Rilo puk palei peih bruk paatah di gauk 

Harei 5/2,  ban sit Đông Triều, tỉnh Quảng Ninh daok peih bruk mek mẫu dut iek ka abih rahra di pak ni ngan haong abih tih labaih 47.000 urang. Tui nan, mban pato tacei pacang caga jit COVID -19 ban sit Đông Triều hu pato tacei dom kapul y tế hu parabha jeng 64 kapul tal dom sang ilamo puk palei, khu phố saong bilai y tế di 8 phường xã  saong dom sang pablei salih di 5 darak ngan haong abih tih 2.300 urang.

Cục pajeng ba meng jalan kapal haok Việt Nam birau hu panuac likau Mentri Jalan mbak pajeng ba brei kadhun tukvak kareik pabah mbang mblang kapal haok Vân Đồn (Quảng Ninh) tal mong 12 harei 21-2 salih ka harei 13-2. Hu thau, Cục pajeng ba meng jalan kapal  haok likau dui atah tukvak kareih pabah mbang mblang kapal haok Vân Đồn kayua UB bhap bini tỉnh hu công điện ka 05 brei pacang cakak ban sit Cái Rồng, huyện Vân Đồn meng 12 tuk harei 30/1 tal 12 tuk harei 21 bilan 2.

Gilang parak kanja dhar ban raya HCM brei thau, yaom lac di thun 2020, kinh tế dunya njauk kan kandah kayua jit Covid-19 min dom jien meng negar langiu payua mai negar tapa dom kapul gilang parak di ban raya HCM mek hu labaih 6 tỷ USD, tagok 12% dut saong thun 2019. Tui nan nyu yam tapa labaih 600 triệu USD duk saong kuhria mboh dahlau di gah jien padai. Dalam nan, jien meng Mỹ payua mai lac biak rilo kayua Mỹ hu rilo urang Việt daok, saong dom urang bhian nao meng dom tỉnh bal gah maraong, abih di nyu nan lac di ban raya HCM.

Meng harei 4 tal harei 10 bilan 2 thun 2021 (lac harei 23 tal harei 29 bilan mat tui sakawa ia bulan) di jalan Nguyễn Khắc Viện, Phú Mỹ Hưng, quận 7, TPHCM (khu Crescent Mall - Hồ Bán Nguyệt), Nyaom darak xuân uan raok Tết Nguyên đán anek sak kubao 2021 meda peih ngak rilo bruk main bui sambai uan raok Tết. Nyaom darak xuân hu 200 labik parang pandap pablei kaya nong, glai, kaya ikan dalam ia; dom pandap công nghiệp, pablei salih, dulich, dom pandap OCOP karei di dom tỉnh, ban,  “ Pandap Viet Nam asar siam glaong”, phun pajaih, bingu kiểng, bonsai, baoh kayau, pandap mbang, ahar kẹo, dom janih pandap, dom pandap blei mbang tết, dom pandap thủ công mỷ nghệ di dom palei ngak meng kan…

Saigon Co.op brei thau, dom labik palei di drei lac Co.opmart, Co.opXtra, Co.op Food, Co.op Smile, Finelife, Sense City, Cheers meda tagok maong peih pambang piah pabak tết meng 2 maong tal 4 maong yaok harei. Tui nan, dom labik pablei di Saigon Co.op meda peih pambang tal maong 11 melam meng urak ni tal harei 29 Tết, harei 30 Tết peih pambang tal maong 12 jala pandiak, padeih di harei 1 bingun 1 tết saong peih pambang veik meng harei 2 bingun 2 tết, daok dom cửa hàng tiện lợi 24/7 Cheers meda peih pambang luac harei melam oh padeih tết. Saigon Co.op brei thau, meng jaik 1.000 labik pablei dalam negar, dom labik pablei ini hu peih dom jalan pacang caga jit, caga pabak pandap panda Tết hu ginup yaom lac hu bruk hagait rah tabiak.

Yaok ribau biến thể birau di virus SARS-CoV-2 hu mboh lac dom anek ruak karei, dalam nan njauk caik hatai hu dom biến thể di Anh, Nam Phi saong Brazil lac meda mbuan njom mbak glaong. Akok mentri gah peih bruk klauk jru vaccin di Anh - Nadhim Zahawi  Zahawi lac, oh lac vaccin urak ini pacang ruak oh siam ngan saong dom biến thể di SARS-CoV-2 di dunya. Yau nan min, taong abih dom hãng jru, meng Pfizer-BioNTech, Moderna tal Oxford-AstraZeneca, daok roh duah dom jalan ngak salih birau vaccine piah caga biến thể  di virus.

Piah daong ka urang Việt Nam daok di Nhật Bản oh mai palei negar hu kayua jit Covid-19, jabat pambuak bruk dunya Nhật Bản (JICA) gam saong dom doanh nghiệp daok taduan urang ngak bruk di negar langiu saong kapul daong manuac urang negar langiu hu peih mbang ginum biai bruk ngak tui jalan online daong ka urang Việt di harei 4-2. Langiu di dom asal kadha pambuak tal bruk ngak, ginum biai daok hu panuac ndem mayai di luật sư atau dom kapul tư nhân ka bruk daong veik saong bruk khik prein yava dalam tuk jit praong rah tabiak. Tui urang lambaok negar Việt Nam di Nhật Bản, kuhria tal puac thun 2020, hu labaih 20.000 urang Việt nao tal Nhật Bản piah bac megru atau pasram ilamo min oh mai palei negar hu kayua dom adat patakik nao mai meng gah Việt Nam. Dalam nan, hu rilo urang lahik bruk ngak kayua jit ruak saong hu caong duah bruk bahrau.

Akok Mentri Pato megru saong Ilamu In-đô-nê-xi-a (Indonesia) birau ini hu ba tabiak sarak tacei pato brei atah klak dom mbang pakacah pakat negar kayua jit Covid-19 dak harei dak rilo. Dom mbang pakacah pakat negar hu salih tapa dom jalan taomg yaom karei tui pakat sang bac. Yau ye, taong yaom bruk bac salah danak dak bac dalam tuk jit praong  tui học bạ, taong yaom hạnh kiểm di anek saih saong bruk ngak bai kiểm tra pakat sang bac. Dom sang bac pato bruk ngak brei ngak dom bài kiểm tra ilamu bruk ngak tui bruk ba tabiak tui bài tập./.

Urang lang : Thu Thảo -Ái Nghiêm -6/2- 6g30