Thu tuong Nguyen Xuan Phuc hu mbaok pak di labik piah pathau khan 

Harei 13-4, akaok negar Nguyễn Xuân Phúc mai pataom mbaok saong tabiak bruk pala phun “Miat miat hadar dhar phor Wa Hồ” di labik inem mek sajarah K9 - Đá Chông (Ba Vì, Hà Nội). Gam hu mbaok, hu Thượng tướng Phan Văn Giang, UV Mintri Chính trị, akaok Mintri Quốc phòng. Brei panuac di tuk peih bruk, akaok negar Nguyễn Xuân Phúc ndom lac, thun 2020 – 1 thun biak kan kandah ngan saong taneh ia drei. Bol bala drei patagok siam bruk di bol bala mesruh metak, bol bala ngak bruk karja, bol bala ngak mbnag pala drak, abih drei hu mbaok tame dom bruk ngak, dalam nan bruk pala phun, pala glai tuk halei jeng lac bruk brei ngak dahlau. Akaok thun 2021, gam haong taneh ia, bol bala bhap bini Việt Nam pachreihy tui bruk pala 1 tỷ phun hijao, kayua 1 Việt Nam hijao ngan saong kadha “siam lagaih, kein laba, pala phun halei, siam phun nan”. Tal urak ini, dalam bol bala pala hu labaih 1 triệu 500 rabau phun hijao, 737 ha glai.

Tal urak ni, di Đắk Nông, bruk mek panuac di cử tri labik daok ka dom urang tabiak angan piah pilih ruah ka QH mbang XV saong HĐ bhap bini tỉnh, tukvak 2021-2026, hu salah bloh. Tui brei thau di UB MTTQ dom huyện, ban, 11 urang tabiak piah pilih ruah ka Quốc hội mbang XV, 96 urang piah pilih ruah ka HĐND tỉnh mbang IV saong dom urang piah pilih ruah ka HĐND dom pakat dalam tukvak 2021-2026 di tỉnh Đắk Nông jeng mek hu taong abih hatai pachreih tui di cử tri labik daok. Dom mbang mek panuac, pachreih tui di labik daok hu rah tabiak dalam chreih chrai, dân chủ, hu ngak cambaih laih, ngak njauk haong adat. Urak ni, dom huyện, phường, xã di dalam tỉnh daok peih bruk padang saong ba tabiak angan, tiểu sử tóm tắt urang hu pilih ruah di jabat saong dom labik buh phiếu.

Cục Cảnh sát jalan mbak (CSGT) bahrau hu jalan peih ngak mbang tabung glaong khik kajap sron mbon bruk nao mai angaok jalan di tuk uan harei 30-4, 1-5, khik caga bruk pilih ruah urang ka QH mbang XV saong urang ka HĐ bhap bini dom pakat vaktu 2021-2026. Angaok jalan radaih,  CSGT dalam negar nao pasang iek, langyah catang dom bruk peih radaih suan, hu mbaok rilo di dom labik mbuan hu bala radaih paoh gauk, dom mon hu radaih rilo saong dom labik radaih peih srau kadau". Abih di nyu lac dom jalan praong tame tabiak Hà Nội saong TP.HCM,  dom jalan cao tốc, jalan roya, dom labik peih ngak rija, dom mblang radaih, mblang kapal…labik hu rilo radaih tame tabiak, dom labik daok padang ngak bhian rah tabiak bruk gar jalan.

Harei kabroi, gilai MP The Belichick pataok tame pabah lamnge  Cái Mép - Thị Vải, tỉnh Bà Rịa - Vũng Tàu piah ba pandap meng Việt Nam tapak nao tal takai tasik gah Tây negar Mỹ. Ni lac sa bruk brei mboh biak siam, oh huac njauk kan kandah di jit COVID-19 daok ngak kajak jhak tak gah kinh tế dunya min bruk pablei salih pandap panda di Việt Nam hu dom jak jeng siam lagaih. Tui pathau khan di taong cục yaok pataom, quý 1-2021 Hoa Kỳ lac darak pasa praong abih di Việt Nam ngan haong kim ngạch mek hu 21,2 tỉ USD, tagok 32,8% dut saong tukvak ni di thun dahlau.

Sở Pato Megru TPHCM hu brei thau ka harei pakacah pilih ruah tame tal 10 thun bac 2021-2022. Tui nan, anek saih pakacah 3 janih lac: Toán, Ngữ văn, sap negar lingiu dalam 2 harei lac 2/6 haong 3/6/2021. Dua môn Toán haong Ngữ văn ngak dalam 120 minit. Daok sap negar lingiu, ngak dalam 90 minit, oh daok lac 60 minit yau dahlau daih. Kadha bahrau dalam mbang pakacah pilih ruah tame tal 10 thun ini lac hệ số điểm 3 kadha pakacah Toán, Ngữ văn saong sap negar lingiu jeng lac hệ số 1, karei jang yaok thun nhân hệ số 2 ka Ngữ văn saong Toán. Anek saih trúng tuyển brei ngak ginup 3 kadha pakacah saong oh hu kadha halei taong điểm 0. Anek saih jeng hu tut angan 3 nguyện vọng ưu tiên 1, 2, 3 piah piloih ruah tame tal bac 10 dom sang bac THPT công lập (oh kuhria sang bac THPT Chuyên Lê Hồng Phong, sang bac THPT Chuyên Trần Đại Nghĩa saong sang bac Phổ thông Năng khiếu- Đại học Quốc gia TPHCM).

Dom nghị sĩ di Quốc hội Prang bahrau brei tapa bruk brei padeih par dom mbang par dalam negar angaok dom mbang par meda salih meng jalan pasei ngan haong tukvak ala 2 maong mateh. Jalan ngak ni lac manieng di sarak alam pamaong tame jalan ngak tal thun 2030 France trun 40% nerak tachrauk CO2 dut saong thun 1990.

Gah Y tế dunya (WHO) brei thau, jaik 40 triệu mbang vaccine pacang Covid-19 hu parabha tapa jalan COVAX, sa meteh dalam nan lac brei ka bhum châu Phi. COVAX lac danak dak kayua WHO dang akaok piah khik ka dom taneh ia kan kathaot hu vaccine yau dom taneh ia kaya meda.Min,COVAX daok gaok kan kandah ka bruk duah hu vaccine, abih di nyu lac tuk Viện Huyết thanh di Ấn Độ, 1 dalam dom labik ngak saong pabak praong ka COVAX, khan lac cakak trun meneing vaccine AstraZeneca. Makna lac kayua tamuh khang jit mbang ka 2 di Ấn Độ ngak ka bruk pandar vaccine dalam taneh ia tagok glaong.

Hadei di sa thun njauk bac meng atah saong brei daok paatah di gauk piah plaih jit Covid-19, rilo anek saih alah jang saong randap haong bruk bac tapa jalan online.Thau ka bruk ini,sang bac Felix Rodriguez de la Fuente di Mu-xi-a di Tây Ban Nha hu peih tabiak dom tal bac di mblang tasik piah mek veik hatai pachreih bac di dom adei. Bruk ngak ni oh padeih di pandar langik langiu laneing lahei bo daok rik tame bruk patakik njom Covid-19 ka anek saih. Tui duah thau, oh hu urang halei njom ruak dalam dom anek saih hu mbaok tame tal bac ni./.

Urang lang: Thu Thảo -Mousaphuong -14/4