Đại hội đồng Liên nghị viện ASEAN mbang ka 41 (AIPA 41) ngak bruk harei puac abih

Harei ni, 10-9, mbang nyaom ka 48 di  Ủy ban Thường vụ Quốc hội (UBTVQH) hu peih pakak song dui atah  tal harei  18-9.Tui kuhria, dalam mbang nyaom ni, UBTVQH hu pasang iek, brei panuac ka 5 danak dak hukum lac:  Hukum pasiam veik, pabak dom paka di hukum  Công đoàn; Hukum gah hu mbaok tame khik caga an ninh, trật tự di puk palei; Hukum pacang cag jru phiel (pasiam veik); Hukum pajeng ba  (pasiam veik); Hukum khik caga siam mekre salamat bruk nao mai angaok jalan. UBTVQH jeng hu ginum biai rilo pathau khan dalam gah tư pháp. Bruk peih ngak dom hukum  di  Bộ luật Tố tụng hình sự thun 2015 jeng lac sa dalam dom bruk hu jabat  thường trực di Quốc hội brei panuac dalam mbang nyaom.

Jeng dalam harei ini, Đại hội đồng Liên nghị viện ASEAN mbang ka 41 (AIPA 41) ngak bruk harei puac abih. Tui danak dak ngak bruk, Đại hội đồng AIPA 41 brei peih var ginum biai abih gauk mbang ka 2, hadei di nan ngak adat tamat saong peih họp mbao dalam taneh ia saong dunya ka bruk ngak hu di Đại hội đồng AIPA 41. Ini lac mbang akok meti dalam sajarah AIPA, sa mbang Đại hội đồng hu peih ngak tui jalan online piah gam lagaih haong dom bruk rah tabiak srau kadau di jit Covid-19, gam pabak caong khin sumu bruk ginum biai dom jalan pambuak gauk di nghị viện dom taneh ia brei patagok bruk ngak di Nghị viện, lambaok ka sap ndem di bhap bini, daong ka Rajaei dom taneh ia ASEAN patui ngak dom bruk dak padang Dom taneh ia ASEAN mek bhap bini ngak pasak. 

Ban Thường trực Ủy ban Mt negar  Việt Nam tỉnh Sóc Trăng hu peih nyaom biai pato pasram, pathau khan adat hukum ka labaih 350 urang pan bruk agama song urang hu angan je dalam  tỉnh Sóc Trăng.Di nyaom biai, hu pathau khan dom asar kadha praong dalam dom sarak hukum di  Đảng song karja ngan song bangsa takik, agama dok dalam  tỉnh  yau ye: Kết luận 65 di mintri  Chính trị, Sarak ka 88 di Quốc hội ka Phê duyệt danak dak patagok  kinh tế - xã hội bhum bangsa takik song bhum ceik  tuk vak  2021-2030, Hukum Adat agama; Hukum  An ninh mạng…

Harei kabroi, dalam harei camereip peih bruk ka bhap bini duah jeik bau urang metai njauk lahik di baha Kỳ Quang 2 hu 101 baoh sang duah mboh jeik bau gauk gar di drei. Baha Kỳ Quang 2 khik piah 883 jeik bau, dalam nan hu 473 jeik bau oh daok angan je, oh hu thaot bingu. Urak ini, bruk brei ka urang trun lubang duah jeik bau hu baha peih ngak tal tuk halei oh thei khin duah tra. Hadei di nan, baha brei da-a taong abih mai duah thau hatai sahaneng, caong khin di mikva piah  ngak pasiam bruk nan, jeng yau ba tabiak jalan langyah dom jeik bau oh ka thau angan.  

Harei ini, gah cảnh sát pasang iek, Công an ban sit Cai Lậy tabiak harak khởi tố vụ án, khởi tố bị can song chap kreih  Trần Minh Luân (umo 32 thun, dok di xã Tân Phú, ban  Cai Lậy, tỉnh Tiền Giang) piah pasang iek duah thau bruk "blah mek drap ar".Tui duah thau mbang camereip, meng akaok thun  2019, Luân duah laik phone di dom po radeih pajeng ba urang ngak pataok di  xã Tân Phú, ban  Cai Lậy, tỉnh Tiền Giang piah ndok jien "bảo kê", meyah oh yar jien ye nyu jan radeih. Dom po radeih huac nan ye yar ka Luân yaok bilan 300.000 đồng. Kuhria tal tuk chap, Luân meblah mek di dom po radeih  labaih 10 triệu đồng.

Công ty jru AstraZeneca harei 9/9 brei thau lac brei padeih bruk ngak iek di dunya, dalam nan hu dom bruk ngak iek praong di tukvak puac abih ngan saong vaccin caga ruak Covid-19 kayua hu sa urang brei klauk iek jru njauk ruak oh ka thau cambaic laic kayua meng halei. Vaccine pacang ruak Covid-19 kayua công ty di Anh saong Thụy Điển pambuak bruk saong Đại học Oxford roh duah ngak tabiak iek yau sa dalam dom labik ngak vaccin siam abih piah pacang ruak Covid-19. Bruk padeih ngak iek meda ngak trun bruk caong khin  brei klauk jru caga ruak di puac thun.  AstraZeneca khan lac, urang halan hatian brei padeih dom bruk ngak iek piah sa ủy ban karei  pasang iek dữ liệu an toàn jeng yau patakik dom bruk daok kandauk pambak tal bruk ngak iek.

Peih ngak sarak di Tổng thống Donald Trump, harei  9/9, Mintri  Ngoại giao Mỹ brei thau negar ni brei mek veik thị thực brei ka labaih 1.000 sinh viên song urang roh duah lac  urang Trung Quốc. Washington brei thau ni lac dom urang mbuan ba tal srau kadau negar ni. Mintri Ngoại giao Mỹ brei thau cambaih dom anek saih, chuyên gia Trung Quốc di  Mỹ njauk mek veik thị thực tok lac sa binah sit dalam abih tih dom sinh viên song  chuyên gia Trung Quốc mai negar ni bac megru. Mintri ni ndom lac Washington jeng dok taduan dom  sinh viên song dom urang roh duah  "njauk hukum " meng Trung Quốc bo oh pagam tal bol bala Trung Quốc.

Quốc hội bang Nam Ô-xtrây-li-a brei pakauk pandar pandap nhựa pandar sa mbang dalam bang saong hukum birau meda hu ba tame pandar meng thun 2021. Yau nan, Nam Ô-xtrây-li-a hu jeng bang akok meti di Australia ba tabiak hukum pakauk pandar pandap nhựa sa mbang. Hukum hu peih ngak tui tukvak saong salih ka dom pandap siam ka alam moi truong. Dahlau di abih, dom janih to, jam, nding njuk, pandap cavai ia menyum, pa-op caik pandap mbang ngak blaoh atau dom janih ao papaok, tuh sara, mesir brei pakauk, hadei di nan tal dom janih cavan caphe, salao caok pandap saong kadung buh njam patam baoh karaoh./.

Urang lang: Ái Nghiêm – Hani Pha – 10/09 16:58:55