Urang hu ginum biai pak di mbang nyaom

Harei ni 18/10, mbang nyaom ka 3 HĐ bhap bini ban raya HCM mbang X hu peih tabiak saong tui kuhria hu rah tabiak dalam 1 harei mateh.Di mbang nyaom,Thường trực HĐ bhap bini ban raya HCM pathau khan ka bruk ba tabiak saong peih ngak Sarak 97 harei 22-9-2021 ka sarak daong bhap bini gaok kan kandah kayua njauk kan kandah di jit Covid-19 (mbang ka 3); Dalam mbang ngak bruk bier harei ni, urang hu ginum biai di kapul ka bruk buh jien karja tame ngak tukvak 2021-2025; bruk kinh tế-xã hội… Dah page harei paguh 19-10, urang ginum biai, brei tapa Sarak ka bruk kinh tế - xã hội ban raya tal puac thun 2021 saong bruk  manuac ngak bruk di UB bhap bini ban raya HCM.

Tal tuk vak ni, tong abih 106 siêu thị di ban raya  HCM hu peih pablei veik, hu  71 drak pasa meng kan hu adat peih pabah mbang. Min, urang nao drak pasa meng kan  piah blei pandap tapak ka oh rilo  . Dom  siêu thị yau: Saigon Co.op, Satra, Lotte, Bách Hoá Xanh  hu batabiak rilo danak dak  trun yaom  piah pachreih tuai blei.  Yaom pandap mbang di  ban raya .HCM dok tani tanat, hu pandap dok  meteh yaom dut song tuk vak paatah di gauk.Nan lac kayua bruk pajeng ba pandap panda hu mbuan lagaih jang.

Dah page ni (18/10), tỉnh Quảng Bình daok hu hajan khang di rilo labik, hu labik dut mboh tagok tal 565mm. Meng melam kabroi tal dah page ini ia kraong tagok glaong ngak brei dauk rilo labik daok di  bhap bini. Dom bhum palei di tinh ini daok ba bhap bini tabiak truh labik kan kandah. Dom labik njauk ia sua di huyện Quảng Ninh, Lệ Thủy, bhap bini daok ba urang taha, uranaih saong drap ar tagok sang pacang ia sua. Tui kuhria meda ba labaih 65.000 urang daok di bhum tapen tasik, pabhah kraong meyah ia sua mengaok tanut báo động 3. 

Urak ni,di tỉnh Hậu Giang dok labaih 9.000 tấn kaya nong kandong veik, dalam nan, pandap kaya ikan dok kandong labaih  8.700 tấn kayua oh hu urang blei atau blei min takik. Ong Huỳnh Thanh Phong, Yam ndoc Sở Công thương tỉnh Hậu Giang brei thau, dalam tuk paatah di gauk, Sở pambuak bruk dong ka dom doanh nghiệp, HTX pabak pok  Combo song jiak 2.500 tấn kaya nong dom janih, 195 tấn brah, 350.000 boh that, 40 tấn pandap ngak meng ikan.

Manyum alak lac sa bruk bhian randap hu meng lavik mai dalam rahra bhap bini bangsa takik. Tui yaok pataom di Cục Y tế caga (Mintri Y tế), dom urang bangsa takik manyum alak glaong jang dut saong urang Yuan. Tui nan, dom urang likei bangsa Dao lac labaih 80%, bangsa Mường lac labaih 84%; bangsa Tày labaih 85%. Sa dalam dom kanjah jhak mboh cambaih abih saong jaik abih di bruk manyum rilo alak mbia,  lac bala angaok jalan mbak. Dom urang metai kayua bala angaok jalan mbak glaong jang 4 mbang dut saong manuac matai kayua ngak bruk. Dom urang metai kayua bala angaok jalan mbak di likei glaong jang 3 mbang urang kumei.

Tui blah  worldometer.info, dalam 24 tuk tapa, dunya hu labaih  292.000 urang njom COVID-19 song labaih 4.000 urang metai. Toong abih urang ruak meng akaok jit ruak tal ni lac labaih  241 triệu urang, dalam nan jaik 5 triệu urang metai. 3 taneh ia hu urang njom  dalam 24 tuk tapa  glong abih di dunya lac  Anh, Nga và Thổ Nhĩ Kỳ. Jit  COVID-19 di  Nga dok trak tuk urang metai jiak tal tanut  1.000 urang dalam  24 tuk tapa song  glong abih di dunya. Kuhria meng akaok jit prong,Mỹ jeng lac taneh ia hu  urang ruak song metai glong di abih, jaik  46 triệu urang ruak song labaih  744.000 urang metai.

Daam dom bruk ngak piah caga ka bruk diukrai haong Covid-19,harei ni, Australia bahrau brei harak adat pandar sa janih jru bahrau piah taong ruak Covid-19. Ini lac janih jru ka 3 hu Australia brei harak adat piah taong ruak ini. Jru Ronapreve pandar piah taong ruak ka dom urang ruak Covid-19 meng umo 12 thun tagok saong trak takik di nyu lac 40kg. Gam haong nan, jru ini jeng brei adat yau ye sa jalan taong ruak piah pacang caga ka dom urang hu taom gaok haong virus SARS CoV-2 njauk njom ruak Covid-19, dom urang kayua prein yava oh siam oh klauk vaccine caga Covid-19 atau dom urang ka oh klauk vaccine. Min, jru ni hu brei thau lac oh salih hu ka vaccine caga Covid-19.

Tapa duah thau hatai sahneng di menuac sia jiak di ni di Đại học Suan Dusit Rajabhat brei mboh lac rilo urang Thái Lan oh njauk hatai haong bruk peih pambah mbang jalan tapen negar kayua urang huac tuai damuai ba tui  virus tame taneh ia drei song kayua oh ka hu rilo rahra hu klauk vaccine COVID-19. Tui dom urang hu tangi sua, Thái Lan peih pabah mbang ka tuai negar langui meyah labaih  70% urang  Thái Lan hu klauk jru. Yaom lac ban ine Bangkok hu klauk ginup ka labaih  65% urang, min dalam taneh ia, bahrau hu 35% urang Thái Lan hu klauk vaccine ginup./.

Urang lang: Thu Thảo -Hanipha- 18/10