Hệ thống loa papar sap di phường, xã 

Ngan haong ong Nguyễn Đình Đạt daok di xã An Quý, huyện Quỳnh Phụ, tỉnh Thái Bình, sap bhian randap, anit ranam di loa phát thanh 5h30 yaok dah page yau ye sap ayut ieu ong tagok ka sa harei ngak bruk bharau ngan saong dom khau tin biak kein, lagaih. Bruk ong A daok di jhung palei oh ka thau jum pataom haong puk paga, caik rah tabiak bruk meriak gauk, tal bruk harei paguh sang iek ruak tỉnh mai iek ruak meta ka urang taha, brei vitamin A ka uraniah.....Dalam sang, ong meda puh ramik sang danaok, brei menuk ada mbang, bo daok thau hu bruk di puk palei: “Dom pluh thun paje dahlak jeng daok pang loa di palei dahlak. Tuk brei thau ka harei li-ua, harei tam, darak, tuk brei thau ka halak halin palai kaik phun padai, hu tuk hu kadha vak brei thau ka prein khang di huyện, atau urang ngak mbang, pala drak naih joi piah ka kol dahlak bac megru, ngak tui, atau ka bruk jit ruak yau harei ini. Meda lac nyu biak siam lagaih, kein laba.”

Oh ta-eng hagait di dom bhum palei, pak di ban ine Hà Nội, dalam dom harei ini, mikva dân phố, dom sang pablei salih bhian tui pang khau tin di dom đài truyền thanh xã, phường brei thau ka jit ruak Covid-19. Dalam tuk angaok mạng biak srau kadau, ye khau tin dom dom baoh loa phường, xã lac khau tin njauk caik hatai jia di bhap bini. Amuk Trần Thị Tuyết, pablei pandap di labik sang 193, đê Trần Khát Chân, quận Hai Bà Trưng brei thau: “Loa ini, bhap bini yau kol dahlak takik daok di sang ye daok pak ini jeng thau ka jit ruak, thau ka bruk di phường. Urang khan brei drei thau tal labik, drei pang hu, drei thau hu. Dah page kol dahlak ramik pandap tabiak pablei di maong 6 jeng hu pang.”

Hu vaktu urang var nao bruk kein lagaih di loa phường, mboh yau loa phường tal tuk padeih. Salih tame nan, urang ngak iek bảng thông tin điện tử di dom labik hu rilo menuac nao mai saong nhắn tin brei thau tal dom phone tangin piah salih ka loa phường. Min anak meta mboh lac, dom baoh loa phường jeng daok lac jalan brei thau siam di abih, samar di abih tal bol bhap rahra. Kadha ini hu dom pakat karja ban raya mboh hu. Ong Vũ Ngọc Phụng, akaok UB bhap bini quận Hà Đông brei thau, dalam jit ruak kayua Covid-19, quận hu pathau khan tapa dom blah tờ rơi saong tapa dom loa papar sap di phừờng, min dom loa papar sap mboh hu kein lagaih khang jang: “Lac 1 dalam dom quận hu đài truyền thanh di phường, đài truyền thanh di quận. Quận Hà Đông hu 340 loa, tapa nan hu daong biak siam ka bruk pathau khan pacang caga jit kayua anek ruak corona. Bruk pathau khan angaok loa niak siam, kayua lac nyu hu tame tal tanye di yaok urang dalama quận, urang pang hu, thau hu.”  

Yaok harei, dom panuac khan ka vaktu klauk jru pacang caga ruak, bayar jienlương hưu, khám tuyển nghĩa vụ quân sự, mek jien je taneh, vaktu cakak điện, cakak ia, bhap bini jeng thau tapa loa phường. Yaom lac angaok blah web di dom công ty pabak điện, ia jeng khan brei thau, min oh njauk lac thei jeng hu tukvak piah bac, abih di nyu lac dom menuac daok jar var bruk hit, bruk ngak mbang duah jien…

Ngan haong rilo bhap bini, baoh loa phường, loa xã lac biak kein lagaih, saong tapa nan daok brei mboh ka 1 saman oh ka suai lavik, kak kajap hatai anit ranam haong puk paga, atau labik phố thị văn minh./.

Urang lang: Musa Phương - 13/2