Ban raya HCM brei pataom ka pahu taong abih dom menuac oh hu sang danaok, daok ban glai ban klo di jalan

Harei 23/8, Phó Thủ tướng Vũ Đức Đam haong dom urang pan akaok Mintri Quốc phòng, Mintri Công an haong kapul ngak bruk di Rajaei hu ngak bruk haong mBan tacei jalan pacang caga jit COVID-19 quận 4. Tui urang pan akaok Mintri Công an, tuk pasang iek bruk pacang caga jit, jeng mboh di 2 labik dalam quận 4 daok hu menuac ban glai ban klo angaok jalan, njauk pasang iek catang dom urang mbuan njom mbak ini. Phó Thủ tướng Vũ Đức Đam jeng hu panuac ieu tal biar harei ini 23/8, taong abih 312 phường, xã dalam TP.HCM brei pataom ka pahu taong abih dom menuac oh hu sang danaok, daok ban glai ban klo di jalan.

Meng mon 12 melam 23.8, TP.HCM yam tame mbang pa-atah di gauk biak catang, khik njauk bruk pa-atah di gauk tui jalan lac, "thei daok halei daok nan". Bộ Tư lệnh ban raya hu ba 310 kapul nghak bruk lac dom urang lin Quân khu 7 nao daong pajeng ba dom pok an sinh xã hội, pabak pandap mbang tal yaok baoh sang saong nao drak blei pandap ka rahra. Mbang ini, lingiu gah  quân y tame daong gah y tế, daong prein ka bruk taong ruak, bol bala daok hu mbaok tame pok an sinh pabak pandap mbang tal yaok sang, peih bruk pasang iek, pathau khan tal yaok canah jalan.

Hadei di 3 mon brei trun pandar Sarak 15, tỉnh Bạc Liêu samar pandar veik Sarak 16 kayua hu rilo F0 bahrau. Tukvak pandar Sarak 16 lac meng mon 3h harei 23/8 mbiah tal tuk hu panuac khan bahrau. UBND tỉnh Bạc Liêu brei thau, bruk ini hu ba tabiak tuk kreh melam 22/8, mBan tacei jalan pacang caga Covid-19 tỉnh pathau khan lac hu 4 F0 bahrau; 177 F1 haong yaok ratuh F2. Gah y tế taong yaom dom urang njaom pambuak tal rilo labik di tỉnh nan ye biak mbuan njom mbak jit ruak dalam bhap bini.

Ong Nguyễn Văn Đặng, Yam ndok Pasak Y tế ban sit Tân Uyên, tỉnh Bình Dương bahrau brei padeih ngak bruk kayua "oh ngak siam bruk ngak, caik ka jit njom mbak". Tal urak ini ban sit ini hu 20.165 urang ruak, samu 29% menuac sia dalam tỉnh. Kuhria meng mbang jit ka 4, Bình Dương hu 70.242 urang njom Covid-19, dalam nan hu 29.015 urang ruak thit abih ruak hu brei nao sang, 570 urang metai. Meng harei 22/8, tỉnh brei ngak catang 11 phường di ban sit Thuận An haong ban sit Tân Uyên dalam 15 harei. Jalan ngak ini jeng hu ba tabiak ngak di 4 phường dalam ban sit Dĩ An meng harei 23/8 dalam 7 harei.

Mesup ini, Pasak kuhria mboh dahlau bruk langik tasik pakat negar brei thau, meda hu ngin ribuk rilo di Bắc bộ haong Nam bộ kayua ngin Tây Nam khang. Tui nan, meng ini tal harei page (24/8), di bhum Tây Nguyên haong Nam bộ meda hu hajan saong hu labik hu ngin rabuk, hu hajan praong tal biak praong, meda hu jakala, hajan patau haong ngin khang. Meng harei 25 tal harei 28/8, hajan ribuk di TP.HCM haong dom tỉnh gah meraong daok tagok jang, pambak tabiak bhum Nam Trung bộ, Tây Nguyên haong Nam bộ.

Harei 23/8, mbang camereip abih  kuhria meng bilan 7 meng blaoh, Trung Quốc oh hu urang halei njom mbak dalam bhap bini kuhria dalam 24 mon. Ni lac bruk brei mboh mbang tamuh jit bahrau abih di taneh ia ini daok hu pasang iek siam. Tui Hãng tin Reuters, harei 23/8, UB Y tế negar (NHC) Trung Quốc mboh hu 21 urang njom bahrau dalam 24 mon, trun  duk haong 32 urang di harei dahlau. Taong abih jeng lac tuai mai meng negar lingiu. Tal urak ini, Trung Quốc hu abih tih 94.652 urang ruak kuhria meng akaok jit, dalam nan hu 4.636 urang metai. Dom menuac metai kayua COVID-19 di Trung Quốc oh salih karei kuhria meng puac bilan 1 meng blaoh.

Dalam mbang họp báo mesup ini, Thủ tướng Australia Scott Morrison khan lac, taneh ia ini brei pacadu dom jalan ngak catang pacang caga jit ruak COVID-19 tuk dom menuac klauk vaccine tagok rilo. Tui kuhria tuk menuac klauk vaccine hu 80%, Australia tok brei pacang dom labik mbuan njom, daok dom menuac hu klauk vaccine blaoh meda nao mai dalam bang tui hatai. Urak ini hu  labaih meteh menuac sia Australia daok brei paatah di gauk saong brei pacang veik biak catang piah pacang cakak jit ruak tamuh veik.

Mintri ngak nong, ngak glai, ngak ikan Campuchia brei thau, jit katal kalik ndaong baoh angaok athur daok tagok khang di taneh ia ini, urak ini hu tal 10.000 athur di 20 dalam 25 tỉnh, ban njom ruak. Abih di nyu nan lac, dom tỉnh jaik taphia Thái Lan hu athur njom ruak rilo, hu 1% dom athur metai. Campuchia urak ini daok kham duah blei vaccine piah klauk ka tapon athur dalam negar abih tih labaih 3 triệu drei./.

Urang lang: M.Phương – 23/08 16:47:25