Dom shipper nao mai di dom bhum meriah bhong hu test samar, rilo menuac mboh lac âm tính

Thủ tướng Phạm Minh Chính bahrau padang kapul ngak bruk đặc biệt, kayua Phó Thủ tướng Lê Minh Khái dang akaok kapul, daok phaok akaok kapul lac 3 akaok mintri: Kế hoạch & Đầu tư, Jien padai, Lao động thương binh xã hội. Kapul hu daong ka Rajaei, daong ka Thủ tướng roh duah, tacei pato, pambuak gauk langyah dom bruk praong, bruk di dom gah dalam lang talaih kan kandah ka doanh nghiệp haong rahra gaok kan kandah kayua jit ruak. Gam haong nan, pok tagok Thủ tướng langyah dom bruk samar drah pambuak tal dom bhum, dom gah njauk lang talaih kan kandah.

Harei ini (31/8), dom shipper di TP.HCM hu nao tal dom bilai y tế lưu động piah dut iek COVID-19 oh mek jien saong taduan panuac ieu pajeng ba camereip tuk hu ban raya brei adat ngak bruk veik. Dom shipper nao mai di dom bhum meriah bhong yau: ban Thủ Đức, Quận 8, 12, Gò Vấp, Bình Tân, Bình Thạnh, huyện Bình Chánh, Hóc Môn hu test samar, rilo menuac mboh lac âm tính. Rilo shipper caong lac hu ban raya daong dut iek brei saoh dalam dom adit tal, oh lac daong dalam adit camereip, piah sahanang hatai ngak bruk.

Hadei di tuk taduan hu 1 triệu mbang vaccine Vero Cell di Sinopharm meng TP.HCM, Bình Dương brei peih bruk klauk jru dalam dom harei anak tal, brei klauk dahlau ka dom bhum meriah bhong, abih di nyu lac di labik hu rilo urang ngak hu neh F0 nao taong ruak. Tal urak ini tỉnh hu klauk vaccine ka jaik 1 triệu menuac, dalam nan hu 42.000 menuac hu klauk ginup 2 mbang. Tỉnh caong hu 2 triệu mbang tra meng ginup klauk ka urang umo meng 18 thun tagok. Kuhria tal melam 30/8, Bình Dương hu 110.258 urang njom COVID-19, tok dang hadei ban raya HCM. Tui kuhria mboh dahlau, dalam 2 adit tal, dom menuac njom ruak di tỉnh ini meda tagok tal 150.000 urang.

Mesup ini, UBND tỉnh Bình Thuận hu harak ieu brei dui atah tukvak pa-atah di gauk dalam ban Phan Thiết tui Sarak 16 di Thủ tướng Rajaei mbiah tal abih harei 7/9. Tapa dut iek mboh lac, di Phan Thiết jeng daok hu dom menuac njom bahrau dalam puk palei, dalam labik brei daok karei saong labik pacang veik. Ban Phan Thiết daok patagok bruk dut iek piah brei mboh labik salamat. Kuhria tal biar harei 30/8, Bình Thuận hu 2.236 urang njauk COVID-19, dalam nan Phan Thiết hu 429 urang.

Sở Y tế tỉnh Ninh Thuận mesup ini hu peih bruk mbang ka II brei ka 20 urang halan hatian lac dom y bác sĩ nao daong bruk pacang jit COVID-19 tại Bình Dương. Kapul hu 6 bác sĩ, 3 y sĩ, 10 điều dưỡng haong 1 urang dut iek di dom sang iek ruak, pasak y tế dalam tỉnh. Taong abih jeng hu klauk ginup 2 mbang vaccine pacang COVID-19 saong hu pato pasram ka hồi sức cấp cứu, iek glang urang ruak COVID-19. Dahlau di nan, 20 y bác sĩ di Ninh Thuận jeng hu nao daong pacang jit di TP.HCM.

Hội đồng Bảo an Liên Hiệp quốc bahrau tabiak sarak ieu Taliban khik dom panuac sanya, dalam nan hu bruk tabiak truh Afghanistan dalam salamat,  siam mekre ka dom urang Afghanistan haong dom menuac negar langiu. Bruk ieu padang bhum salamat hu ba tabiak dalam tuk mbuan tamuh tabiak bruk taong tame mblang kapal haoh Kabul, hadei di tuk kol (IS) taong bom gah langiu mblang kapal haoh di melam 26/8, ngak brei labaih 170 urang metai, dalam nan hu 13 lin Mỹ.

Piah peih veik dom sang bac di châu Âu haong châu Á, gru pato haong menuac ngak di sang bac brei daok dalam kapul hu klauk dahlau vaccine caga COVID-19. Ini lac panuac kakei di Gah Y tế dunya haong Kadung jien uraniah Liên hợp quốc ba tabiak. Tui nan, hu panuac ieu dom taneh ia peih bruk klauk vaccine pacang COVID-19 ka uranaih umo meng 12 thun tagok saong dom menuac hu ruak dalam rup. Dom jabat ini jeng ndom tal yaom glaong di bruk pasiam labik sang bac, yau ye ngak brei hu ngin tame tabiak siam jang, brei daok pa-atah di gauk saong brei dut iek COVID-19 rilo jang ka uranaih haong menuac ngak di sang bac.

Danak dak Môi trường Liên hợp quốc brei thau, saman di xăng pha chì tapa blaoh, ini lac sa jayah praong ka prein yava anek menuac haong ka baoh taneh. Tui kuhria, bruk pakauk oh brei pandar janih xăng nan meda pacang caga hu labaih 1 triệu 200 rabau urang metai ranaih, patak pataom ka kinh tế dunya 2.450 tỷ USD yaok thun. Tui dom roh duah, xăng pha chì ba tal ruak baoh hatai, đột quỵ haong ung thư, ngak brei suai bruk patagok di glo akaok. Jaik abih dom taneh ia hu jien mek tame glaong jeng oh brei pandar janih xăng nan meng dom thun 1980./.

Urang lang: M. Phuong – 31/08 16:36:52