MukTruong Thị Mỹ Hoa hu panuac kakei anek saih urang banga takik 

Mesup ini (29/12), amuk Nguyễn Thị Kim Ngân - UV Bộ Chính trị, akaok QH mai hu mbaok dalam bruk taduan mek angan AH tapon nyom bol pan phao kraong bhap bini saong pahadar 45 thun harei ilamu Sang iek ruak Quân y 175- Bộ Quốc phòng. Taong yaom glaong dom jak jeng di sang iek ruak tapa dom vaktu, akaok QH Nguyễn Thị Kim Ngân caong lac sang iek ruak Quân y 175 brei jhul khang bruk pandar công nghệ thông tin, ngak jeng sang iek ruak naih gheih, salih bharau tui jalan 4.0,rik daong ka bruk patagok khang kajap di gah y tế dalam taneh ia.

Harei 28/12, di Kon Tum, Phó akaok negar dahlau dieh, akaok kadung jien bac Vừ A Dính Trương Mỹ Hoa hu jao jien bac thun bac 2020-2021 ka 80 anek saih bangsa takik hu raidiuk biak kan kandah daok di huyện Tu Mơ Rông saong Đăk Tô, yaok paok yaom 1 triệu đồng saong pandap bac taa. Muk Trương Mỹ Hoa  taong yaom glaong gah pato magru tỉnh Kon Tum kham merat paglaong bruk pato pakai, daong ka dom anek saih bangsa tabiak yam tagok tabiak truh kan kandah, bac da-a siam lagaih.

Meng ini tal bilan 5/2021, ia ndik tagok glaong di labik tapen tasik gah meraong, ngak brei dauk dalam rilo labik dhaong, labik taneh biar. Lingiu di nan, ia mbak njom tame bhum taneran gah meraong dalam bilan pandiak thu thun 2021  meda glaong jang rilo thun tapa. Tui pasak kuhria mboh dahlau bruk langik tasik negar, dom tỉnh, ban dalam bhum taneran kraong CL njauk kuhria dahlau dom jalan pacang caga ia mbak, pandiak bhang meng di tuk ini, caga padang khik ia brei ka bruk pala drak, khik caga dom bein phun mbang baoh saong ia piah pandar.

Bier harei ni (29/12),UBND TPHCM brei thau, tapa dut iek urang lakei  angan Kha tame negar  suan hukum mai daok di quận 9, mboh lac dương tính haong Covid-19. 17 urang taom gaok jaik haong Kha jeng hu brei daok karei.Kha daok dalam kapul 6 urang tame negar Việt Nam suan hukum di harei 24/12, dalam nan hu urang ruak ka 1440 (Vĩnh Long), urang ruak 1451 (quận 5, TP.HCM), urang kumei angan N. daok di Đồng Tháp ( dương tính haong Covid-19); dua urang karei daok di quận 1 saong huyện Hóc Môn mboh âm tính mbang ka 1

Ndom ka urang ruak 1440,CA tỉnh Vĩnh Long brei thau lac daok ngak harak gar, meyah mboh ginup kadha ngak jeng menuac hu duas, meda khởi tố vụ án tui njauk adat hukum. Urang likei ruak umo 32 thun, urang Việt Nam hu labik daok di xã Nhơn Phú, huyện Mang Thít.Hadei di tuk tame negar suan hukum tapa jalan haluk sit, urang ruak hu nao tapa rilo tỉnh, tame rilo labik saong taom gaok rilo menuac,min dom urang F1 jeng oh thau cambaih labik daok.Urang ruak ini ndom puac srau kadau,ngak kan kandah ka bruk pasang iek, duah thau dom urang F1 saong F2.

Pasak pasang iek ruak kik saong pacang caga jit ruak Mỹ brei thau lac daok peih bruk klauk labaih 2 triệu 100 ribau mbang vắc-xin Covid-19, peih tabiak jalan jhul kandun likuk jit praong di Mỹ - lac negar hu manuac urang njom saong metai glaong abih di dunya. Meng harei 13/12, Mỹ brei peih bruk klauk vắc-xin caga Covid-19 di abih tih 50 bang. Min, tui Tiến sĩ An-thô-ni Phau-xi (Anthony Fauci), urang ilamu ka dom ruak njom mbak di Mỹ, vắc-xin oh patagok kein lagaih mayah bhap bini oh paglaong hatai saneng eng drei khik caga prein yava.

Sa Cty di negar Anh bahrau tabiak mbaok sa janih pandap biak karei lac dom klaok padang “không khí biak”. Dom klaok padang không khí hu mek meng dom bhum di negar Anh, hu: Scotland, xứ Wales saong Bắc Ai-len piah pabak ka urang negar Anh daok di taneh ia lingiu, daong ka dom urang nan cadu meneing hatai uan sang kayua oh mai taom gauk gar hu di thun bahrau kayua jit ruak Covid-19. Klaok không khí 500ml, yaom 25 bảng Anh (samu 33 đô la Mỹ). Cty ini jeng hu mek không khí di dom labik halei karei dalam negar Anh tui panuac caong di urang blei.

Harei ni (29/12), Campuchia peih bruk mek manyek akaok meti di mỏ dầu langiu tasik di tỉnh Preah Sihanouk dalam labik Vịnh Thái Lan. Thủ tướng Hun Sen taong yaom bruk mbang camriep mek manyek lac sa tanut hu makna praong piah ka Campuchia tui veik cak rok patagok gah ngak menyek saong năng lượng,pabak prein khang ka kinh tế negar ni hu pasiam veik dalam thun 2021./.

Urang lang: Mousaphuong- Thu Thảo -29/12