Harei pataom phim pachreih hu 40 jabat song 127 kadha, dalam nan hu phim truyện, phim tài liệu, phim khoa học, phim hoạt hình

Thủ tướng Phạm Minh Chính tacei pato brei peih ngak siam bruk klauk vaccine caga COVID-19, kham marat tal puac thun 2021 klauk 2 mbang hu ginup abih ka urang umo meng 18 thun tagok saong ranaih meng umo 12 thun tal 17 hun hu klauk takik di nyu 1 mbang vaccine.

Harei pataom Phim Việt Nam mbang ka XXII ngan song kadha "Dak padang công nghiệp điện ảnh Việt Nam bak ilamu bangsa, salih bahrau song siam gheih " hu peih tabiak di harei 18/11 di ban Huế. Harei pataom phim pachreih hu 40 jabat song 127 kadha, dalam nan hu phim truyện, phim tài liệu, phim khoa học, phim hoạt hình. Tui tong yaom meng mban peih bruk, dom kadha hu mbaok tame harei pataom phim thun ni hu salih bahrau meng số lượng song chất lượng. Dalam nan, 92 phim ba tame pakacah song 35 phim hu parang iek dalam danak dak. Ndom ka giải thưởng, langiu di dom giải thưởng yau bhian randap, mbang camereip mban peih bruk hu jao 2 giải thưởng bahrau, nan lac: Giải Kỹ xảo phim truyện điện ảnh gheih ghang song Giải Đạo diễn phim truyện camereip abih biak gheih.  

Kapul Kinh tế - Quốc phòng 778 (Quân khu 7) pambuak haong karja huyện Bù Gia Mập, tỉnh Bình Phước bahrau peih bruk iek ruak, brei jru oh mek jien saong alin hadaih pandap ka bhap bini bangsa takik dok di labik tapen negar njauk kan kandah kayua jit COVID-19. Kapul gam haong dom urang ngak pahla daong peih bruk iek ruak, brei jru, alin hadaih pandap ka 150 baoh sang sarak kanja, sang kan kathaot, sang bhap bini bangsa takik daok di palei Bù Gia Phúc 2 (xã Phú Nghĩa) saong palei Đắk U (xã Đắk Ơ).

Urak ni, rilo công ty du lịch dok di ban raya.HCM dok hu danak dak patrun yaom biak rilo ka tuai tuk Tết 2022, cong khin gah du lịch hu pasiam veik, hadei di tuk vak “kreih pabah mbang” kayua jit ruak. Saigontourist hu tour jalan radaih trun yaom 10-40%, yau tour “Hà Giang bilan bingu tam giác mạch”; “Sa Pa - palei Cát Cát – Labik du lịch Núi Hàm Rồng - Đỉnh Fansipan”. Bruk njauk caik hatai , tuk blei tour, tuai dok hu bảo hiểm du lịch dalam negar 150 triệu đồng song bảo hiểm Covid-19 yaom 20 triệu đồng, brei ka dom tuai meng 18 thun tal ala 70 thun..

Tukvak ini, langik di ban raya HCM saong dom tinh, bal gah maraong negar pandiak hajan biak sarau kadhau, lagaih ka dom janih ruak pambuak tal jalan suak yava, abih di nyu nan lac ruak pandiak tabiak darak meda tamuh jeng jit ruak. Di sang iek ruak Nhi đồng 1, adit ka 2 bilan 11 hu tal 42 urang daok taong ruak pandiak tabiak darak daok viek saong jaik 100 urang taong ruak ngoại trú (tagok jaik 2 mbang dut saong adit dahlau). Tui dom chuyên gia y tế, jeng dreih yau jit Covid-19, ruak pandiak tabiak darak urak ini ka oh hu vaccine saong jru taong ruak ini. Bruk njauk duh hatai nan lac bhap bini biak iek bier dalam bruk pacang caga ruak pandiak tabiak darak, dalam tuk janih ruak ini mbuan njom mbak, anek jamaok kaik urang ruak, hadei di nan kaik saong pambak virus ka urang karei.

Jiak 18% urang Campuchia, samu jiak 3 triệu urang dok duik ala tanut kan kathaot. Ni lac bruk hu pathau khan tong yaom bahrau di abih di mintri Kế hoạch Campuchia ka bruk kan kathaot eik lipa tuk vak 2019-2020. Yau nan, urang kan kathaot di taneh ia ni tagok labaih 4% (4,3%) dut song atah di ni 6 thun. Tui mintri Kế hoạch, bruk urang kan kathaot Campuchia tagok glong lac hu sa binah kayua kan kandah di jit COVID-19, ngak ka dom gah kinh tế, du lịch...njauk patrun.

Rajaei Mỹ daok duah jalan piah jhul samar drak bruk ngak tabiak vaccine caga COVID-19 piah paglaong bruk pabak brei di dunya, abih di nyu nan lac di dom taneh ia daok cak rok patagok, dalam tuk taneh ia ini daok kham marat klah rabha vaccine ka negar langiu. Washington halain hatain daong ka dom gah ngak tabiak vaccine caga COVID-19 hu brei mboh cambaih laih hu prein meda ngak tabiak vaccine tui công nghệ mRNA, piah daong ka dom taneh ia nan peih praong bruk peih ngak dalam taneh ia. Dalam tukvak katut, bruk daong ba di rajaei Mỹ meda daong patagok dom vaccine caga COVID-19 ngan haong yaom mbiah, lagaih di dunya. Suai lavik meda daong ka prein ngak tabiak khang kajap di dom gah jru tavao dalam taneh ia, meng nan daong ka dom taneh ia nan samar drah ngak tabiak vaccine meyah tamuh tabiak jit ruak dieh yau nan di harei hadei./. 

Urang lang: Thu Thao – Hani Pha – 20/11