Harei 28/1/2021, tuk page, nyaom roya mbang ka 13 di Đảng ngak bruk di Hội trường, patui bruk ginum biai dom harak di nyaom roya XIII. Hu 36 panuac ndom puac di Hội trường saong 788 panuac ndom puac di kapul ka dom harak di nyaom roya XIII. Bruk ndom puac biak chreih chrai, ndem tapak, dân chủ. Nyaom roya hu ginum biai, njauk hatai brei tapa dom UV Ban Chấp hành TW Đảng mbang XIII lac 200 urang, dalam nan hu 180 Ủy viên cambaih saong 20 urang Ủy viên caga pabak.

Di tỉnh Cao Bằng saong labik inem mek biak praong di Negar lac Pác Bó, xã Trường Hà, huyện Hà Quảng, tỉnh Cao Bằng hu peih ngak rilo bruk pahadar 80 thun – harei Wa Ho mai veik taneh ia pan akaok ba jalan Cách mạng Việt Nam (28/01/1941-28/01/2021). Di var pahadar nan, kapul dam dara CS Hồ Chí Minh pakat negar hu peih danak ndom biai “Wa mai ba tui dom bilan xuân” di labik inem mek Pác Bó. Tapa nan, dom urang lambaok vakil hu ndem tal makna di bruk Wa Ho mai veik taneh ia pan akaok ba jalan Cách mạng Việt Nam nao tal rilo jayak, dalam ann hu CM bilan 8 thun 1945.

  Tui panuac khan di mban pato tacei pakat negar ka bruk pacang caga jit COVID-19, kuhria tal maong 6 dah page ni 29/1, Việt Nam hu 9 urang njom bahrau COVID-19 nhom mbak dalam rahra., pambua tal sruh jit di ban Chí Linh (Hải Dương). Tui nan, dalam labaih sa harei tapa, Việt Nam hu 95 urang ruak Covid-19 pambuak tal sruh jit di Hải Dương saong Quảng Ninh. Dalam bruk kham marat piah padam jit, jhil kadun likuk bruk tamuh ruak bahrau ni, harei kabroi, Phó thủ tướng Vũ Đức Đam, akaok Ban pato tacei pakat negar pacang caga Covid 19 hu ieu kakei dom tinh, ban khang hatai taong phat dom bruk oh cuh pataik pacang pambah pacang caga jit di labik hu rilo manuac. Dua sruh jit di Hải Dương saong Quảng Ninh lac bruk njom pabak dalam rahra praong abih meng dahlau mai, mbuan njom mbak praong biak samar drak.

Tijuh urang F1 taom gaok urang ruak ka 1553 hu mbaok dalam kapul noa pataom tuai damuai  mai veik Ban raya HCM dut iek mboh am tinh mbang ka 1. Yau nan min, kayua TPHCM lac labik hu jalan mbak tame tabiak rilo, hu rilo bhap bini yau nan ye jit ruak mbuan tamuh dalam bhap bini glaong, ong Võ Văn Hoan, Phó Akok UB bhap bini TPHCM caong khin gah y tế, dom jabat, dom palei di Ban brei peih ngak veik taong abih gah pacang caga ruak, caga pandap panda, manuac ngak bruk ginup piah caga ka bruk brei daok karei di labik daok dalm ban piah taduan urang daok karei njauk tui bruk ba tabiak di karja.  Tui nan, peih praong bruk pasang iek gah y tế, dut iek dịch tễ piah hu jalan pacang caga jit lagaih; brei pakhang bruk mek darah dut iek dom kapol urang mbuan njom ruak yau sang bac, sang iek ruak, mblang radaih, kapal haok, labik hu rilo urang ngak…

  Piah caga pacang ia mbak daok njom tame, harei 28-1, UBND tỉnh Tiền Giang peih bruk padang ngak binek meng pasei pasiak pacang ia mbak di kraong Nguyễn Tấn Thành (di xã Song Thuận, huyện Châu Thành). Ni lac danak dak pacang ia mbak praong abih piah pabak ia pandar ka 1,1 triệu bhap bini tỉnh Tiền Giang saong Long An. Binek atal 76 mét, trak labaih 1 tấn, kayua Cty Cổ phần padang ngak Tiền Giang ngak dalam 12 harei.

Sa ribau 300 tỷ USD lac jien palai lahik di gah dulich dalam thun 2020. Jien ini kayua Gah Dulich dunya birau ba tame saong brei thau harei kabroi 28/1, tapa nan  hu mboh jit Covid-19 nyu palai pajua di gah nan. Tui Gah Dulich dunya, jien palai lahik nan tagok glaong 11 mbang dut saong bruk sraw kadau gah kinh tế thun 2009. Thun 2020 jeng lac thun trak damak abih kuhria meng lavik mai di gah dulich. Bruk dulich trun 74% saong tuai damuai negar langiu  trun 1 tỷ mbang dut saong thun 2019, gam saong labaih meng 100 tal 120 trieu bruk ngak lahik. Bhum taneh gaok kan kandah trak abih lac châu Á – Thái Bình Dương ngan tuai damuai trun 84%, tui nan lac bhum  Trung Đông-châu Phi trun 75%.

Yam ndok iek gah Châu Âu di gah Y tế dunya ong Han Clút (Hans Kluge) harei kabroi (28/1) brei thau, jit Covid-19 di châu Âu daok trun min jeng daok biak aval piah ngak pacadu bruk pacang cakak. Ong Han Clút brei thau, hu 35 negar Châu Âu peih bruk klauk jru pacang caga ngan haong labaih 25 triệu urang hu klauk vắc-xin Covid-19, dalam tuk nan, bruk ni di dom negar takik patagok bier jang biak rilo. Ong Han Clút jeng brei thau bruk suai damuai dalam bruk pabak vắc-xin Covid-19 di Pfizer/BioNTech ka 27 negar EU. Tapa nan brei mboh bruk meblah gauk bialk khang dalam bruk mesuk meblah vắc-xin caga covid-19.

Harei 28/1, Thủ tướng Iraq Mustafa al-Kadhimi  brei panuac lac phó akaok kapol khủng bố Nhà nước Hồi giáo tự xưng (IS) Abu Yasir al-Eisawi njauk gah bol lin Iraq pametai di sa chiến dịch di taneh ia ini. Thủ tướng Iraq brei thau, bruk pametai phaok akok urang pan akaok IS, urang pak akaok dom urang patuh phao di IS pak Iraq, hu peih ngak tui dom khaw tin  tình mbao. Yau nan min, Thủ tướng Iraq oh brei thau labik peih ngak chiến dịch jneg yau tukvak pametai Yasir al-Eisawi./.

Urang lang: Ai Nghiem & Thu Thao  29/1/2021  11:59:00