Hadei mbang hajan ia sua dui atah meng bloh, jalan nao tal palei Tà Nôi, xã Ma Nới dak kan kandah jang. Piah nao tal sang bac tiểu học Tà Nôi, dom anai gru, cei gru brei nao tapa tabung ceik piah nyaik 2 baoh craoh ia nduac khang.

Sruh radaih mac di dom anai gru, cei gru piah nao tapa glai, tapa craoh hu pabak vòng xích bó tame kong radaih meng peih nao hu. Nao tapa tabung ceik, dom anai gru, cei gru njauk nao tapa 3 baoh craoh meng tal sang bac. Anai Lê Thị Hồng Gấm, gru pato sang bac Tiểu học Tà Nôi-xã Ma Nới- huyện Ninh Sơn, tỉnh Ninh Thuận brei thau:

          “Mbang akaok meti mai ini adei mboh jalan nao biak kan kandah, njauk nao tapa 5-6 baoh chraoh meng tal jalan nao sang bac, mai tal ini adei mboh đồng nghiệp thân thiện anek saih biak anit ranam gru pato, kham merat bac biak siam nan ye khik takai adei daok veik”.

Kayua jalan nao mai kan kandah, di akaok adit, dom anai gru, cei gru ba tui brah, pandap mbang piah daok veik, puac adit meng mai sang meyah oh hu hajan. Mboh bruk glaih glar di anai gru, cei gru dalam bruk ba akhar huroh, dom amaik ame di labik ini hu paglaong akaok saneng brei anek nao tal sang bac piah pabak veik hatai siam di dom anai gru, cei gru. Saai Chăm Khẩu, ame anek saih daok di xã Ma Nới lac:

 “Anai gru, cei gru jeng abih hatai jai tuk halei jeng iek glang ka anek saih, oh padeih pato. Di labik ini lac biak kan kandah bo anai gru cei gru daok di Ma Nới mai Tà Nôi pato oh thau hadom craoh, glah glar. Baoh sang hu daong ngak yau habar brei anek nao bac ginup”.

Tà Nôi lac bhum kan kandah abih di xã Ma Nới, dalam palei hu 139 baoh sang bangsa Raglai ngan saong 643 menuac, min hu tal 81 baoh sang kan kathaot. Rai diuk biak kan kandah, min dom amaik ame jeng caong khin ka anek di drei nao tal sang bac piah bac akhar huroh. Kayua yau nan ye, bruk ba akhan huroh  di dom anai gru cei gru humbuan lagaih jang. Sang bac tiểu học Ma Nới hu 111anek saih daok  bac meng tal 1 tal tal 5, min 3 thun tapa oh ka hu anek saih halei padeih bac, taong abih anek saih jeng bac bloh danak dak pato megru. Mai meng bruk kham merat bac daa di anek saih saong bruk sangka di amaik ame ngan saong dom gru pato, nyu daong pabak hatai anit bruk ngak, ranam anek saih, ngak ka dom anai gru cei gru kak kajap saong bhum taneh daok kan kandah ini. Gru Thuận Xuân Nhất-Hiệu trưởng sang bac Tiểu học Tà Nôi - xã Ma Nới- huyện Ninh Sơn, tỉnh Ninh Thuận brei thau:

“Amaik ame biak halan hatian daong sang bac meyah sang bac hu panuac ieu daong ye amaik ame biak abih hatai jai. Kayua yau nan ye nyu ngak ka dom anai gru cei gru tagok ini pato biak sambai hatai saong mboh kak kajap saong bhum palei ini”.

Bruk ba akhar huroh tagok ceik di dom anai gru cei gru di bhum taneh Tà Nôi jeng daok kan kandah, glaih glar, min meng hatai anit bruk ngak hu daong ka dom anai gru cei gru  kham merat dalam bruk pala menuac, ba akhar huroh ka anek saih. Bruk abih drei di dom anai gru cei gru hu rik daong ngak salih barau bhum taneh Tà Nôi bak kan kandah, rambah rambup./.