Harei ni 29-1, dalam harei ngak bruk ka 4, nyaom roya XIII di Đảng daok patui bruk pilih urang ngak bruk. Dom harei tapa, nyaom roya XIII di Đảng drei daok hu taduan rilo thư, điện tadhau ayuh di dom đảng, dom kapul ngoại giao saong dom negar saabat dunya di grauk labik. Dalam Điện tadhau yuh di Đảng Cộng sản Liên bang Nga hu ndem lac: “ala bruk pan akaok di Đảng Cộng sản Việt Nam, taneh ia khang takai yam nao tui jalan roh duah bahrau, mek hu dom jak jeng siam makre, ba Việt Nam jeng sa dalam dom negar hu kinh tế patagok siam abih di dunya saong mek hu angan je glaong di dunya”.

Anak bruk jit Covid-19 daok rah dalam sraw kadau gilac veik, Vietnam Airlines Group (dalam nan hu  Vietnam Airlines, Pacific Airlines saong VASCO) samar brei ngak catang dom jalan pacang caga jit di taong abih kapal haok. Ngan saong dom kapal haok pajeng tuai mai meng Hải Phòng, Vietnam Airlines brei paglaong bruk pacang caga jit meng tanut 1 tagok tal tanut  3 meng kreh melam 29/1/2021. Tui nan, langiu di dut nhiệt độ, khan brei thau y tế, taong abih tuai damuai ndik kapal haok brei cuh pataik pacang pabah idung, brei daok atah di gauk. Dom mbang par meng Hải Phòng oh brei mbang huak, tok brei menyum ia. Siuk uak tangin sat khuẩn hu Vietnam Airlinesbrei ka taong abih urang tuai pandar. Ngan saong urang ngak bruk di mbaok taneh, kapol urang nao gam dom mbang kapal haok  par meng Hải Phòng, Vietnam Airline jeng hu brei khan ao y tế pacang rup.

Pambuak tal dom urang njom COVID-19 dalam rahra bahrau hu duah mboh, Mintri Y tế tabiak pathau khan samar drak ka 28 ieu kakei dom urang nao tal 31 labik di Hải Dương, Hải Phòng, Quảng Ninh, Hà Nội njauk pathau chip haong dom jabat y tế jaik di abih piah hu tacei pato saong daong pacang caga jit COVID-19.

Hadei tuk thau xã Lâm Thao, huyện Lương Tài, tỉnh Bắc Ninh lac labik daok di urang ruak COVID-19 ka 1565 birau hu Mentri Y tế Brei thau, melam 28/1, UB bhap bini tỉnh Bắc Ninh tacei pato brei ngak tui jalan pa-atah di gauk abih gauk dalam xã nan dalam 21 harei, meng kreh melam 29/1. Urang ruak ka 1565 lac urang F1 taom gaok urang ruak 1552 daok di Hải Dương. Bắc Ninh brei padeih bruk peih ngak dom rija roya dalam tỉnh; kakei bhap bini takik nao ma-in Xuân, padeih dom bruk parang iek nghệ thuật, ilamu, padhih the thao, uan umo thun praong, bruk main sambai dui pachreih rilo menuac dalam tỉnh.

Bắc Bình lac huyện hu rilo bhap bini bangsa takik di tỉnh Bình Thuận ngan haong 18 bangsa daok jaik taphia gauk, meblah jaik 37% menuac sia dalam huyện. Dom thun tapa, dom sarak daong di Đảng saong kanja ngan haong bhap bini bangsa takik, bhum biak kan kandah, abih di nyu nan lac sarak ka 24 di Ban Chấp hành Trung ương Đảng (mbang IX) saong dom sarak di Tỉnh ủy Bình Thuận ka bruk “patagok abih gah dân sinh kinh tế, xã hội bhum bangsa takik” hu peih ngak siam lagaih. Meng nan, bruk bhap bini, kinh tế - xã hội bhum bangsa takik di Bắc Bình salih mboh meta biak siam lagaih. Tal urak ni, huyện hu 98% baoh sang hu ginup điện, ia pandar, 100% dom xã bhum bangsa takik, bhum ceik hu dom dịch vụ sangka prein yava; taong abih 9 xã jeng mek hu chuẩn pakat negar di y tế… Taphia di nan, huyện Bắc Bình jeng hu peih ngak siam dom sarak ka taneh daok, taneh pala drak, ba mai kein lab aka bhap bini, jhul samar bruk pala drak, paglaong jien mek tame, yam tagok tabiak truh kathaot khang kajap. Langiiu di nan, bruk khik ramik saong cak rok patagok dom yaom ilamo dom harei roya adat cambat meng kan, khik ramik sap ndem, akhar vak di dom bangsa takik jeng hu dom pakat, dom gah di Bắc Bình sangka, paglaong. Tapa nan, jaik abih dom bangsa takik dalam huyện jeng hu khik ramik, ndem sap bangsa di drei .

Ủy ban châu Âu (EC) harei kabroi 28/1 brei kadun tukvak “Bruk daong karja hu tukvak” tal puac thun 2021 piah ba mbuan lagaih ka dom taneh ia di EC peih ngak dom jalan daong dom doanh nghiep gaok kan kandah kayua jit ruak. Dahlau di tuk jit rah tabiak, dom paok jien daong nan hu Ủy ban châu Âu brei takik, piah khik bruk meriak sumu gauk saong oh daong ka doanh nghiep ngak mbang khat.

Ceik pui Merapi di Indonesia, sa dalam dom ceik pui khang abih di dunya, daok pruh thak saong mbau praong. Tui CNN, ceik pui Merapi pruh tabiak dom mbaik bau pandiak labaih 30 mbang dalam harei 27-1. Urang maong mboh dung nham bong mariak sraiy trun meng cambuai ceik pui dalam dom harei jaik di ni. Mbang pruh pui praong abih jaik di ni di ceik pui Merapi lac di thun 2010, ngak ka labaih 300 urang metai, labaih 280.000 urang di labik vil val njauk kaduan nao labik karei.

Bắc Kinh peih ngak dom bruk quân sự di labik jaik kaoh pulao Đài Loan, ba yaok pluh mbang par kapal haok mesruh saong plaik bom di harei camreip ong Biden tagok rai Tổng thống. Tuk tangi ka dom bruk ngak di bol lin kapal haok Trung Quốc  jaik Đài Loan, urang brei panuac  Ngô Khiêm di Bộ Quốc phòng Trung Quốc lac pulao Đài Loan nan lac sa binah oh brei atah di Trung Quốc.Bruk ngak nan hu urang gah pasang iek sahaneng lac yau bruk ngak iek di Bắc Kinh ngan saong karja birau di Washington. Gah Mỹ hadei di nan hu panuac ieu Đài Loan saber, iew Trung Quốc padeih dom bruk ngak kateik ghiek  tagok Đài Bắc./.

Urang lang: Thu Thao -Ai Nghiem  29/1/2021 16:06:15