Puac adit ni, tui kuhria hu 1 lô AstraZeneca meda tagok tal yaok triệu mbang hu mai tal Việt Nam

“Urang pan akaok dom phường, xã di TP.HCM brei pabak ginup laik phone piah ka rahra ieu tuk kurang mbang, khin cấp cứu”. Panuac nan hu Thủ tướng Phạm Minh Chính, akaok mban tacei jalan pakat negar pacang caga Covid-19 ndom dalam mbang ngak bruk online haong urang pan akaok TP.HCM saong 312 phường xã ka patagok bruk pa-atah di gauk saong dom jalan pacang caga jit dalam ban, biar harei 26/8. Thủ tướng kakei brei peih bruk dut iek samar drah, hu ilamu, siam lagaih ala tacei pato di ban raya, tacei ba di Mintri Y tế, brei ngak dahlau ka urang taha praong thun, urang hu ruak dalam rup...Meda panduan ba meneing rahra tabiak truh dom labik daok piah patrun patakik menuac di dalam sa labik, pandar doanh trại quân đội, sang bac...piah ngak bruk ini.

Harei ni (27/8), mintri  Y tế brei thau, hu 263.000 mbang  vaccine Pfizer, dalam lô 1 triệu mbang kayua  Mỹ dong hu mai tal Việt Nam, tui nan dom vaccine mai tal dalam 2 harei  26 song  27/8 tagok labaih 2,2 triệu mbang. Puac adit ni, tui kuhria hu 1 lô AstraZeneca meda tagok tal yaok triệu mbang hu mai tal Việt Nam. Dalam bialn 9 tal, tui panuac khan hu 9,3 triệu mbang vaccine jeng mai tal, oh kuhria 15 triệu mbang di sa jabat  di  Đồng Nai dok caga blei tame. Dom harei meng bloh, bruk klauk jru daok suai veik, tok hu 300.000-400.000 mbang dalam sa harei, dalam tuk Việt Nam brei klauk meng  500.000 mbang dalam sa harei tagok  meng ngak hu bruk yau hatai caong khin.

Meng harei ni (27/8), Mintri Y tế haong Sở Y tế ban raya HCM meda ba jru pacang virus Molnupiravir tame taong ruak ka dom F0 dalam rahra, dalam sang. Ini lac janih jru hu hãng jru Merck di Mỹ saong Công ty Ridgeback di Đức roh duah cak rok patagok, piah taong ruak Covid-19 ka urang ruak meng hanjuan tal mbiah. Urak ni, asar jru Molnupiravir 400mg kayua Công ty TNHH Liên doanh Stellapharm Việt Nam ngak tabiak. Stella meda pabak labaih 2,3 triệu asar piah taong ruak oh mek jien ka 116.000 F0 dalam rahra daok di ban raya HCM.

Di dom palei hu rilo urang bangsa takik di Bình Phước, karja bhian peih bruk pathau khan ka jalan pacang caga jit ruak tapa  pano, angaok loa papar sap 1 harei papar  sap 3 mbang, 5 asal kadha pathau khan meng sap S’tiêng, Khmer. Dom taha palei hu nao tapak tal dom boh sang piah dong ka rahra thau cambaih jang dom bruk pacang caga jit. Meng nan, urang bangsa takik samar thau ka bruk jit ruak song ngak siam tui dom adat hukum. 

Dua Mintri Công thương saong Mintri Jien padai njauk gauk brei trun yaom dom janih xăng saong manjiek biak rilo duk haong dom mbang trun yaom jaik di ini. E5 RON 92 trun daok 19.891 đồng/lít (trun 607 đồng/lít); xăng RON 95 daok 21.131 đồng/lít (trun 550 đồng/lít); yaom manjiek dầu hỏa daok 14.762 đồng/lít (trun 417 đồng/lít)… Tui dom chuyên gia, bruk brei trun yaom xăng manjiek di 2 Mintri Công thương saong Mintri jien pandai lac kayua njauk kan kandah tapak di jit ruak, gam haong bruk yaom xăng manjiek di dunya trun khang dalam 2 adit tapa.  

Kol ISIS nyu taduan lac nyu ngak dom bruk patuh gah lingiu mblang kapal haoh di ban ine Kabul, Afghanistan, ngak brei 60 urang metai, 140 urang njauk rambus, dalam nan hu dom lin Taliban. Sa urang patuh bom pametai rup eng tame labik hu rilo menuac, blaoh brei patuh jru patuh kak dalam rup. Tui Mintri Quốc phòng Mỹ, 2 mbang taong mbom pamerai rup eng rah tabiak di gah lingiu mblang kapal haoh pakat dunya di Kabul tuk mesup harei 26/8 (tui mon pak nan, ngak brei 12 urang Mỹ metai, 15 urang karei njauk rambus.

Nga hu labaih 800 urang metai kayua Covid-19 dalam 24 mon tapa, lac glaong di abih kuhria meng tuk jit tamuh tabiak. Dom menuac metai kayua Covid-19 di Nga rilo mbang tagok glaong di abih dalam bilan 8. Labik ini urak ini lac bhum jit praong ka 4 di dunya. Meng kreh bilan 6, Nga hu mbang njom mbak bahrau kayua biến chủng Delta. Nga daok gaok kan kandah anak bruk rilo rahra oh jia tame vaccine, ngak ka bruk klauk jru njauk klaih klaoh. Moska, pasak mbang tamuh jit di Nga haong dom labik karei hu tabiak bruk pacap dom menuac nao klauk jru.

Singapore daok klaak bruk "oh Covid" meng bruk brei cadu meneing dom bruk oh brei ngak. Meng bilan 9, Singapore meda brei klaak bruk brei daok karei dom tuai hu klauk blaoh vaccine Covid-19 mai meng Đức haong Brunei. Taneh ia ini jeng brei klaak bruk brei daok karei menuac mai meng Hong Kong saong Macau, yaom lac bruk padang "baoh blong du lịch" Singapore - Hong Kong brei klaak kayua jalan pacang jit karei di gauk./.

Urang lang: Hani Pha – Thu Thao – 27/08 10:24:38