Trung úy Thông cuh gilau kakuh meng atah
Meng tuk dahlau Tết Nguyên đán, Trung úy Lê Đình Thành urang ngak bruk quân khí, Đồn biên phòng pabah mbang negar pakat dunya Nậm Cắn, Bộ đội Biên phòng Nghệ An saong urang kumei jaik lakhah hu thaot binguk blaoh dom blah rup thaot dahlau harei lakhah, njauk di nyu tuk ini sa-ai haong kumei nan daok bui sambai dalam lakhah. Min anak bruk jit ruak dak harei dak khang, adei sa-ai dalam đơn vị tui gauk tagok jalan nao khik iek dom jalan praong, sit tapen negar piah pacang caga jit, trung úy Lê Đình Thành halan hatian daok veik saong dom ayut sahabat ngak bruk. Blah thaot kumei angui cuk khan ao lakah tuk halei jeng hu sa-ai caik dalam kadung yau sa bruk pachreih ba, yau brei thau hatai daok cang. Bruk sa-ai halan hatian daok veik ngak bruk hu kumei diuk jaik lakhah lac Nguyễn Thị Giang, xã Hoa Sơn, huyện Anh Sơn, tỉnh Nghệ An pachreih tui: “Thau lac dom sa-ai glaih glar harei melam nao khik iek. Dahlak daok pak sang cang sa-ai, caong khin sa-ai ngak siam bruk ngak piah daong pacang jit ruak blaoh lakhah.’’
Oh njauk lac ta-eng Trung úy Lê Đình Thành brei padeih bruk praong di drei, birau ini, Trung uý Nguyễn Đình Thông, đồn Biên phòng Thạnh Trị, Bol lin Biên phòng tỉnh Long An thau ame plang lahik, min kayua daok ngak bruk khik iek pacang caga Covid-19 nan ye oh nao sang di palei di Hà Tĩnh piah kamram ka ame hu. Đơn vị brei padang kapal kakuh di labik khik iek pacang caga jit piah ka Trung úy Thông saong ayut bol lin cuh gilau kakuh meng atah… Dalam 5.000 urang jakar, urang lin Biên phòng daok harei melam glaih glar khik labik tapen negar, labaih 2 bilan tapa oh hu nao sang, thau lac pacang jit ruak yau pacang kol khamang, hu yaok pluh urang jakar, urang lin diuk ndih tapui anek oh hu nao rivang, 30 urang lin daok dam brei padeih lakhah saong 3 urang jakar, urang lin oh sumu mai hu mbaok tuk guak gar lahik nao. Thượng úy Đỗ Duy Trường, Akok kapol Vũ trang, Đồn Biên phòng Tả Gia Khâu, Bộ đội Biên phòng tỉnh Lào Cai khan lac:“Yaom lac, dalam tuk ngak bruk gaok biak rilo kan kandah, min khol dahlak kham, khik iek harei melam piah rik daong hasit prein di drei tame bruk pacang caga jit.
Bruk di dom sa-ai lac hu mbaok labik chốt, khik iek pabah mbang negar, tui iek catang dom jalan nao dalam glai, oh lac harei atau melam, hajan la-ar, ia kakuan, langik bhang, mbuan gaok bala, pacang cakak bruk tame tabiak negar suan hukum ba tal njaom mbak jit ruak. Dom urang lin tuk halei jeng paglaong bruk ngak di drei, kham khik kajap oh brei jit njom tame negar drei. Tui nan, dom kapol nyaom bhian hu mbaok di labik khik iek, tame tal yaok baoh sang piah jak ba mikva oh tabiak tame negar suan hukum, brei khẩu trang, tacei patao pacang caga jit ruak, mbang huak hacih tathak saong ngak njauk tui dom quy định di labik taphia negar anak jit ruak Covid-19 rah tabiak khang yau urak ini. Thau hu bruk glaih glar di Bộ đội lin Biên phòng, mikva puk palei bhum taphia negar tuk halei jeng thau dhar phol dom urang lin. Ong Lương Xuân Lâm, Akok puk Tén Tằn, ban sit Mường Lát, tỉnh Thanh Hóa lac: “Biên phòng tame tal yaok puk palei piah pathau khan ka mikva pacang caga jit ruak. Ka sa lac brei rao tangin meng jabon, ka dua lac biên phòng brei khẩu trang ka mikva piah sahanang hatai pacang caga jit ruak corona.”
Oh lac jao brei bruk ngak, urang pan akok dom đơn vị, dom kapol nyaom, khik iek labik tapen negar, bộ đội biên phòng tuk halei jeng nao gam haong adei sa-ai chiến sĩ. Dom bui sambai atau haduh hatai di yaok urang lin jeng hu đơn vị sangka klah rabha, abih di nyu lac ngan saong dom urang jakar chien si klaak bruk di drei piah ngak bruk daong taneh ia, jeng hu đơn vị jak ba sumu, ba gauk yam tapa kan kandah, ngak siam bruk di drei, piah jhul kadun likuk jit ruak. Tuk halei jeng nao gam saong adei sa-ai urang lin dalam dom harei ini, dom urang yau Đại tá Văn Ngọc Quế, Phaok Chủ nhiệm Chính trị, Bol lin Biên phòng yau pabak prein khang anit ranam gauk labik bhum taphia negar: “Adei sa-ai jeng mboh bruk sangka di urang dang akaok đơn vị saong ayut sahabat, bol lin saong gauk yau nan ye adei sa-ai kham merat ngak siam bruk khik iek saong ngak bruk pacang caga jit dalam tukvak tabung glaong urak ini.”
Rilo bilan daok dalam dom lều mbat padang labik taphia negar atah bayah, kan kandah, min dom sa-ai, dom urang lin qân hàm hijao tuk halei jeng klaak veik bruk di drei, piah ngak jeng dom hala pacang caga khang kajap di labik pacang ruak tapen negar atah bayah./.
Urang lang: Aí Nghiêm 13/4/2020
Viết bình luận