Mblang kapan haoh dunya Tân Sơn Nhất brei peih jalan E ka tuia damuai lagaih raok radeih công nghệ

Harei ni (25/3), Quốc hội hu ginum biai harak pathau khan ka bruk ngak dalam vaktu 2016-2021 di Tòa án bhap bini pakat glaong di abih, Viện kiểm sát bhap bini pakat glaong di abih. Dalam vaktu tapa, rilo bruk tham nhũng, mbang jien padai biak trak hu pasang iek duah thau, langyah, ba chreih chrai ka menuac sia. Di tuk pasang iek, dom bruk kaoh duas oh njauk trun jaik 55%; dalam tuk langyah di tòa án oh ka mboh urang halei njauk duas suan. Dom urang QH ndom lac, tapa nan brei mboh cambaih dom kham merat di dom jabat tư pháp dalam tuk bruk tagok rilo, praong jang, kan kandah jang saong daok brei ngak siam bruk patrun urang ngak bruk.

Mentri Y tế page harei 25/3 brei thau oh hu thei birau njom ruak nCoV. Dalam 24 tuk tapa hu 19 urang ruak hu taong dhit ruak Covid-19. Tui Danak dak Klauk jru peih praong pakat negar, harei 24/3 hu 1.906 urang hu klauk jru vaccine Covid-19, abih tih urang hu klauk jru tagok tal 39.817 urang. Dom tỉnh Quảng Ninh, Tây Ninh, Đồng Tháp brei peih bruk klauk jru. Yau nan, mbiah tal ini vaccine Covid-19 hu peih ngak vaktu ka 1 di 19 tỉnh, ban dalam negar.

Mblang kapan haoh dunya Tân Sơn Nhất brei peih jalan E ka tuia damuai lagaih raok radeih công nghệ. Anak meta Mblang kapal haoh brei ieu radeih Be ka ôtô raok tuia di jalan ni, tui kuhrai lac meng bilan 4. Hãng brei ba menuac tame ngak, khik caga siam mekre, pasang iek yaom kaoam. Hãng Grab dok caga dom harak gar piah đấu thầu raok tuia di mblang kapan haoh. Sở pajeng ba TPHCM jeng hu panuac ieu patagok radeih buýt peih di mblang kapan haoh song duah jalan padang tatua nao takai atau ngak hầm chui anak mblang kapan haoh dalam negar piah patrun bruk gar jalan.

Gah Cảnh sát pasang iek Công an tỉnh Bình Thuận birau ba tabiak bruk khởi tố, cap kareik Hồ Thị Kim Ngân, daok di Bình Định saong Nguyễn Chí Thắng, daok di Bình Phước, kayua “Pachot pagat meblah drap ar” rah tabiak di Cty CP đầu tư saong patagok taneh riya sang danaok Hưng Thịnh Phát. Hu thau, Thắng hu Yam ndoc Công ty Hưng Thịnh Phát lac Nguyễn Hữu Kha (njauk chap kareik blaoh) ba tame ngak Yam ndoc Dhar kong ty di Phan Thiết, daok Ngân ngak Yam ndoc Dhar kong ty di quận 9, TP.HCM (urak ini lac Ban Thủ Đức). Meng thun 2018, Kha blei taneh ngak nong piah padang 11 danak dak oh hu biak blaoh ieu pablei di angaok mạng. Kuhria abih tih hu 157 tuai blei saong caik jien takai lac 70 tỷ đồng.

Công an tỉnh Long An bahrau ba harak gar tapa VKS piah truy tố 4 urang ka bruk pandar jien ja. Bilan 7-2020, Trần Hồng Hải pandar sa blah jien ja yaom 500.000 đồng piah blei vé số min njauk urang thau chip. Meng panuac khan di Hải, công an chap khik Huỳnh Châu Phú, Tô Văn Ni, Nguyễn Trần Quốc Nhiên song Nguyễn Trà My. Tapa duah thau brei mboh Phú lac urang pal akaok, ye jien ja ka dom urang ni song rilo urang karei di rilo tỉnh ban, tapa mạng xã hội. Abih tih Phú pablei tabiak labaih 482 triệu đồng jien ja. Urak ni, jabat chức năng pataom mek veik hu 91 triệu đồng jien ja ni

Urang dang akaok dom taneh ia Liên minh châu Âu - EU peih bruk ginum bai pakat glaong di abih tapa online dalam dua harei 25/3 saong 26/3. Dalam nan mboh lac bruk brei ngak dahlau praong abih di châu Âu tukvak ini lac jhul pasamar bruk klauk jru vaccine pacang caga Covid-19. Urak ini, jru vaccine di dom taneh ia EU daok hu takik dut saong bruk khin pandar. Langiu di nan, njaom bai pakat glaong di abih EU mbang ini jeng pataom tame ginum biai ka dom bruk kandah gah chính trị urak ini di châu Âu ngan saong rilo taneh ia praong yau Nga, Thổ Nhĩ Kỳ.

Mỹ song dom negar phương Tây dak harei dak ngak catang tagok karja bol bala Myanmar. Liên minh châu Âu (EU) akaok adit ni brei kreih drap ar song oh brei Tư lệnh bol bala Min Aung Hlaing song urang dang akaok bol bala Myanmar tame EU. Bruk nan jeng hu ba tabiak ngak ngan saong 11 urang ngak praong karja bol bala Myanmar. Mỹ jeng daok kuhria taong phạt 2 kapul kayua bol bala Myanmar pasang iek piah cagar veik bruk pajaleih karja saong taong paoh urang trun jalan.

Ngoại trưởng Cuba Bruno Rodriguez brei thau, taneh ia ini dang akaok di dunya ka manuac hu taong dhit ruak Covid-19, meblah 94,4% urang ruak hu dhit. Mbiah tal ini, Cuba taduan hu 68.250 urang njom Covid-19, dalam nan hu 401 mbang urang metai. Cuba kham merat tal bilan 8 brei klauk jru ka labaih 6 triệu bhap bini. Taneh ia ini daok ngak tabiak 5 janih vaccine pacang Covid-19, dalam nan hu 2 janih daok hu klauk iek vaktu ka 3. Meyah ngak hu jak jeng, ini lac dua janih vaccine pacang hu Covid-19 akaok meti di bhum taneh Mỹ Latinh./.

Urang lang: Ái Nghiêm – Hani Pha – 25/05 10:46:07