Patui di danak dak ngak bruk di nyaom roya pakat negar mbang ka XIII, dah page ni 27/1, nyaom roya ngak bruk di Hội trường, ginum biai ka dom sarak di Văn kiện. Dom harak ndom puac hu pataom tame taong yaom, pataom iek veik bruk padang ngak sarak di nyaom roya mbang ka XII pambuak haong bruk taong yaom 35 thun peih bruk salih bahrau, rik panuac tame ka jalan ngak, bruk ngak piah cak rok patagok kinh tế - xã hội dalam 5 thun (2021 - 2025); jalan ba tabiak lac tal thun 2030 saong pamaong tame bruk cak rok patagok taneh ia tal thun 2045. Tui nan, tal thun 2025, Viet Nam kham merat lac taneh ia daok cakrok hu bruk ngak kong tui jalan bahrau, yam tapa tanut jien mek tame bier, thun 2030 lac negar daok patagok hu bruk ngak kong bahrau, jien mek tame glaong, thun 2045 jeng sa negar patagok saong jien mek tame glaong.

  Dom tấn brah pahe Viet Nam akaok meti pablei tame negar Anh tui harak pambuak bruk pablei salih Anh -Việt Nam hu pablei di darak pasar London harei 26/1. 60 tấn brah pahe bingi hu doanh nghiep Long Dan di Anh ba tame meng Vinaseed urak ini hu pablei di dom sieu thi Long Dan ngan saong yaom jien blei rai 15,5 bảng sa pluh kilo brah sumu 465.000 đồng 10 kilo. Urak ini, Anh daok pandar bruk kak je blei brah pahe Jasmin tame 17,4%. Yau nan min, brah pahe Viet Nam pahe bingi ba tame negar Anh oh kak je blei tame, tapa nan brah Viet Nam meriak gauk hu siam saong dom taneh ia karei hu pablei brah tame negar Anh yau Thái Lan. 

Kapul pacang caga jit COVID-19 di Đồn biên phòng Cầu Muống dalam tuk ngak bruk duah mboh, cap khik dua urang saong sa ranaih daok tame negar Việt Nam suan hukum. Peih praong bruk pasang iek, Bộ đội biên phòng Đồng Tháp cap khik dua urang lac Trần Văn Chót (ndik tapui thun 1961) saong Nguyễn Văn Bời (ndik tapui thun 1961) jeng daok di ấp Bình Hòa Hạ, xã Thường Lạc, huyện Hồng Ngự, Đồng Tháp, lac urang peih bruk  ba Vũ Thị Lệ Hằng meng negar langiu tame  suan hukum. Dahlau di nan, kapul jaka huyện Trần Văn Thời (Cà Mau) jeng hu duah mboh 38 urang meng negar langiu tame suan hukum.

Hadei di jaik 2 bilan kareih pabah mbang brei ka abih urang ngak padeih bruk kayua jit ruak Covid-19, urak ini Công ty Giày da Mỹ Phong (Trà Vinh) taduan hu dom harak pambuak bruk ngak pandap birau saong brei iew urang tame ngak bruk. Urak ini, cong ty ini daok palih ruah tame gilac veik hu jaik 1.500 urang tame ngak bruk di 3 phân xưởng saong daok caga palih ruah tame veik 1.400 urang tra dahlau Tết. Puac bilan 11 thun blaoh, kayua jit ruak Covid-19, lahik tuai blei pandap meng negar langiu nan ye kong ty ini brei kareik pabah mbang saong brei abih labaih 12.000 urang ngak padeih bruk.

Daok 2 adit tra meng tal Tết Nguyên đán thun sak kubau 2021, bruk blei pandar di bhap bini daok  tagok glang min kayua njauk kan kandah di COVID-19, yaok ribau urang lahik bruk ngak atau trun maong ngak bruk ngak ka jien mek tame biak bier. Pagam pambak tame bruk ni, dom jalan brei masre jien tapa app, mạng xã hội, phát tờ rơi…daok tagok glaong. Yaom lac hu jabat karja hu rilo mbang kakei saong palai tayah rilo bruk srau kadau, min rilo urang ngak jeng daok laik tame bruk masre jien payar oh abih hu, njauk preo puac, ndok taong paok di kol brei masre.

Harei 26/1, dunya yam tapa tanut biak haduh hatai: Hu 100 trieu urang njom virus SARS-CoV-2 ba tal ruak Covid-19. Dalam nan hu takik di abih lac 2 triệu 140 rabau urang metai. Dalam tuk jit ruak oh ka mboh padeih, yaom lac rilo taneh ia brei klauk jru vaccine Covid-19  peih praong, bruk mboh rilo salih karei di virus SARS-CoV-2 yau Anh, Brazil atau Nam Phi ba tal bruk pacang caga  COVID-19 di dunya gaok kan kandah jang.

Tal urak ni, abih tih dom menuac njom di France tagok tal 3.057.857 urang, dom urang metai lac 73.494 urang. Negar Tây Âu ni urak ni dang ka 6 di dunya ka dom urang njom saong dang ka 7 dom urang metai kayua COVID-19. Dak harei dak hu rilo urang ngak gah y tế jak ba rajaei pandar adat harak pacang cakak mbang ka 3 di France dalam tuk daok peih danak dak klauk jru vaccine. Min, gah truyền thông France brei thau lac Tổng thống Emmanuel Macron daok duah jalan plaik njaik pandar adat pacang cakak. Meng harei 16/1 bahrau blaoh, France hu peih ngak harak adat giới nghiêm dalam takik abih lac 2 adit piah pacang caga bruk njom mbak di jit COVID-19.

  Thiếu tướng Mey Sophea, urang pan akaok Kapol duah palai bom mìn di Pasak Negar khik caga salam hòa bình saong duah palai bom mìn, pandap patuh hadei mesruh metak di Campuchia brei thau, kuhria tal harei kabroi 26/1, dom urang ilamu duah mboh srong tagok labaih 6 tấn bom, mìn saong siuk jru yaok janih di sa sruh gilai karam ala kraong Mokong, di tỉnh Kampong Cham. Gam haong nan, dom urang ilamu jeng duah mboh dom pandap dalam nan hu: tamo pasei, to, quận hiệu di gah bol lin cộng hòa Khmer. Bruk sraong veik gaok biak rilo kan kandah kayua dalam gilai hu rilo gha phun, halam nyol chap ikan saong gluh…min kham merat khik raidiuk hu salamat ka bhap bini, dom urang ilamu brei duah saong ngak hacih bom mìn, pandap patuh ala kraong nan, ngan saong taneh praong labaih 150 ha./.

Urang lang: A.Nghiem –Thu Thao  27/1/2021 16:23:16