Labik halei hu jit brei paatah di gauk chip piah patrun njom mbak dalam bhap bini 

Harei ini 3/6, ala tacei ba di Thu tuong Phạm Minh Chính, Rajaei nyaom bai bilan 5/2021. Urang dang akaok dom tỉnh, ban: Hà Nội, TP.HCM, Bắc Giang, Bắc Ninh hu mbaok tame nyaom biai tapa online pambuak dom labik nan. Tui taong yaom, jit ruak Covid-19 daok hu pasang iek, dom urang ruak dalam bhap bini hu samar duah mboh, samar duah hu dom urang taom gaok, pacang caga labik hu sruh jit ruak, padam jit. Yau nan min, jeng daok rilo kandauk dalam mbuan ba tal tamuh jit ruak, abih di nyu lac di Bắc Giang, TP.HCM, njauk brei pakhang dom jalan ngak pacang caga jit piah samar pacang cakak jit ruak.

Dah page ni (3/6), UBND TP.HCM hu harak ieu salih jalan ngak bruk di jabat kanja piah langaih haong mbang tabung glaong pacang caga jit Covid-19. Dom jabat tok brei meteh dom manuac ngak bruk di dom jabat, daok quận Gò Vấp saong phường Thạnh Lộc, quận 12 dom urang ngak bruk lac 1/3. Ngan haong dom labik ngak bruk đặc thù di UBND, sở, ban, gah di ban saong UBND TP.Thủ Đức, dom labik njauk pathau khan bruk caong hu hadom urang jakar, công chức, urang ngak bruk piah ka UBND ban pasang iek, brei panuac saong brei taduan trách nhiệm ka bruk manuac ngak bruk ngak njom mbak jit ruak di labik ngak bruk.

Sở Y tế tỉnh Long An page ini brei thau 109 urang F1 di urang likei ngak kong njom SARS-CoV-2 ngak bruk di Khu công nghiệp Long Hậu, huyện Cần Giuộc dut iek mboh am tinh; dom urang F2, F3 jeng daok hu pasang iek brei cambaic laic. Meng harei 27/5 mbiah tal ini, Long An hu 10 urang njom ruak SARS-CoV-2 dalam bhap bini di Cần Giuộc, Tân Thạnh, Cần Đước, TP Tân An.

      Dah page 3/6, UBND ban sit Liên Hương, huyện Tuy Phong, tỉnh Bình Thuận brei thau, hu bala plung ia ngak ka dua anek saih metai. Tui nan, kreih pandiak harei 2/6, tuk sa kapul anek saih jak gauk nao manei di kraong Đá Hàn ye hu 2 adei lac anek saih tal 4 sang bac Tiểu học Liên Hương 4 saong anek saih tal 7 sang bac THCS Lê Văn Tám njauk blung ia. Mehit sap preo, bhap bini nduac mai daong min dua adei oh tapa truh. Lambaok karja saong gah pato magru hu nao tal rivang saong klah raba pandik harao haong sang hu manuac njauk bala.

UB bhap bini huyen Bác Aí, tỉnh Ninh Thuận brei thau, biar harei 2/6, hajan praong gam haong hangin ving ngak par tabung 7 baoh sang saong ngak jaleih rilo phun durian, kruac bung kalik hijao, baoh ia tasau, pa-ok…meng 6 tal 8 thun daok brei baoh, ngak khat lahik oh lac takik di bhap bini palei Bạc Rây 2, xã bhum glaong Phước Bình. Hu thau, menuac sia di palei  Bạc Rây 2 rilo meng lac urang bangsa Raglai. Karja palei daok kuhria khat lahik piah hu jalan daong ka mikva.

Di nyaom biai pakat glaong ka bruk daong ka cơ chế COVAX kayua Nhật Bản saong Liên minh GAVI dang peih tabiak, yaok pluh negar di dunya hu sanya rik daong jaik 2 tỷ 4 rituh trieu USD piah peih praong labik pambuak haong vaccine Covid-19 ka dom negar hu jien mek tame bier saong mbaih, patagok tanut daong tagok jaik 9 tỷ 6 rituh trieu USD. COVAX jeng taduan hu sanya daong labaih 132 triệu mbang vaccine. Gilang paraik buh jien tame Châu Âu sanya brei maraiy 1,1 tỷ USD ka danak dak COVAX. Kuhria tal urak ni, COVAX hu parabha 70 triệu mbang vắc-xin Covid-19 ka 126 taneh ia.

Rajaei Thái Lan brei thau taong abih bhap bini negar langiu daok diukrai, ngak bruk di negar ini meda hu klauk jru vaccine pacang cag Covid-19 meng harei 7/6 anak tal. Tui Cục Pasang iek ruak kik – Mentri Y tế Thái Lan, bruk klauk jru ka taong abih urang negar langiu daok diukrai, ngak bruk di Thái Lan hu ngak sa harei haong  danak dak klauk jru taong abih bhap bini di adit anak. Rajaei Thái Lan brei pabak vaccine pacang Covid-19 ka thủ đô Bangkok rilo jang dom tỉnh karei kayua bhap bini rilo saong bruk njom mbak di Covid-19 jeng daok glaong.

Trung Quốc brei padeih dom bruk thể thao yau ye nduac việt dã atau ma-ra-tông dalam tuk daok huac lac oh salamat di dom bruk ni, hadei di bala 21 vận động viên metai di mbang pakacah nduac di tỉnh Cam Túc bahrau ni. Bala nan rahtabiak ngak brei matai lahik trak damak. Hu thau, dahlau di tuk ba tabiak panuac nan, Trung Quốc hu brei padeih atau klaak labaih 60 mbang pakacah nduac marathon saong việt dã di dalam taneh ia ni./.

Urang lang : Thu Thảo -Ái Nghiêm -3/6