Rilo urang hu klauk jru mbang ka 2

Harei 16/9, di Hà Nội hu peih danak dak jak ba “Taong abih bhap bini jum pataom, kham merat pacang caga jit COVID-19”, kayua Đoàn Chủ tịch Ủy ban Trung ương MTTQ Việt Nam, Tiểu ban Jakba saong ieu pataom menuac sia, di mBan tacei pato pakat negar pacang caga jit COVID-19 peih tabiak. Di tuk peih bruk, 30 kapul nyaom, doanh nghiệp, menuac urang tut angan daong  labaih 290 tỷ đồng.Tui nan, jalan rik daong tapak tapa blah web: http://vandongxahoi.mattran.org.vn hu tabiak mbaok, piah daong ka dom urang ngak pahla mbuan payua jien daong bruk pacang caga jit.

Harei ini, Pasak pasang iek ruak kik TP.HCM (HCDC) brei thau, meng tuk peih bruk klauk vaccine mbang 1 (harei 8/3) tal abih harei 15/9, TP hu klauk jaik 8 triệu 453 mbang, dalam nan hu labaih 1 triệu 785 rabau urang klauk mbang klauk ka 2. Vaccine Vero Cell hu klauk brei ka 2 triệu 225 rabau menuac, taong abih jeng hu salamat. Dalam dua harei lac harei 14 saong harei 15/9, dom quận huyện peih bruk klauk ka taong abih urang umo mangaok 18 thun oh ka klauk mbang klauk ka 1, oh cang tut angan dahlau, tok ba tui chứng minh nhân dân atau dom janih harak gar karei.

UBND tỉnh Đồng Nai bahrau patabiak bruk pasaim veik dom bruk KTXH, an ninh-quốc phòng, khik kajap bruk pacang caga jit COVID-19. Tui nan, dalam tỉnh daok ngak tui Sarak 16. Daok dom bhum hijao, meng harei 16/9 tal  harei 20/9, pandar Sarak 15 di bhum hu klauk vaccine mala 60%, pandar sarak 19 di bhum hu klauk vaccine meng 60-70%. Dom bhum hu klauk mangaok 70% hu pandar bruk  “siam mekre bahrau”, brei adat pataom mala 30 menuac meyah klauk ginup 2 mbang vaccine atau abih ruak COVID-19 dalam 180 harei…

Tỉnh Bà Rịa - Vũng Tàu bahrau brei adat ka dom bruk ngak pandap, pablei salih di dom huyện: Côn Đảo, Châu Đức, Xuyên Mộc haong Đất Đỏ hu peih pabah mbang veik. Tui nan, meng harei 15/9 tal harei 30/10, urang ngak lac urang dalam huyện hu ndik radaih di drei nao tal labik ngak bruk, min brei ngak tui 5 paka di Mintri Y tế, dut iek yaok 5 harei sa mbang. Urang ngak nong nao ngak brei hu adat di karja saong brei sanya nao mai meng labik daok tal labik ngak. Tỉnh brei peih veik dom siêu thị, pasak pablei salih, darak meng kan (nao darak tui phiếu), labik pablei rai, labik mbang menyaum pablei ba nao sang.

Mesup ini, 6 phường di ban sit Tân Uyên, tỉnh Bình Dương bahrau hu brei angan lac “bhum hijao”, nan lac: Thạnh Phước, Vĩnh Tân, Phú Chánh, Bạch Đằng, Thạnh Hội haong Tân Vĩnh Hiệp, rahra hu mai veik raidiuk siam mekre bahrau. Menuac sia tabiak jalan piah nao blei brah, pandap mbang huak, dom bilai pasang iek jit di dom phường jeng daok khik iek catang. Ban sit Tân Uyên jeng daok 1 phường “bhum katam”, 3 phường “bhum kanjik”,  2 phường “bhum meraih bhong”. Palei daok patagok pasang iek piah ba F0 tabiak truh puk palei, jhul samar bruk klauk vaccine ka bhap bini.

Indonesia brei thau lac daok ginum biai haong Gah Y tế dunya WHO saong 6 Cty jru piah hu jeng pasak ngak vaccine di dunya. Urak ini WHO hu pilih ruah Nam Phi lac labik camereip saong Indonesia caong lac labik ka 2. Tui Mintri Y tế Indonesia, taneh ia ini hu labik lagaih piah ba vaccine tabiak negar lingiu, saong lac taneh ia tui Islam rilo menuac abih di dunya nan ye meda khik kajap bruk lac vaccine hu klauk ka urang Islam.

Harei 15/9, mbang camereip abih kuhria meng bilan 2, jaik 140.000 anek saih Phnom Penh hu nao bac di sang bac công lập haong tư thục hu Mintri Pato pakai Campuchia brei panuac lac salamat. Taong abih dom gru pato, menuac ngak di sang bac haong anek saih brei hu harak lac klauk bloh vaccine saong brei cuk pataih pacang mbaok. Thủ tướng Hun Sen brei thau, Campuchia brei peih bruk klauk vaccine ka uranaih umo meng 6 tal 12 thun di harei 17/9 piah meda peih veik dom sang bac tiểu học.

Zabihullah Mujahid, lac urang brei panuac di Taliban harei ini hu panuac ieu dunya công nhận rajaei bahrau di Afganistan, brei adat taneh ia ini hu pandar drap ar daok pacang kreik di taneh ia langiu. Ong Mu-gia-hít ndom lac, rajaei bo Taliban ba tabiak tok khin padang talei rohim siam mekre haong dom taneh ia di dunya, tapa jalan ngoại giao. Urak ini, pok jien di Gilang pariak negar Ápganixtan daok di taneh ia langiu tui kuhria lac jaik 10 tỷ USD./.

Urang lang: Mousaphuong -16/9