Sở Y tế Hà Nội brei pandar vaccine Pfizer klauk mbang sa ka uranaih umo meng 15 – 17 thun dok bac daa

Thủ tướng Rajaei Phạm Minh Chính birau mbaoh tangin tame Sarak brei padang 6 kapol pasang iek, pachreih ba, jhul pakhang bruk peih jien padang ngak di karja thun 2021 di dom mentri, jabat pakat negar saong tỉnh, ban. Kapol hu brei bruk pasang iek, pataom iek dom bruk kan kandah, tavak tavaiy; langyah dom kan kandah, tavak tavaiy kayua meng halei dalam tuk peih ngak danak dak ngak meng kadung jien karja, abih di nyu nan lac danak dak pandar phun jien ODA saong mesre phun jien laba lap di dom negar langiu; brei panuac, ba tabiak dom jalan ngak piah jhul pakhang bruk peih brei phun jien meng kadung jien karja, paglong kein laba pandar phun jien.

Harei ni (23/11), Hà Nội peih bruk klauk vaccine pacang Covid-19 ka uranaih meng 15-17 thun. Sở Y tế Hà Nội brei pandar 304.140 mbang vaccine COVID-19 Pfizer hu parabha brei mbang ni piah klauk mbang sa ka uranaih umo meng 15 – 17 thun dok bac daa, duik rai di ban tui jalan klauk meng umo praong trun.

Piah daong bruk brei daok karei, taong ruak ka urang Covid-19 di sang saong tui iek dom F1 daok karei di sang, UB bhap bini ban Cần Thơ birau brei padang 50 kapol jakar y te luu động. Yaok kapol y te lưu động hu 4 urang lac sinh viên Sang bac Đại học Y Dược Cần Thơ. Dom urang nan tame dom kapol y tế lưu động daong ka 83 xã, phường, ban sit tui iek, taong ruak ka urang F0 saong khik iek, brei F1 daok karei di sang.

Tal harei ni di Ban raya HCM hu 180 darak pasa meng kan hu peih pablei veik, urak ni gah công thương jeng dok ba tabiak dom jalan ngak piah dong ka doanh nghiệp, khik tani tanat darak pasa. Tui ong Lê Huỳnh Minh Tú, Phaok Yam ndoc Sở Công thương, Ban raya HCM urak ni hu taong abih dom doanh nghiệp ngak mbang gah padai brah, pandap mbang daok ngak bruk veik haong prein ngak lac 85%, daok dom doanh nghiệp pablei tabiak negar langiu pren ngak hu 100%. Piah dong ka doanh nghiệp dalam tuk vak anak tal, Ban raya HCM hu batabiak sarak 3066 ngan song dom jalan dong ka doanh nghiệp gah mesraiy phun jien, ngak mbang pablei salih, iek glang urang ngak, peih prong darak pasa, pambuak bhum palei.

Hadei di tukvak trun yaom kayua bruk pa-tah di gauk, urak ini yaom hadang di Bến Tre daok tagok glong jang dahlau meng 60.000 -80.000 đồng/kg, abih di nyu lac hadang thẻ takai patih drei praong. Yaom hadang tagok glong nan lac bruk bui sambai ka urang raong di bhum tasik. Tỉnh Bến Tre hu taneh danao raong hadang tasik labaih 35.000 ha, yaok thun mek hu labaih 55.000 tấn. Urak ini, bhap bini daok salih tapa raong hadang tui jalan cong nghe glong tui rilo vaktu, raong hadang tui jalan birau ba mai kein laba glong, kein laba tagok jang rilo mbang dut saong raong hadang tui jalan yau dahlau diah.

Brei panuac di nyaom biai pakat glong abih 30 thun pambuak bruk ASEAN-Trung Quốc rah tabiak tui jalan online, Thủ tướng Campuchia Samdech Hun Sen tong yaom glong dom jak jeng bo 2 gah mek hu dalam 30 thun tapa, rik dong ba mai sron mbon, tani tanat salamad, kaya meda song patagok kinh tế-xã hội ka ASEAN song Trung Quốc. Tui Thủ tướng Hun Sen, ASEAN-Trung Quốc njauk tapa jalan rilo gah piah jhul patagok talei pambuak bruk dalam yaok gah, jang yau langyah tong abih dom cuang kandah tavak tavaiy di bhum song di dunya tui jalan siam mekre salamad song jia tame gauk.

Sa roh duah kayua Gah Lao động Dunya ( ILO) peih ngak brei thau, kan kandah praong bo jit ruak praong Covid-19 ba mai ka gah du lich di châu Á saong Thái Bình Dương. Tui nan, dulich châu Á – Thái Bình Dương having akaok kayua lahik bruk ngak, asar bruk ngak trun saong tagok bruk ngak tui jalan gah langiu. Dalam nan, 5 taneh ia lac Brunei Darussalam, Mông Cổ, Philippines, Thái Lan saong Việt Nam lahik 1,6 trieu bruk ngak pambuak tal dulich. Bruk ini brei mboh lahik bruk ngak di dom gah pambak tal dulich dalam thun 2020 glong jang 4 mbang dut saong dom gah karei.

Tổng thống Belarus Alexander Lukashenko bahrau ni hu panuac ieu Liên minh châu Âu (EU) samar batabiak sarak anak panuac cong taduan 2.000 urang di cư dok gar veik di jalan tapen negar Belarus - Ba Lan. Tổng thống Belarus jeng ndom lac, negar ni oh khin cagar veik song Ba Lan ba tal bruk catang tagok, ngak srau kadau dalam bhum song dok cang panuac javap jalei meng gah Liên minh châu Âu. Urang pal akaok Belarus jeng hu panuac ieu Liên minh châu Âu samar pambuak veik bruk ginum biai piah langyah bruk srau kadau di cư urak ni./.

Urang lang: Hani Pha - Bhumi - 23/11 10:30:00