Tukvak tapa, hu dom ayut ranaih umo lac urang Cam daok di ban raya HCM hu ba akaok nao dahlau, halan hatian nao grap puk palei, gaoh pabah mbang yaok doanh nghiệp piah jak ba rik daong tame kadung jien ngak pahala hu angan “Kadung jien Gilai praung – nao gam saong urang ruak lac urang Cam” piah daong jien ka dom urang Chăm kan kathaot njauk dom janih ruak klan kandah min oh hu jien iek ruak. Drut drui anak bruk ngak siam nan di kapul dam dara Cam, yaok rituh menuac urang, doanh nghiệp Cam daok dalam saong langiu taneh ia hu daong yaok rituh triệu đồng tame kadung jien ini. Kadha vak di Thúy Linh, urang vak di rayo sap ndom VN daok di ban raya HCM hu ndom ka dom bruk ngak hu tuk camereip di kadung jien Gilai praung dalam bruk daong urang ruak kan kathaot lac urang Cam.

“Kadung jien Gilai praung  - nao gam saong urang ruak lac urang Cam” kayua sa kapul dam dara Cam halan hatian hu 21 urang hu padang tagok di bilan 7 thun 2013, piah jak ba dom kapul nyaom, menuac urang dalam bhap bini urang Cam ba tangin tame daong phun jien, daong dom urang Cam kan kathaot njauk ruak kan kandah. Meng dom harei camereip padang tagok, kadung jien hu samar jeng labik pataom mbaok di dom urang siam hatai saong caong khin klah rabha kan kandah, daong ka dom urang ruak dalam bhap bini. Meng kadung jien ini, dom urang di kadung jien Gilai praung hu alin 114 triệu 600 ribau đồng ka 4 urang kan kathaot njauk ruak kan kandah. Tapa nan, hu daong ka urang ruak lac urang Cam kan kathaot hu jien iek ruak, yam tapa kan kandah dalam rai diuk.

Lac ame di adei Đàng Thị Kim Nguyên – njauk ruak bok dung, sang kan kandah, hadei di tuk taduan hu jien jaik 5 triệu đồng meng kadung jien Gilai praung, saai Đàng Anh Khải drut drui lac:

“Meng bloh nao BeiGon tame sang iek ruak ung bướu, bác sỹ brei thau kamuan hu u ác nyu di căn jeng ung thư, sang biak katuak drei, oh thau ngak habar. Sang kathaot rambah, ngak mbang kan kandah, meng hu dom ayut ranaih umo ba tagok mạng, dom ayut jengabih hatai nan ye mikva, sinh viên dalam ban raya HCM hu daong jien piah kuhria ka Nguyên. Dahlak biak thau dhar phol mikva saong dom adei saai hu daong ka anek dahlak”.

Piah kadung jien “Gilai praung – nao gam saong urang ruak lac urang Chăm” jeng sa bruk ngak daong ka xã hội hu peih ngak praong dalam saong kein lagaih, abih di nyu nan lac daong chip ka dom urang Chăm kan kathaot njauk ruak kan kandah, dom urang dalam kadung jien “Gilai praung hu padang blah điện tử hu angan kadung jien ini piah ka menuac sia thau ka rai diuk, ka ruak kik di yaok urang ruak caong hu daong, brei ka dom mạnh thường quân thau saong daong chip ka urang ruak njauk daong brei. Urak ini, blah Web Gilai praung.com hu jeng labik pataom mbaok di bhap bini Cam piah daong ka ruak kan kathaot. Ayut Inra Jaka – quản trị blah web ini khan lac:

“Tapa tukvak tui iek blah web điện tử mboh lac,  urang truy cập biak rilo, kayua urak ini abih gauk jeng truy cập sa nguồn. Pagap yau urang caong thau dom bruk dom kadha klak jeng daok, oh yau angaok mạng facebook ba tagok lavik harei bloh lahik nao. Min tuk tame blah điện tử di kadung jien Gilai praung ye urang meda thau taong abih danak dak bruk ngak. Drei meda ndom lac, bruk phản hồi di mikva biak siam”

Ngan saong jalan ngak “Ba tal tangin – daong tal labik”, 21 urang di kadung jien Gilai praung oh huac kan kandah, parabha gauk yaok bruk, yaok labik piah duah thau rai diuk di dom urang ruak, hadei di nan vak kadha brei thau cambaih laih rai diuk, hồ sơ bệnh án ieu bhap bini daong, ba tangin tame daong dom urang ruak. Meng bruk abih hatai jai di dom urang, bruk daong chip di dom urang ngak pahala lac urang Chăm daok dalam saong langiu taneh ia, yaom jien hu rik daong samar hu ba tal tangin urang ruak, daong ka urang sahnang hatai iek ruak saong yam tapa ruak kik. Ayut Lưu Minh Giám, urang dalam kadung jien Gilai praung khan lac:

“Camereip mboh dom saai dalam ban raya HCM hu vak dom kadha ndom ka rai diuk kan kandah, ruak kik di dom baoh sang Cam piah jak ba ka urang daong, min bruk thei thei ngak. Hadei di ini mboh bruk eng drei nao jak ba yau nan lac oh jeng, meng bruk abih hatai jai di dom adei, hu pataom gauk ginum biai bloh brei padang kadung jien ini. Hu kadung jien ini lac biak siam. Yau rup dahlak mboh drei daok hu pren yava nan ye bruk halei daong hu ye drei daong. Mikva urak ini daok gaok ralo kan kandah, daok ralo ruak kik, daong hagait hu ye drei daong, dahlak jeng hu nao gam dom ayut piah daong ka mikva. Dahlak jeng caong khin hadei di ini, kadung jien ini hu tư cách pháp nhân piah hadei di ini mai puk palei atau nao tal palei halei nan jak ba bhap bini ngak pahala daong atau hu sa var giao lưu dit blaong, me-in daoh tamia piah rik jien daong ka ralo urang jang gac”.

Urak ini, bhap bini urang Cam ralo meng lac daok kan kathaot, kinh tế daok pagam pambak tame bruk ngak nông, nan ye oh ngak hu hagait tuk njauk dom janih ruak kan kandah brei hu rilo jien piah iek ruak. Tok hu bruk ba tangin tame di bhap bini, abih di nyu nan lac dom urang daok dalam kadung jien Gilai praung – nao gam saong urang Cam njauk ruak” meng daong hu dom urang ruak lac urang Cam kan kathaot hu hatai jia tame rai diuk, daong ka urang hu iek ruak piah patui bruk bac daa, ngak bruk, rik daong ka xã hội. Bruk padang kadung jien ini brei mboh jalan diukrai siam mekre di bangsa VN nan lac “hala siam pacang hala tahak”.

Ranam urang yau ranam ka rup drei. Min piah ka bruk ngak hu tani tanat, pachreih hu bruk daong brei gam gam di dom kapul nyaom, menuac urang, kadung jien Gilai praung brei hu tư cách pháp nhân, saong brei padang bộ mac piah khik iek kadung jien ka nyu siam, lagaih./.