Dom urang hu thẻ BHYT klak abih harei pandar meda hu brei thẻ BHYT birau meng harei 1/4

Harei 23/3/2021, di Hà Nội, Hội đồng bangsa di Quốc hội pambuak bruk song gilang pariak karja peih ginum biai tong yaom bruk peih ngak sarak xã hội ngan song mik va bangsa takik. Kuhria tal abih thun 2020, hu labaih 1,4 triệu boh sang urang bangsa takik hu mbang tui dom danak dak brei mesraiy, tui kuhria hu labaih 39 triệu đồngyaok boh sang. Hội đồng bangsa njauk hatai ka panuac caong parabha tong abih phun jien meng kadung jien karja brei mesraiy piah peih ngak danak dak patagok kinh tế - xã hội bhum bangsa takik song bhum ceik tuk vak 2021-2030.

Dom urang hu thẻ BHYT klak abih harei pandar meda hu brei thẻ BHYT birau meng harei 1/4. Ini lac khaw tin di Nyaom biai brei thau ka mẫu thẻ BHYT birau kayua BHXH Việt Nam peih tabiak di page ini (24/3) di Hà Nội. Urang hu brei thẻ BHYT birau lac dom urang birau blei BHYT; ngak veik ka urang lahik thẻ BHYT; brei veik thẻ BHYT kayua taik tahak, khut, salih khaw tin. Yau nan hu labaih 3 trieu urang hu brei harak BHYT birau dalam bilan 4 ini.

Pambuak tal bruk sa urang ruak di ban raya HCM nao iek ruak BHYT 80 mbang dalam 2 bilan akaok thun 2021, mesup ni (24/3), Bảo hiểm Xã hội ban raya brei thau, hu ba harak gar tapa jabat công an piah pasang iek bruk nan. Nan lac urang ruak angan Nguyễn Tuấn Khôi, 80 mbang nao iek ruak BHYT dalam 2 bilan akaok thun ni, song yaom jien BH bayar abih tih lac labaih 60 triệu đồng. Urak ini oh ka hu adat halei brei patrun patakik dom mbang nao iek ruak, min, urang halei pambak tame kadung jien BHYT piah duah kein laba njauk langyah tacang tui hukum.

UB bhap bini tỉnh Ninh Thuận birau peih bruk ginum biai saong dom doanh nghiep piah caik hatai tui pang dom caong khin, lang talaih dom kan kandah ka doanh nghiep dalam tỉnh. Dom doanh nghiệp likau tỉnh daong trun jien je, ramik veik yaom pah taneh saong sarak brei pah taneh; daong salih danak dak mek khoáng titan tapa danak dak ngak năng lượng tui sarak di Rajaei; daong peih taneh piah padang ngak danak dak; pataom mblang taneh piah iew urang buh jien tame ngak mbang. Urang dang akaok UB bhap bini tỉnh Ninh Thuận iew dom sở, dom gah, palei pala pasang iek, sumu lang talaih dom panuac caong khin di doanh nghiệp, suai abih lac dalam quý 2 thun ini.

Harei 24/3, lambaok dom jabat tố tụng quận Bình Thạnh, TP.HCM hu pambuak bruk song UBND xã Đông Thạnh, huyện Cần Giuộc, Long An peih bruk likau ma af, rao duas tui hukum bayar jien di karja ka saai Bùi Minh Lý (umo 32 thun dok di palei Trung, xã Đông Thạnh). Saai Lý njauk dok guk 2 thun kayua kaoh duas suan lac saai meblah mek drap ar. Luật sư brei thau pok jien ndok bayar di sang saai batabiak lac 3,8 tỉ đồng.

Tui Mentri Y tế Australia, Jabat khik iek jru cavao di negar ini birau mbaoh tangin brei pajeng 832.200 mbang jru vắc xin di AstraZeneca ka dom labik y tế piah klauk jru caga ruak ka bhap bini. Meng bruk ngak tabiak 500 ribau mbang vaccine yaok adit, Australia kham merat tal bilan 6 thun ini meda hu 6 triệu urang lac dom urang umo 70 thun, urang dalam palei, dom urang umo 55 thun hu ruak dalam rup saong dom urang y tế daok veik hu klauk jru vaccine caga Covid-19.

Harei ni, karja bol bala Myanmar hu bayar bebas tự do ka labaih 600 urang trun jalan. Kapul dong urang guk Chính trị brei thau labaih 2.600 urang njauk chap khik song takik di abih 275 urang metai meng di tuk tamuh tabiak buk trun jalan cagar veik bruk pajaleih karja di Myanmar. Di Yangon harei ni, rilo doanh nghiệp kreih pabah mbang song takik radeih nao mai angaok jalan hadei di tuk dom urang ngak bruk hu panuac ieu "padeih ngak bruk dalam joa kandang". Bruk padeih ngak bruk rah tabiak hadei di tuk sa uranaih umo 7 thun njauk gah an ninh cuh metai, jeng sa menuac gaok bala ranaih umo di abih dalam bruk srau kadau di Myanmar.

Gah truyền thông Ân Độ brei thau, Gah an ninh di Ấn Độ njauk kol phiến quân hu phao taong tame di Narayanpur, bang Chattisgarh, ngak brei takik di abih 5 urang an ninh metai saong 15 urang njauk rambuac. Gah an ninh daok angaok jalan mai veik căn cứ meng radaih pajeng tuai hadei tuk tamat bruk pagui mek kol phiến quân Na-xa-li-tê (Naxalite) ye njauk taong tame. Radaih pajeng 40 urang patuh khang saong laik meng tatua trun kraong thu ia.

Urang lang: Ái Nghiêm – Hani Pha – 24/03 16:25:55