Harei ini 20/7, Quoc hoi mbang XV peih Mbang nyaom ka 1. Mbang nyaom ini hu makna biak praong, ba tabiak jalan ngak ka QH mbang XV tuk  palih ruah, pasang iek, brei pabak ginup urang jakar ngak bruk pan kaok ba jalan di dom jabat Karja saong tabiak dom bruk kinh te – xa hoi, jien padai, kadung jien karja, jien buh tame ngak di karja, danak dak pakat negar, piah ngak brei hu tani tanat  bruk peih ngak dalam 5 thun anak tal. Hu 50 urang ngak praong di dom jabat Karja hu Quoc hoi brei palih ruah, ba tame brei pabak di mbang nyaom ini. Ta-eng Rajaei, dalam mbang nyaom ini hu pok ngak 4 Phó Thủ tướng.

Thủ tướng rajaei bahrau patabiak sarak ka 1227/QĐ-TTg brei angan dom bangsa daok gaok rilo kan kandah tukvak 2021 - 2025. Dalam angan nan hu 32 bangsa gaok rilo kan kandah saong 14 bangsa gaok kan kandah karei, diukrai tani tanat jeng puk palei di dom xã bhum III saong dom puk biak kan kandah dalam bhum bangsa takik saong bhum ceik tukvak 2021-2025, dalam 32 bangsa daok gaok rilo kan kandah hu bangsa Cam. Dom bangsa gaok kan kandah karei hu brei angan dalam sarak ni hu mbang tui dom sarak brei ka dom bangsa takik hu biak takik manuac hu patabiak blaoh saong daok tukvak pandar.

Mentri Pato megru brei peih mbang 2 Pakacah tamat Trung học Phổ thông thun 2021 di dom harei  6 saong 7/8/2021 ka dom anek saih oh ka pakacah atau oh ka salah pakacah mbang 1. Mentri Pato megru brei panuac ka UB bahp bini tỉnh tacei pato Sở Pato megru pambuak saong dom sở, dom gah di dom tinh, ban, abih di nyu lac Sở Y tế, peih bruk padang jalan ngak bruk saong sap pagap caga piah peih bruk pakacah mbang 2 hu salamat, tui bruk pacang caga jit, sumu njauk tui bruk ba tabiak brei ka anek saih hu lagaih abih.

Dalam dah page 19/7, TP.HCM hu 40 darak meng kan hu peih pablei veik, saong tal bier harei tagok tal 44 darak, rilo abih lac quận Bình Tân hu 5 darak hu peih pambang veik. Ong Nguyễn Nguyên Phương, Phó Giám đốc Sở Công Thương TP.HCM brei thau, bruk peih pambang veik dom darak meng kan samar jang meda daong patrun patakik menuac ka siêu thị. Bruk pablei salih  urak ni jeng hu ngak tui 2 jalan lac pablei tapak saong pablei online piah paglaong prein pabak pandap panda; brei pablei dahlau tui paok, combo piah patrun tukvak caga saong blei di  bhap bini.

UB bhap bini tỉnh Ninh Thuận brei padeih bruk peih darak kaya nong praong abih di tỉnh piah pasang iek, pacang labik saong duah urang taom gaok manuac rauk piah pacang caga jit Covid-19. Tui nan, darak kaya nong Phan Rang brei padeih dalam 3 harei, meng harei 19/7 – 22/7. Dalam dom harei nan, gah pacang caga jit taong yaom ruak njom mbak, patui bruk duah thau, pacang labik, duah urang taom gaok manuac ruak saong mek mau dut iek ruak piah plaih ruak Covid-19 njom mbak dalam bhap bini.

Tui yaok pataom di Hãng tin Roi-tơ (Reuters, Anh), châu Âu bahrau jeng bhum taneh camriep abih di dunya hu tal 50 triệu urang njom COVID-19, dalam tuk biến thể Đen-ta (Delta) mbuan njom mbak jang daok jhul samar jang bruk njom mbak bahrau yaok harei di bhum taneh ni saong di dunya. Châu Âu daok mboh sa triệu urang njom bahrau hadei di yaok 8 harei saong hu jaik 1 triệu 300 ribau urang metai kuhria meng tuk tamuh jit praong. Châu Âu urak ni jeng daok lac sa dalam dom bhum taneh njauk kan kandah trak damak abih di dunya, meblah tal 27% dom urang njom di dunya saong 31% dom urang metai.    

Pasak pasang iek saong pacang caga jit ruak Mỹ (CDC) haong Mintri Ngoại giao Mỹ brei patagok panuac kakei ka bruk nao mai tal negar Anh tagok tal pakat 4, lac pakat glaong di abih. Panuac kakei nan di pasak ini ndom lac, dom urang njom bahrau di negar Anh tagok biak rilo dalam 1 bilan tapa. Negar Anh hu 50 rabau urang njom bahrau yaok harei dalam adit dahlau, mbang camereip abih kuhria meng bilan 1. Meng bruk di negar Anh urak ini, dom urang hu klauk ginup vaccin jeng meda njom mbak saong pambak tabiak dom biến chủng di virus SARS-CoV-2. Panuac kakei di Mỹ hu ba tabiak hadei di tuk Rajaei Mỹ brei klaak jaik abih dom bruk pacap ngak dahlau daih yau cuk pataih pacang mbaok, daok atah di gauk saong brei takik menuac di dom labik sre.  

Hajan khang dui atah ngak ka 2 binek di ban Hô Luân Bối Nhĩ (Hulunbuir), labik tự trị Nội Mông Cổ talah di bier harei 18/7, ngak kan kandah tal raidiuk di 16 ribau 660 urang. Tui panuac khan meng mintri Thủy lợi Trung Quốc, 2 binek ini ngak tabiak dom danao ia praong 46 triệu m3 ia. Bruk talah binek jeng ngak ka 16.660 urang gaok kan kandah, 22 rabau ha njam patam, 22 tatua khut tayah. Hajan khang meng harei 9/7 ngak ka ia di 14 kraong di tỉnh Tứ Xuyên tagok glaong, ba seik dom sruh gilai saong tatua, ngak brei labaih 4.600 urang njauk panduan nao labik karei./.

Urang lang: Ai Nghiem & Thu Thao