Rilo urang likau vak angan tame klauk iek vacxin 

Thủ tướng Rajaei birau hu Chỉ thị 44 ka bruk patagok dom jalan ngak piah khik ka bruk uan raok Tết thun anek sak Kubao 2021 bui sambai, salamat, patak pataom. Tui nan, caong khin Mentri Công thương pambuak saong dom mentri, dom gah, palei pala brei sap pagap caga dom janih pandap pandar yaok harei, pabak ginup ka bhap bini, oh caik pablei tagok yaom chiat. Jao bruk ka Mentri Y tế brei pakhang bruk pacang caga jit ruak, abih di nyu lac jit ruak Civid-19 saong dom jit ruak ruak karei mbuan tamuh dalam bilan Đông xuân. Bruk cuh phao bingu dalam tuk Tết anek sak Kubao njauk tui bruk ba tabiak di karja, lagaih saong yaok puk palei tui jalan patak pataom, oh mek jien meng kadung di karja.

Harei ni (22/12),di Học viện Quân y hu gac 17 urang dalam 60 urang halan hatain ngak iek tuk vak ka 1 hu klauk vaccine Nanocovax. 3 urang camereip hu kluak iek  vaccine hu tani tanat, mai sang song hu urang jakar  y tế xã, phường tui iek pren yava. Công ty Nanogen brei thau mbang klauk iek 3 tukvak  meda tamat di quý 4/2021 meyah mboh siam lagaih. Hadei di nan, Nanogen meda hu ngak harak gar likau adat   samar ka Nanocovax.

Tòa án bhap bini Ban Hà Nội birau brei ba Akok Mentri Công thương dahlau daih lac  Vũ Huy Hoàng saong 9 urang tabiak langyah di harei 7/1/2021 anak tal, ngan saong duis “ Ngak suan hukum bruk khik iek taneh riya, pandar drap ar Karja ngak khat lahik” saong “ Ngak suan dom hukum ka bruk khik iek taneh riya”. Bruk ngak suan nan rah tabiak di Mentri Công thương saong Ban raya HCM, pambuak tal danak dak padang ngak khách sạn 6 patuk,pasak pablei salih, jabat brei pah ngak bruk di taneh praong 6.080m2 di labik  2-4-6 Hai Bà Trưng, quận 1, ngak palai pajua 2.713 tỷ đồng. 

Mesup  22-12, mBan tacei jalan pacang caga bala meng lagik tasik  song dong duah urang gaok bala tỉnh Bình Thuận brei thau kapan pajeng pandap angan  DONG YANG/10TV (di Sierra Leone) dok paleing, ia tame. Dom urang angaok tapal daok cuh aow phao caga tabiak truh. Urak ni labik rah tabiak bala langik biak jhak, tasik riyah khang, kapan dong duah di tỉnh Bình Thuận oh nao jaik hu. Jabat Ủy ban pakat negar  pacang caga bala,song dong duah urang gaok bala hu ieu kapan gaiy tong chap kaya ikan hu công suất khang dok tong chap angaok tasik jiak labik kapan gaok balal piah samar dong.

Jala pandiak harei ini 22/12, Công an quận Phú Nhuận (TPHCM) brei pacang cakak, duah thau labik patuh di quận ini. Mong 6 tuk harei nan, bhap bini htatuak drei tuk mehit sap patuh di baoh sang labik 88, jalan Nguyễn Trọng Tuyển, phường 15, quận Phú Nhuận. Ini lac kuan pablei pandap mbang tauk angan "Bún Cầu Vồng". Yaom lac oh hagait tal manuac min patuh nan ngak ka baoih sang khut tayak trak.

Dom negar dalam nan hu  Ai-xơ-len, Italia, Hà Lan, Đan Mạch, Séc, Ôxtrâylia bahrau khan ka Gah Y tế dunya (WHO) thau ka bruk labaih  10 urang njom  SARS-CoV-2 janih bahrau  hu duah mboh di Anh, meda njom mbak glong jang tal  70% dut song janih virus ba tal Covid-19. Jiak 30 negar  brei padeih taduan dom urang mai meng  Anh song  Nam Phi – labik tamuh tabiak dom biến thể karei  di SARS-CoV-2, piah pacang cakak jit njom mbak. Hãng bưu chính pakat negar Anh (Royal Mail) brei padeih jao pandap  panda tal tong abih dom negar  châu Âu song rilo negar karei di dunya.

Hadei di rilo bilan plaik njiak bruk patagok dom mbang urang njom mbak ruak, Thái Lan mboh jit ruak Covid-19 tamuh gilac trak di darak Mahachai, lac pasak di gah cong nghiep kaya ikan dalam ia yaom yaok tỷ USD di taneh ia ini. Tal harei 21/12,urang njom ruak tagok labaih 1.000 urang jaik abih lac urang mai meng Myanmar. Urang kumei mboh ruak akok meti di darak Mahachai oh hu nao halei tabiak truh taneh ia saong dom urang jakar daok duah thau ruak njom mbak meng halei mai.

Iraq brei thau, dom urang medil lac ngak suan song urang jakar an ninh bahrau njauk chap khik pagam tal bruk tong tame meng rocket harei 20/12 pamong tame Đại sứ quán Mỹ di Baghdad. Bol lin Iraq brei thau mbang tong nan lac kayua sa nyaom pan phao kraong “dok lingiu rajaei” peih ngak. Dahlau di nan, Đại sứ quán Mỹ di Baghdad njauk tong meng 8 boh rocket,ngak khut dom boh sang song pandap panda./.

 Urang lang: Hanipha- Bhumi - 19:00:00