh Hòa, huyện Dầu Tiếng, tỉnh Bình Dương ndem ka ong Kho Sanh yau ini: “Haji Kho Sanh nan siam hatai thau kuhria ka puk paga…”
Ndem tal bruk bac da-a di dom anek saih palei Hòa Lộc atah bayah ini, njauk ndom tal bruk rik daong di ong Haji Kho Sanh. Kayua daok atah sang bac, yaok harei dom adei anek saih di palei Hòa Lộc juak radaih nao labaih 12km jalan. Rilo adei medeih tagok biak aval juak radaih nao bac min jeng hu harei oh sumu tukvak tame sang bac, dalam tuk juak radaih angaok jalan mbuan gaok bala. Mboh yau nan, ong Kho Sanh duah mesre jien blei radaih ô tô abih 320 trieu dong piah pajeng ba anek saih dalam palei atau anek saih karei nao bac. Mbiah tal urak ini, hu 50 anek saih di palei Hòa Lộc hu pajeng ba nao bac meng radaih angan Kho Sanh. Yaok harei, radaih Kho Sanh peih pajeng 3 mbang , dua mbang tuk page saong sa mbang tuk biar harei meng sang tal sang bac THCS Minh Hòa saong gilac mai veik. Sanap lac sa anek saih dalam dom anek saih Cam hu nao bac meng radaih Kho Sanh lac: “Wa daong ka kol anek saih kol lin, likau jien bac daong ak kol hulin..”
Lac urang hu angan je dalam palei, ong Kho Sanh gam saong urang jakar, kapol nyaom xa Minh Hoa jak ba mikva ngak tui bruk jak ba “ Taong abih bhap bini jum pataom dak padang raidiuk ilamu di labik daok”; pathau khan dom sarak di Đảng, hukum di Karja, iek praong bruk Jum pataom abih bangsa; pachreih tui dom bruk pakacah gauk anit ranam taneh ia…Meng bruk abih hatai daong ka bhap bini, ong hu tỉnh Binh Duong pok brei harak meyaom lac “uarng naih ghieh dalm bruk pakacah gauk anit ranam taneh ia”./.
Viết bình luận