Phó Thủ tướng Trương Hòa Bình nao rivang brei pandap ka dom amaik, urang joaoh jo di dom tỉnh ban 

Harei 3/2, Phó Thủ tướng Trương Hòa Bình saong kapul ngak bruk Trung ương hu nao ravang, alin 300 paok pandap Tết thun sak kubau ka dom sang bhap bini bangsa takik, sang gaok kan kandah, sang kathaot di tỉnh Sóc Trăng. Yaok paok pandap yaom 1.150.000 đồng. Phó Thủ tướng Trương Hòa Bình jeng hu alain hadaih ka sang bac raong pato uranaih jaoh jo di tỉnh Sóc Trăng; saong hu panuac pok meyaom dom kham marat di sang bac dalam bruk raong pato  uranaih jaoh jo dalam dom thun tapa. Abih tih pandap alin hadiah kuhria tabiak yaom jien lac labaih 356 triệu đồng.

Kapol urang jakar Quân khu 5 kayua Thiếu tướng Trương Thiên Tô, Phó Chính ủy Quân khu 5 ba AKaok kapol nao rivang, tadhau ayuh Tết urang jakar, urang lin, dom baoh sang sarak di huyện bhum glaong Bác Aí, tỉnh Ninh Thuận tuk jiak Tết thun anek sak kubao 2021. Kapol urang hu jao brei 330 paok pandap, yaok paok yaom 500.000 đồng dalam nan hu jien saong dom pandap panda yau brah, mì chính, ia mesrin, menyek mbang, ahar keo ka mikva; alin 2 baoh sang hu yaom 160 trieu đồng saong alin 30 paok pandap yaom 1 trieu đồng ka dom urang lin, gah bol lin tự vệ hu raidiuk kan kandah; jao breo 20 sruh radaih juah yaom 32 trieu đồng ka dom adei anek saih  kan kandah kham merat bac da-a dalam tỉnh.

Harei 4/2, ong Phạm Chí Tâm, Phó akaok Liên đoàn Lao động ban raya Hồ Chí Minh brei thau, kuhria tal tukvak ni dom pakat Công đoàn gam saong doanh nghiệp hu peih bruk nao rivang saong alin labaih 420 ribau paok pandap Tết ka urang ngak, viên chức, urang ngak gaok kan kandah, urang ngak gaok bala tuk ngak bruk, ruak kan kandah; urang ngak bruk lahik bruk kayua doanh nghiệp gaok kan kandah brei ngak sit veik… ngan haong yaom jien abih tih jaik 200 tỷ đồng.

Mentri Công thương brei thau, dom pandap ngak nong di Viet Nam daok gaok kan kandah kayua jit Cobid-19, abih di nyu lac dom janih baoh karaoh, njam patam hu ngak tabiak rilo, tal bilam paik kan pablei tabiak negar langiu jeng yau dalam taneh ia, abih di nyu lac di dom palei hu jit. Piah langyah ka bruk kan kandah nan saong daong mikva urang nong gaok kan kandah kayua jit Covid-19, Mentri Công Thương, Sở Công thương dom tỉnh saong siêu thị praong dalam negar brei pambuak dom đơn vị chức năng dalam bhum palei, peih ngak dom jalan daong pablei pandap panda, brei ginup dom radaih pajeng ba pandap pandar yaok harei duh ka bruk blei pandar di bhap bini hu mbuan sahanang. 

Cục An ninh mạng saong pacang caga kol ngak suan pandar công nghệ glaong, Mintri Công an pambuak haong Công an ban raya HCM bahrau taong yah sa kol ngak ja bằng bác sỹ y khoa, đại học sư phạm. 3 urang medil ngak bruk ni bahrau njauk jabat jaka cap khik ngak ja con dấu, harak gar di jabat, kapul di mangaok không gian mạng hu: Vũ Xuân Nghĩa, (umo 32 thun), Lê Huỳnh Duy Anh, (umo 26 thun); Vương Huỳnh Phát Đạt, (29 thun). Pasang iek sang di 3 urang ni di quận 12 saong Gò Vấp,jabat pasang iek hu cap khik 4 mac komputer hu dom dữ liệu thiết kế, gam haong rilo pandap panda in phôi harak gar ja, ngak con dấu. Dalam 3.600 phôi meng dom janih (Đại học, Cao đẳng, trung cấp chuyên nghiệp, trung học phổ thông) jabat jaka duah mboh rilo bằng bác sỹ y khoa, đại học sư phạm hu in blaoh angan, ka oh payua tal manuac blei.

Xyri ndem lac Ixraen melam kabroi (3/2) taong meng tên lửa tame dom labik quân sự di gah Meraong negar taneh ia ini. Rayo papar binguk karja Xyri ba khaw tin brei thau, bruk taong tame meng tên lửa “đất đối đất saong không đối đất”, hu cuh meng Cao nguyên Gô-lăng labik Ixraen meblah mek.Gah bol lin kapal haok Xyri hu taong cakak jaik abih dom tên lửa nan. Bruk taong tame kayua Ixraen peih ngak ba tal khat lahik trak pandap panda, min biak patuah jamo oh hu thei metai.

Kênh ABC News harei 3/2 ba khau tin pandauk angan brei thau ong Biden dalam adit ni meda ba tabiak pathau khan ka bruk tagok 8 mbang tanut dom urang tị nạn hu adat brei tame negar Mỹ dut saong tuk ong Donald Trump daok ngak. Rajaei dahlau di nan duah jalan patrun dom urang tị nạn tame Mỹ, trun daok 15.000 urang sa thun di tukvak ong Trump padeih ngak. Dalam jalan ngak bahrau, ong Biden kuhria patagok tal tanut 125.000 urang sa thun, tagok 15.000 urang dut saong tanut bo Tổng thống dahlau deih ong Obama hu ngak tuk ong tamat mbang ngak Tong thong. 

Indonesia peih ngak sa danak dak duah thau urang njom virus SARS-CoV-2 ba tal ruak jaln suak yawa Covid-19 meng mac dut iek virus tapa jalan suak yawa. Mac jamriah nan hu ngan “GeNose” pandar công nghệ trí tuệ nhân tạo AI saong điện toán taginum daong dut iek Covid-19 tui tukvak peih ngak.Urang brei bluh tame sa kadung saong brei thau hadei 2 minit GeNose njauk lagaih jang dom bruk mek darah dut iek PCR saong njauk biak ralo dut saong dom jalan dut iek samar karei./.

Urang lang: Thu Thảo -Ái Nghiêm -4/2