Tỉnh Ninh Thuận dok duah thau nyom urang mbuan si njom glong dalam bhap bini piah ba tame angan mek mẫu dut iek

Harei 27/5, di mbang nyaom ka 56 di Ủy ban Thường vụ Quốc hội, rajaei hu pathau khan ka bruk peih ngak patak pataom, pacang palai pajoa dalam thun 2020. Brei thau ka bruk peih ngak patak pataom, pacang palai pajoa thun blaoh, Rajaei hu pathau khan bruk rami ramik gah hành chính karja mek hu siam mekre. Tui nan, bruk rami ramik dom jabat hành chính pakat huyện, pakat xã hu ngak salah ngan song bruk trun 6 jabat pakat huyện song 546 jabat pakat xã. Patrun 23.896 urang. Taphia di nan, bruk salih bahrau hành chính, padang ngak rajaei điện tử mek hu rilo siam mekre; tagok bruk ginum biai, ngak bruk online langyah harak gar bruk hit tui jalan điện tử, dong patak pataom hu labaih 18 triệu harei ngak bruk/dalam sa thun, samu labaih 6.300 tỉ đồng/dalam sa thun.

Pasak pasang iek ruak kik TP.HCM brei thau, mesup ini (28/5), ban raya hu 10 urang njaom bahrau, dalam nan hu 8 urang pambuak tal bruk njaom mbak di Hội thánh truyền giáo Phục Hưng saong 2 urang bahrau hu mboh tuk nao pasang iek ruak di sang iek ruak Hoàn Mỹ Sài Gòn. Meng harei ini, UBND TP.HCM ieu brei padeih dom bruk ngak adat di agama hu meng 10 menuac tagok di dom labik ngak adat di dom agama. Taong abih rahra ban raya njauk takik tabiak jalan meyah oh hu bruk hagait praong. Dom sang pablei salih pandap mbang menyum rah tui jalan oh brei pablei ka urang mbang menyum pak di labik, tok brei pablei ba nao.
Tỉnh Ninh Thuận dok duah thau nyom urang mbuan si njom glong dalam bhap bini piah ba tame angan mek mẫu dut iek, piah samar mboh dom urang njom SARS-CoV-2 piah samar pacang labik, langyah, pacang cakak jit ruak. Tui nan, tapa duah thau, dalam tỉnh hu labaih 5.900 urang di nyaom urang mbuan si njom glong, nan lac: urang ngak y tế, dom urang ruak jalan suah yava; urang peih radeih pajeng tuai; urang ngak bruk di mblang radeih pui, mblang radeih pajeng ba, pabah lamnge; urang jakar, urang ngak bhain ngak bruk taom gaok rilo menuac urang, tuai damuai …

Melam blaoh 27/5, Sang iek ruak dã chiến ka 2 Bắc Giang hu taduan raok labaih 500 urang ruak COVID-19 ba meng sang iek ruak gila Bắc Giang saong meng huyện Việt Yên. Ini lac dom menuac njom ruak dalam dom harei tapa. Sang iek ruak dã chiến ka 2 Bắc Giang hu caik di sang pakacah thể thao tỉnh, hu 620 papan ndih saong hu 500 urang jakar, urang ngak gah y tế. Sang iek ruak dã chiến ka 2 hu brei bruk brei daok karei, iek glang, taong ruak saong cấp cứu urang ruak COVID-19. Dom bilik urang ruak pak ini hu daning pacang, pacang caga bruk njaom mbak nao mai.

Tui dom urang ilamu gah langik tasik, mbang hajan khang di rilo labik di gah merong hu tamat bloh, yaom lac beir harei melam ni dok hu hajan, min oh dok prong tra. Harei hu pandiak, nhiệt độ meng 30-32 độ, hu labik 33 độ C. Meng harei 30-5 tal harei 5-6 lac tukvak harei pandia, hu harei pandiak di gah Đông Nam bộ, beir harei melam jeng hu hajan song hangin di dom labik. Meng kreih bilan 6, sa mbang hajan khang hu mai veik.

Mỹ harei kabroi hu panuac ieu gah Y tế dunya (WHO) peih bruk duah thau bharau ka asal di jit praong COVID-19, tui jalan khik ka dom chuyên gia độc lập meda taom gaok hu ginup dom harak gar jeng yau dom mẫu bệnh phẩm daok tamo. Theo kapul urang ngoại giao Mỹ di Liên hợp quốc, bruk duah thau tuk camereip di Gah Y tế dunya lac ka oh ginup, saong oh ba tabiak hu panuac tamat cambaih laih. Kayua yau nan ye, sa bruk duah thau bahrau tantu, cambaih laih saong iek tui bruk mboh di anak meta lac bruk njauk ngak. Trung Quốc dahlau di nan hu rilo mbang ndom lac asal di vi-rút Sars CoV-2 oh lac di gah dalam taneh ia ini, bo meng gah lingiu tame

Harei 27/5, Jabat y tế Thái Lan brei thau urang metai kayua COVID-19 tui harei di tanut glong abih kuhria meng akoak jit lac 47 urang metai dalam 24 mon tapa. Dahlau di nan sa harei, Thái Lan jeng hu 41 urang metai dalam sa harei, lac tanut glaong bahrau abih di tuk nan. Hu thau, Thái Lan hu 3.323 urang njom bahrau, dalam nan hu 1.219 urang di dom sang guk.

Mbang jit Covid-19 tamuh tabiak di bang Victoria di Australia daok ngak brei dom jabat chức năng saong rahra taneh ia ini jhul khang bruk klauk vắc-xin piah ngak brei patrun dom urang njaom ruak. Harei ini, karja bang Victoria di Australia bahrau brei thau, dom urang umo mala 40 thun daok di bang ini meda tut angan piah klauk vắc-xin caga Covid-19. Dahalau di nan, bruk tut angan bahrau hu peih tabiak ka dom urang umo meng 40 thun tagok saong dom menuac daok ngak bruk pacang jit, menuac ngak bruk di dom sang iek glang urang taha./.

Urang lang: M. Phương – Hani Pha – 28/05 16:04:12