Danak dak bruk ngak negar cak rok patagok kinh te – xã hội bhum urang bangsa takik saong bhum ceik vaktu 2011 – 2030

Harei 6/12, Jabat Rajaei hu harak ka 8894/VPCP-KTTH, brei thau panuac tacei pato di Thủ tướng Rajaei Phạm Minh Chính ka bruk samar ngak salah harak gal piah jao phun jien ka dom Danak dak bruk ngak negar. Jabat Rajaei brei thau piah sumu jao brei phun jien thun 2021 ka dom Danak dak bruk ngak negar, dalam nan hu Danak dak bruk ngak negar cak rok patagok kinh te – xã hội bhum urang bangsa takik saong bhum ceik vaktu 2011 – 2030, Danak dak bruk ngak negar patrun kathaot khang kajap vaktu 2021 -2025, Thủ tướng Rajaei Phạm Minh Chính hu panuac ieu: Mentri Ngak nong saong Patagok palei pala, Mentri Lao động-Thương binh saong Xã hội, Ủy ban Bangsa tui bruk ngak hu jao brei samar pambuak saong dom Mentri: Kế hoạch saong Đầu tư, Jien padai saong dom jabat pambuak tal piah ngak salah dom harak gal di Danak dak bruk ngak negar kayua Mentri, jabat ngak po Danak dak, brei jao phun jien njauk tukvak ka dom Danak dak bruk ngak negar dahlau di harei 15/12/2021.

Anak bruk 5 tỉnh ban lac ban .Cần Thơ dom tỉnh Bà Rịa-Vũng Tàu, Tây Ninh, Sóc Trăng song An Giang hu urang njom COVID-19 song hu menuac metai tagok rilo dalam tuk vak jiak di ni, Akaok mintri Y tế Nguyễn Thanh Long hu panuac ieu dom sang iek ruak di Trung ương brei ba chuyên gia hồi sức hu ilamu nao tal dom tỉnh piah dong iek ruak, peih bruk pato pasram, paglaong ilamu iek ruak ka dom y bác sĩ pak nan. Dalam bruk iek ruak ka urang ruak COVID-19, Akaok mintri Y tế ndom lac, brei parabha urang ruak, urang mbuan si ruak trak, iek ruak tui jalan 3 tal, hu bruk pambuak gauk khang kajap di dom tal. Gam haong nan, dom tỉnh ban khik ramik , tui iek song iek glang F0 di sang biak catang, biak hu ilamu song tuk halei jeng khik hu bruk “y tế brei jiak rahra di abih” tapa bruk padang ngak dom bilai y tế, kapul y tế nao mai.

Urak ini, Ban raya HCM oh ka mboh urang halei njom biến thể Omicron. Piah pacang caga biến chủng Omicron, muk Nguyễn Thị Huỳnh Mai, Chánh văn phòng Sở Y tế Ban raya Hồ Chí Minh brei thau, Sở Y tế pambuak saong Bộ Tư lệnh Ban raya saong Công an Ban raya piah padang ngak bruk y te. Ngan saong bruk nan, dom gah hu jao bruk brei duah thau meng atah, tuk biến chủng tame ban raya, piah hu jalan ngak tui bruk di drei, piah pasamar padam jit. Langiu di nan, dom urang njom Covid-19 kayua biến chủng Omicron meda hu ba tame Sang iek ruak dã chiến ka 12 di ban Thủ Đức, kayua sang iek ruak ini daok atah labik daok di bhap bini, dom y bác sĩ hu pabak tame piah sumu bruk tuk hu rilo urang ruak.

Harei 6/12/2021, Kapul pajeng ba jalan tasik dunya (IMO) peih bruk jao dom giải thưởng song harak meyaom thun 2021 ka dom urang, kapul nyaom , hu rik dong ka gah pajeng ba jalan tasik. Giải thưởng prong abih "Bruk ngak biak jak jeng di angaok tasik" – “IMO Award for Exceptional Bravery at Sea” hu jao brei ka saia Trần Văn Khôi, urang ngak di pasak domng duah urang gaok bala angaok tasik bhum 2 (Đà Nẵng) di pasak pambuak bruk dong duah urang gaok bala angaok tasik Việt Nam - Vietnam MRCC.

Melam 6/12, angaok mblang caoh mbanh Bishan, Singapore, kapol dit blong Việt Nam dit mbang kapol caoh mbanh di Lào 2 baoh dalam mbang caoh akaok meti di bảng B vòng bảng AFF Cup 2020. Janeh Lào, kapol Viet Nam anak meta dang dhi 2 dalam bảng B - AFF Cup 2020. Dalam mbang caoh peih mbaok bảng B, rah tabiak dahlau di nan, kapol Malaysia caoh mbang kapol Campuchia 3-1.

Thủ tướng Campuchia Hun Sen brei thau, meda nao rivang Myanmar song taom gaok Thống tướng Min Aung Hlaing piah ginum biai ka bruk patagok jang talei jum pataom song yasa dalam ASEAN. Dalam angan lac Akaok ASEAN thun 2022, bruk Campuchia peih ngak hu jak jeng dom mbang nyaom ASEAN song hu mbaok ginup di 10 taneh ia halei oh, jeng lac sa dalam dom bruk hu biak rilo urang sangka tal . Kayua yau nan ye, Thủ tướng Campuchia Hun Sen dok kham merat duah dom jalan ngak ka nyu lagaih piah jhul pakhang talei rohim dalam ASEAN, abih di nyu nan lac dalam bruk jhul khang ngoại giao piah mek hu siam mekre ka bruk srau kadau di Myanmar. 

Mỹ khan lac oh brei dom urang ngak praong di rajaei nao tal Thế vận hội bilan brak 2022 di Bắc Kinh-Trung Quốc piah cagar veik dom bruk pambuak tal quyền anek menuac di Trung Quốc. Langiu di nan Mỹ hu khan tal dom taneh ia ayut di drei ka bruk ngak ini di drei saong dom taneh ia nan eng drei sahaneng kuhria, njauk klak Thế vận hội bilan brak 2022 di Bắc Kinh ha-oh. Dom taneh ia karei urak ini jeng daok sahaneng kuhria ka bruk nan.

COVID-19 oh ngak kan kandah tal glaow akaok di anek kama dalam tian. Ni lac bruk hu mboh di sa danak dak bahrau abih di dom urang ilamuĐức, iek tui duah thau angaok dom urang kamei metain njom COVID-19 hajuan song di kreih tuk metain. Dom urang ilamu hu pandar thaok binguk cộng hưởng meng (MRI) anek kama dalam tian hu 28 adit di 33 urang ruak COVID-19 dok metain. Meng bruk thaot MRI, oh mboh hagait ka glaow akaok di anek kama hu amaik njom virus SARS-CoV-2. Dom urang ilamu jeng ndom lac, bruk prong jeng lac kham merat khik ramik piah klah nyaih njom COVID-19 tuk metain./.

Urang lang: Hani Pha – Bhumi – 07/12