Bhap bini bangsa Raglai diuk rai di huyện Thuận Bắc, tỉnh Ninh Thuận

Harei ini 9/11, Quốc hội patui veik bruk tangi sua javap jalei ka bruk peih ngak dom Sarak tui kadha, dom Sarak tangi sua di Quốc hội meng akok mbang 14 jeng yau dom sarak sarak tangi sua di Quốc hội mbang 13. Bruk di dom urang dalam Rajaei saong bruk ngak tui panuac sanya anak Quốc hội, anak cử tri saong bhap bini lac bruk hu dom urang Quốc hội biak caik hatai sangka,abih di nyu lac tukvak hu makna dalam, jaik yam tapa vaktu mbang hadei. Y Kut Nie, Phaok akaok kapol Quốc hội tỉnh Đắc Lắc brei thau: Tukvak salih tapa di 2 vaktu ngak bruk, tuk halei jeng hu bruk patui veik, hu bruk tacei ba ha sa jalan ngak bruk yau gauk meng Trung ương tal dom pakat karja. Bruk di dom urang Quốc hội brei tui iek dom bruk hu tangi sua blaoh.

Công ty cổ phần Thủy điện Rào Trăng 3, (tỉnh Thừa Thiên -Huế) hu pambuak bruk song dom kapul nyaom, jabat, peih bruk dong duah dom urang dok lahik; batabiak dom jalan daong 17 boh sang hu urang metai, lahik di danak dak. Tui nan, Công ty ni bayar tong abih jien ngak ndam metai song dong 100 triệu đồng ka dom boh sang hu urang njauk bala. Dong ka sang hu urang gaok bala hu anek sit umo ala 18 thun yaom jien 1,5 triệu đồng/sa bilan/sa urang mbiah tal umo 18 thun. Dong ka boh sang hu urang gaok bala hu amaik ame umo labaih 60 thun, yaom jien 1,5 triệu đồng/sa urang yaok bilan mbiah tal tuk metai. Urak ni, gah chức năng bahrau duah hu 5 menuac metai, daok lahik 12 urang.

Hadei di 2 harei padeih bruk duah urang gaok bala kayua langik oh lagaih, harei kabroi 8/11, dom urang ngak bruk daok peih veik bruk duah dom urang lahik di Trà Leng, huyện Nam Trà My, tỉnh Quảng Nam. Dom gah ngak bruk nan lac: Bol lin Biên phòng Quảng Nam, Lữ đoàn Công binh 270 (Quân khu V) saong kapul di karja palei parabha jeng dua gah piah duah di kraong Leng saong dalam binek thủy điện sông Tranh 2. Ia sua ngak glut jaleih biak trak di palei 1, Trà Leng, huyện Nam Trà My lam kateik 11 baoh sang, 55 urang njauk bala. Mbiah tal urak ini, gah chức năng daong hu 33 urang klah di metai, 9 urang metai, 13 urang oh ka duah mboh.

Kayua hoàn lưu di ribuk 12 pambuak song langik liar yau nan ye meng beir harei ni 9-11 tal 12-11, bhum tasik langui dom tỉnh meng Quảng Ngãi tal Ninh Thuận hu hajan ribuk ; hangik khang tagok pakat 6-7, bhum jiak pasak ribuk nao tapa pakat 8-9, handaok pakat 11, tasik hu riyak biak khang. Di dom tỉnh meng Quảng Trị tal gah barak Khánh Hòa hu hajan khang tal biak khang.

Huyện Thuận Bắc, tỉnh Ninh Thuận hu 6 xã, dalam nan hu 5 xã lac bhum kan kandah, jaik 70 % bhap bini bangsa Raglai saong Cam diuk rai, bruk ngak mbang kinh tế ralo meng lac ngak hamu ngak apuh raong glang, yau nan ye raidiuk bhap bini daok rilo kan kandah. Piah phun jien di Gilang pariak sarak karja yau prein khang jhul bruk ngak mbang cak rok patagok di palei, tukvak tapa, Gilang pariak sarak karja dhar huyện Ninh Thuận, peih ngak rilo jalan palagaih piah paglaong bruk brei phun jien mesre, pabak sumu bruk mere phun jien di urang kathaot saong dom urang di sarak karaj dalam huyện. Urak ini, Gilang pariak sarak huyện daok peih ngak 15 danak dak brei mesre. Dalam 9 bilan thun 2020, jien brei mesre lac 66.870 triệu đồng, ngan saong 1.714 urang mesre, dalam nan hu 6.755 baoh sang kathaot, jaik kathaot saong dom urang di sarak karaj karei daok tavak jien mesre.

Dalam dom bruk di adit Nyaom biai pakat glong ASEAN mbang ka 37, mesup ni rah tabiak Nyaom biai Ủy ban ginum biai pablei salih Hiệp định pambuak gauk gah Kinh tế tong abih gah dalam bhum (RCEP) di ASEAN . Ni lac nyaom biai caga ka nyaom biai pakat glong ASEAN mbang ka 37 peih tabiak meng harei 12 tal harei 15 bilan 11 ini. Di nyaom biai dom negar tui kuhria ginum biai dom bruk dok kandong veik, tamat bruk pasang iek gah hukum panuac caga ka bruk mbaoh tangin tame Hiệp định RCEP di nyaom biai mbang ka 37 tui njauk bruk batabiak.

Truyền thông Mỹ brei thau urang gah Dân chủ Joe Biden lac Tổng thống bahrau di Mỹ yaom lac bruk nan oh ka tamat di mbang palih ruah thun 2020. Dalam tuk bruk kuhria iek phiếu oh ka blaoh, bruk jao bruk ngak hadei mbang palih ruah di Mỹ thun 2020 daok jeng bruk hu rilo urang caik hatai hadei di tuk hu rilo bruk mboh suh sah lac Tổng thống Donald Trump oh mbuan taduan lah bruk palih ruah bo ong sahanneg lac hu rilo bleik saleih dalam nan.

Takik di abih 11 urang metai song 8 urang karei njauk rambuac dalam sa mbang tong khủng bố mong tame sa labik bol lin bala di gah pai ban ine Baghdad di Irắc. dalam dom urang metai song njauk rambuac hu rilo urang lin . Urak ni bol lin song cảnh sát dok peih bruk pasang iek duah khol tong tame nan.Yaom lac hu tabiak panuac khan lac jayah kol (IS), min, di Irắc urak ni dok rilo khol khủng bố di kapul ni nuac dauk song bhian peih dom mbang tong sit sot mong tame gah an ninh./.

Urang lang: Ái Nghiêm – Hani Pha – 09/11 10:31:14