Mai peih pakak, hu Phó Thủ tướng Vũ Đức Đam

Harei 30/8, di TP.HCM, Mintri Công an peih pakaak sang iek ruak dã chiến Phước Lộc (huyện Nhà Bè), taong ruak ka menuac ruak COVID-19 dalam ban raya. Mai peih pakak, hu Phó Thủ tướng Vũ Đức Đam. Đại tá Tiền Thanh Liêm, Phaok Yam ndok sang iek ruak 30-4 hu pok ngak Yam ndok Sang iek ruak dã chiến Phước Lộc. Urang pan akaok Mintri Công an brei thau, tal urak ini, gah công an hu labaih 2.000 urang lin njom COVID-19, dalam nan hu labaih pluh urang lin metai. Bruk padang ngak, ba tame pandar sang iek ruak dã chiến Phước Lộc brei mboh hatai kham merat khik caga suan yava di bhap bini, di gah hu mbaok tame bruk mesruh pacang COVID-19.

Mesup 30/8, Bộ Tư lệnh Quân khu 9 tabiak bruk pajeng 50 tấn kaya nong, pandap mbang alin hadiah brei bhap bini TP.HCM pacang caga jit COVID-19. Tukvak tapa, Quân khu 9 hu 137 mbang radaih pajeng labaih 320 tấn pandap panda, blei saong pablei daong ka rahra 25 tấn kaya nong; daong ka TP.HCM pandap mbang huak dom janih yaom jaik 45 tỉ đồng. Dom urang jakar, urang lin daok hu daong ka bhap bini 5 tỉnh: An Giang, Bạc Liêu, Đồng Tháp, Hậu Giang haong Kiên Giang yuak, mek kaya nong, kaya ikan haong njam patam labaih 75 ha; brei 15 radaih cứu thương haong 32 urang jakar, bác sĩ, điều dưỡng daong ka TP.HCM pacang caga jit tui tacei pato di Mintri Quốc phòng.

Abih tih dom menuac njom COVID-19 di Bình Dương kuhria tal abih harei 29/8 lac labaih 104.000 urang. Tui kuhria, dom menuac njom ruak daok hu rilo jang. Bình Dương brei dui atah tukvak pa-atah di gauk tal 15/9 (oh lac 30/8 yau khan blaoh) saong daok caga ka bruk lac hu tal 150.000 menuac F0 tui kuhria mboh dahlau di UBND tỉnh. Sa kadha njauk uan tabuan lac di Bình Dương dom menuac abih ruak hu tabiak truh sang iek ruak biak glaong. Kuhria tal harei 29/8, hu labaih 55.000 F0 thit abih ruak, hu nao sang, meblah meteh dom menuac njauk ruak dalam tỉnh. Tui Mintri Y tế, dalam 10.749 menuac metai tal harei ini, hu 80% di TP.HCM, patui di nan lac Bình Dương 7,5%, Long An 2,5%...

UBND tỉnh Đồng Nai bahrau hu panuac ieu gah viễn thông pambuak bruk haong dom sở ngành, puk palei peih praong bruk taduan panuac ieu tal Tổng đài 1022 piah langyah samar panuac khan di bhap bini, doanh nghiệp pambuak tal jit ruak COVID-19. Panuac khan gah y tế, ruak kik brei hu langyah dalam 4 mon. UBND tỉnh Đồng Nai jeng brei dui atah tukvak padeih taduan harak gar brei urang ngak negar langiu tame tal abih harei 31/8; daok 7 taneh ia lac Malaysia, Indonesia, Philippines, Thái Lan, Sri Lanka, Nhật Bản, Ấn Độ brei padeih taduan mek harak gar tal abih harei 15/9.

UBND tỉnh Bình Thuận bahrau pasang iek brei ngak Danak dak “Khik ramik saong patagok bruk ngak lan meng kan di urang Cam palei Bình Đức, xã Phan Hiệp, huyện Bắc Bình”. Bruk daok pamoang tal di danak dak lac kham merat patagok dom sang khik bruk ngak lan meng jaik 11% thun 2021 tagok labaih 15% di thun 2030; patagok dom menuac khik bruk ngak lan meng jaik 12% thun 2021 tagok labaih 16% di thun 2030. Gam haong nan, brei rami ramik, pasiam cơ sở hạ tầng palei ngak lan Bình Đức, rik daong peih ngak danak dak padang ngak palei pala bahrau di palei.

Karja rilo labik dalam negar Đức brei thau lac ngak catang jang dom bruk pacang veik ngan saong dom menuac oh klauk vaccine caga COVID-19. Tui nan, taong abih rahra brei hu harak lac klauk caga, dut iek âm tính atau harak lac thit ruak Covid-19 meng hu adat brei tame nhà hàng, sang iek ruak, viện dưỡng lão, hu mbaok tame dom bruk atau pasram pahat dalam sang. Piah jhul patagok bruk klauk jru, Rajaei Đức meda brei padeih pabak dom dut iek COVID-19 oh mek jien meng ini tal harei 11/10 tal.

Reuters harei 30/8 ba panuac di Mỹ, Anh haong dom taneh ia karei brei thau lac taduan hu panuac sanya di Taliban lac taong abih urang negar langiu haong urang Afghanistan hu harak gar hu nao tal dom labik piah tabiak truh Afghanistan dalam siam mekre, salamat, kuhria gam tukvak hadei di harei puac abih Mỹ ba taong abih lin di drei tabiak truh taneh ia ini di harei 31/8. Urang brei panuac di Taliban ndom lac urang daok pasang iek dom labik gah dalam mblang kapal haoh ban ine Kabul piah "taduan mek dalam sron mbon" hadei di tuk Mỹ ba abih lin tabiak truh Afghanistan. 

Trung Quốc bahrau khan lac pala hu siam janih “padai biak praong” glaong tal labaih 2 mét, glaong jang jaik 2 mbang padai karei saong hu năng suất glaong. Janih padai ini hu pala di ban Trùng Khánh angaok taneh praong 10.000 mét vuông, tui kuhria hu yuak di bilan 9 tal. Hu thau, ini lac janih padai diuk hu dalam ia dauk, meda ba mai ginup chất dinh dưỡng ka phun kayau jaik nan, pabak labik daok siam dom janih kaya ikan dalam ia saong athur hu tasau. Meng thun anak tal, yaok rabau mblang hamu di Trùng Khánh meda peih ngak danak dak raong pala ini./.

Urang lang: M. Phuong – 30/08 15:24:28