Tỉnh Long An bahrau brei tabiak panuac lac hu jit dịch tả pabui châu Phi rah tabiak di xã Tân Bình song ban sit Tân Trụ

Harei ini 12/11, Nyaom biai pakat glaong ASEAN mbang ka 37 saong dom nyaom biai pambuak tal rah tabiak di Hà Nội. Thun ini, bruk nan hu peih tabiak tui jalan online meng harei 12 tal 15/11, piah caga jit Covid-19. Tổng Bí thư, Akok negar Nguyễn Phú Trọng hu mbaok di var peih pakak saong brei panuac salam uan nyaom biai. Patui nan lac kadha bac ngan saong rilo asar kadha hu makna dalam di Tổng Bí thư, Akok negar Nguyễn Phú Trọng, Thủ tướng Nguyễn Xuân Phúc hu bac di var peih pakak Nyaom biai pakat glaong ASEAN mbang ka 37 saong dom nyaom biai pambuak tal. Thủ tướng brei thau, Nyaom biai brei tapa rilo tuyên bố hu makna praong yau Tuyên bố pahadar 15 thun tiến trình EAS, Tuyên bố ka bruk pakhang talei pambuak bruk ASEAN+3 dalam paglaong prein ngak kinh tế, jien padai anak dom kan kandah daok tamuh tagok. Abih di nyu lac, dom taneh ia tamat bruk ginum meyai saong mbaoh tangin tame Hiệp định pambuak bruk Kinh tế abih gah di bhum, brei mboh hatai kham merat khang ka bruk tự do pablei salih saong pambuak gauk di ASEAN saong dom gah pambuak bruk. Nyaom biai pakat glaong ASEAN mbang ka 37 lac Nyaom biai pakat glaong mbang puac abih di thun ASEAN kayua Việt Nam dang tabiak peih ngak dalam vaktu dang Akok ASEAN 2020. Nyaom biai lac tuk piah ka ASEAN taong yaom abih dom bruk ngak hu meng pambuak gauk dalam thun, gam bruk dalam ASEAN saong dom bruk haong dom gah pambuak gauk, ba tabiak dom jalan njauk ngak dahlau dalam tukvak anak tal.

Patui danak dak ngak bruk, mesup ni 12/11, Quốc hội ginum biai di tổ ka hukum Tapon nyaom hu mbaok tame khik ramik siam mekre puk palei. Danak dak Hukum hu dom urang QH ginum biai song brei panuac di mbang nyaom ka 48 di Ủy ban Thường vụ Quốc hội song hu Thường trực Ủy ban Quốc phòng song An ninh taong yaom tuk camereip Jeng dalam mesup ni, Quốc hội peih bruk ginum biai, brei tapa dom sarak phê chuẩn bruk pabak urang ngak, lac: Akaok mintri Khoa học song Công nghệ, akaok mintri Y tế, Thống đốc gilang pariak karja Việt Nam, Thẩm phán Tòa án bhap bini tối cao. Hadei di asar kadha ni , dom urang Quốc hội ginum biai pak Hội trường ka danak dak sarak ka bruk padang karja đô thị di ban raya Hồ Chí Minh.

Anak bruk bala meng langik tasik, ribuk ia sua ngak khat lahik trak ka anek manuac saong drap ar di dom tỉnh bhum kreh negar, gilang pariak Vietcombank brei trun jien laba tal 1,0% sa thun ka jien mesre daok tavak urak ini saong brei mesre birau ka doanh nghiệp saong bhap bini di dom tỉnh: Nghệ An, Hà Tĩnh, Quảng Bình, Quảng Trị, Thừa Thiên Huế, Đà Nẵng, Quảng Nam, Quảng Ngãi, Bình Định, Phú Yên. Yau nan, Gilang pariak Ngoại thương Vietcombank lac gilang pariak akaok meti dalam negar, brei trun jien laba piah patui bruk daong doanh nghiệp saong bhap bini dom tỉnh bhum kreh negar. Dahlau di nan, Gilang pariak sarak Karja hu harak iew dom gilang pariak trun jien lab, rami ramik veik tukvak bayar sre piah klak rabha kan kandah saong doanh nghiệp haong bhap bini mesre phun jien di bhum kreh negar.

