Sarak ramik veik dom jalan ngak ka nyu lagaih piah khik salamat, pasang iek hu siam COVID-19

Harei ini (1/10), rilo jalan di TP.HCM hu biak rilo radaih nao mai tuk ban raya brei klaak harak nao jalan, klaak bilai pasang iek saong peih veik rilo bruk, tui jalan siam mekre bahrau. Sarak ramik veik dom jalan ngak ka nyu lagaih piah khik salamat, pasang iek hu siam COVID-19 saong pasiam veik kinh tế-xã hội hu ba tabiak hadei di tuk ban raya 10 triệu menuac rah tapa labaih 120 harei pa-atah di gauk tui rilo tanut catang tagok. Dalam mbang jit ka 4, TP.HCM hu labaih 380.870 urang njom ruak, samu meteh dom menuac ruak dalam taneh ia, daok taong ruak ka 35.000 urang ruak, hu  14.631 urang metai.

UBND tỉnh Bình Dương brei thau, meng harei 1/10, tỉnh brei pacadu bruk pa-atah di gauk tui labik, tui tuk. Bhap bini hu nao mai dalam dom “bhum hijao” dalam tỉnh, min brei klauk ginup 2 mbang vaccine atau 1 mbang ginup 14 harei, F0 thit ruak abih tukvak daok karei; menuac daok di “bhum bhong meriah” tuk nao mai angaok jalan brei hu harak dut iek mboh âm tính, urang ngak meng labik daok tal sang mac meda hu tacei pato karei. Bruk nao mai di dom tỉnh dalam bhum “pandiak” ka jit ruak daok hu ginum biai gac piah njauk gauk jalan ngak. 

Di Bình Phước, UBND tỉnh bahrau tabiak harak brei ramik veik bruk parabha bhum mbuan hu jit COVID-19 dalam tỉnh. Dalam nan, tok hu 2 labik hu mai veik raidiuk siam mekre bahrau lac ban sit Phước Long haong Bình Long. Dalam tỉnh hu 59 xã daok di tanut “siam mekre bahrau”. UBND tỉnh ieu dom sở, ban, ngành, kapul nyaom, UBND dom huyện, ban sit peih dom bruk pacang caga COVID-19 ka nyu lagaih haong yaok xã, phường, ban sit. 

Di mbang ndom biai online haong dom doanh nghiệp, Bí thư Tỉnh ủy Long An brei thau: tỉnh daok kuhria ngak iek pambuak bruk haong dom labik ngak kong padang dom "labik taong ruak COVID-19 dã chiến". Tui nan, dom labik ngak kong hu kaoh tabiak taneh atau nhà kho, nhà xưởng; tỉnh daong menuac saong pandap y tế piah ngak jeng sang iek ruak sit taong ruak COVID-19, tuk doanh nghiệp hu F0 ye hu ba tame ini. Tal urak ini, Long An hu labaih 1.200 doanh nghiệp ngak bruk veik haong labaih 88.000 urang ngak.

Tui Sở pato Megru Bình Thuận, hadei di 2 adit pato bac online, tal urak ini jeng daok 25.000 anek saih THCS haong THPT di bhum atah bayah, bhum urang bangsa takik saong bhum tapen tasik gaok kan kandah ka pandap bac. Gah pato megru daok jak ba rik daong ka danak dak “Riyak haong máy tính ka dom adei”. Anak meta, dom sang bac brei ka anek saih nyim máy tính bảng haong samartphone piah bac. Dom labik kan kandah, 2-3 adei meda bac haong gauk sa baoh máy. Daok pakat tiểu học, gah pato megru Bình Thuận oh ka brei pato online, kayua daok hu jaik 52.000 adei oh hu jamriak piah bac.

Tổng thống Joe Biden hu mbaoh tangin tame danak dak hukum brei pabak kadung jien karja di anak meta piah pacang bruk Rajaei Mỹ kreik pabah mbang kayua kurang jien, hadei di tuk hu Thượng viện haong Hạ viện brei tapa. Danak dak hukum daong ka dom bruk ngak di Rajaei tal abih harei 3/12, dalam nan hu 28 tỷ 600 triệu USD pabak tame daong dom bruk gaok bala meng langik tasik saong 6 tỷ 300 triệu USD kuhria labik daok ka urang tị nạn Afghanistan. Nhà Trắng adit dahlau hu caga ka bruk dom jabat kreik pabah mbang, sa bruk bhian randap tuk kadung jien karja jaik abih.

Bol bala Tajikistan peih bruk duyệt binh di 2 tỉnh jaik Afghanistan di harei 29 saong harei 30/9, dalam tuk bruk daok catang tagok haong Taliban hadei di tuk Tổng thống Tajikistan Emomali Rakhmon oh taduan karja bahrau di Kabul. Cagar veik bruk nan, Taliban hu panuac lac Tajikistan jhui lih tame bruk di Afghanistan saong brei yaok pluh rabau lin nao tal tỉnh Takhar jaik taphia Tajikistan.

Triều Tiên khan lac hu cuh iek tên lửa phòng không "bahrau cakrok", patui rilo mbang ngak iek vũ khí ngak brei dunya suh sah dalam vaktu tapa. Ini lac mbang cuh iek tên lửa mbang ka 2 di Triều Tiên dalam adit ini, saong lac mbang cuh ka 4 kuhria meng bilan 9-2021. Bình Nhưỡng ndom lac dom mbang ngak iek vũ khí piah patagok prein khik caga. Dalam tuk nan, Ngoại trưởng Mỹ Antony Blinken brei thau, dom mbang ngak iek yau nan di Triều Tiên nyu ngak brei srau kadau"./.

Urang lang: M. Phương – 01/10 2:54:17 PM