UBND huyện Tân Trụ, tỉnh Long An bahrau brei tabiak panuac lac hu jit dịch tả pabui châu Phi rah tabiak di xã Tân Bình song ban sit Tân Trụ. Tui nan, sruh jit camereip tamuh tabiak di sang ong Nguyễn Văn Danh, daok di khu phố Bình Hòa, ban sit Tân Trụ .Tong abih tapon pabui di sang ong Danh hu 8 drei. Urak ni, gah ngak nong huyện Tân Trụ, tỉnh Long An dok kham merat peih bruk pruh jru pametai anek ruak, pruh jru di var ro rong glang, labik pablei salih sik ngak. Gam haong nan, gah ngak nong daok am cuh klaak, dar lam pabui ruak piah khik hacih saat môi trường song patrun bruk njom mbak jit ruak tapa dom xã dok veik dalam huyện Tân Trụ, tỉnh Long An.

Daok 3 harei tra, Giải Futsal HDbank vô địch pakat negar 2020 meda peih pakak pakacah di ban Buôn Ma Thuột, tỉnh Đak Lak. Tỉnh ini hu caga blaoh dom labik saong pandap panda siam di abih piah duh ka bruk pakacah giải hu jak jeng. Giải Futsal HDbank vô địch pakat negar 2020 hu 11 kapol tame, peih tabiak meng harei 15 tal 30/11/2020. Taong abih dom mbang pakacah dat blong di giải hu brei thau tapak angaok riyak papar binguk saong papar sap di Rayo sap ndem VN yau: VOVlive.vn, VTC8 saong VFF Chanel.

Bruk srau kadau hu angan Covid-19 jeng dok biak trak damak, yaom lac mboh hu dom siam lagaih ka vắc-xin. Ni lac panuac ndom di Thủ tướng Đức An-giê-la Méc-ken di sa mbang nyaom di rajaei negar ni .Tui muk Méc-ken, Rajaei Đức brei pacang caga jit prong Covid-19 dalam luac bilan liar thun ni song mbang tamuh jit Covid-19 ka 2 dok trak jang mbang tamuh ruak dahlau di nan. Dalam 24 tuk tapa Đức hu 18 ribau 487 urang njom bahrau, glong jang 3 ribau 155 urang dut song sa harei dahlau di nan, dalam tuk urang metai kayua Covid-19 di Đức jeng tagok 261 urang daam abih tih 11 ribau 767 urang.

Harei ini 12/11, sang mac điện hạt nhân Sendai di tỉnh Kagoshima, lac sang mac điện akaok meti di Nhật Bản hu pagam hệ thống pacang caga khủng bố hu peih tabiak pandar. Dahlau di nan, lò phản ứng nan hu brei padeih di bilan 3 kayua daok tavak tavaiy ka dom jalan pacang caga khủng bố, min urak ini hu ngak bruk gilac hadei di tuk dom labaih kurang hu langyah blaoh. Lò phản ứng akaok meti hu sa bilik điều khiển piah caga dom bruk sraw kadau kayua khủng bố atau bala meng kapak haok rah tabiak.

Dalam harei pataom pablei pandap di harei urang oh ka hu duik, hu pasang (11/11) thun ni, gah pablei salih điện tử prong di Trung Quốc Alibaba pablei hu labaih 70 tỉ đô la. Yaom jien pablei pandap ni yau brei mboh bruk daok siam veik di bruk pablei salih di Trung Quốc hadei di jit prong Covid-19 song nyu jeng brei mboh urang blei pandar di Trung Quốc dok pagam pambak tame jang bruk pablei salih điện tử. Harei pataom blei pandap di Harei urang oh ka hu duik, hu pasang di Trung Quốc, hu mong lac harei pataom pablei pandap online prong abih di dunya song bhain laik tame harei 11/11 yaok thun./. 

Urang lang: Ái Nghiêm – Hani Pha – 12/11 15:04:08