Yaok thun, tal harei ye mikva urang Cam Bani Bình Thuận peih bruk uan raok harei Suk Yeng. Harei suk yeng oh lac tuk piah ka bhap bani Cam Awar brei mboh hatung hatai di drei ngan haong ong amuk ong akei, likau ka palei negar hu sron mbon, salamat, hajan siam hangin laghaih, padai tangiey cak rok siam bo daok lac tuk piah ka bhap bani dalam palei pakajap jang talei rohim gul pataom.

Bo, nan lac hatai sahneng di sa-ai Đặng Thị Táo, urang Cam Ahier daok pak xã Phan Hiệp tuk ba drei tame harei Suk Yeng. 

Dalam harei ini, di palei Cam Bình Hòa, xã Phan Hòa, huyện Bắc Bình, tỉnh Bình Thuận mboh chreih chai tagok. Hadei di 3 mbang hagar yava tagok, ye dom kumei dara Cam ndua talam salao tame sang megik. Angaok dom canah jalan palei nao tame sang megik yau bak sambo màu meng khan ao di dom urang kamei Cam gam haong bingu hala di talam salao daok ndua angaok akaok. Dalam sang megik dom ong Car, ong Imum hu mbaok ginup abih piah peih ngak adat di drei. Di gah langiu, yaok rituh urang pataom gauk veik pok likau.

Yaom lac gaok kan kandah kayua tua riya pandiak bhang, min harei suk yeng thun 2016 jeng hu chreih chrai oh lah hagait dom thun dahlau. Harei ini, sang halei jeng sap gap kuhria caga pandap panda kaya mbang menyum. Langiu dom janih pandap mbang meng kan di urang Cam, mikva daok hu ngak ralo janih pandap karei piah payak tuai.

Harei Suk Yeng peih akaok meng sang megik palei Dit thôn Bình Hòa, xã Phan Hòa saong tamat di sang megik palei Châu Hanh, xã Phan Thanh, huyện Bắc Bình. Ini lac tuk piah ka bhap bani urang Cam Awar brei mboh hatung hatai di drei ngan haong ong amuk ong akei, likau ka palei negar hu sron mbon salamat, hajan siam hangin laghaih, ngak tangeiy hu tangiey ngak padai hu padai. Ini jeng lac tukvak piah ka gauk gar but pajaih daok pak atah gilac veik rivang palei. Daok ngan haong halau janeng, ini jeng lac tukvak piah pk ngak Khotip saong Imum – dua chức vụ biak prong dalam halau janeng Bani. Dua urang bahrau hu pok ngak Khotip saong Imum ini meda dang tabiak ngak adat dalam bilan iek Ramưwan anak tal.

Kadha njauk biai di harei Suk Yeng nan lac bruk xoay vòng  di nyu. Suk Yeng lang tui sap Cam lac “harei suk xoay vòng” daok iew lac “Kinh hội xoay vòng”. Harei Suk Yeng jeng lac tuk ka dom kumei dara likei dam di dom palei Cam hu taom gaok gauk, hu ndom biai nao mai haong gauk, ngak brei kajap jang talei rohim jum pataom gauk di mikva dalam palei. Tapa nan, ralo likei kumei hu jeng diuk jeng pasang; ralo baoh sang hu jeng xuôi gia haong gauk.

Hadei di tuk tamat harei Suk Yeng, mikva mai veik haong bruk ngak mbang ngak huak yaok harei di drei, min bruk bui sambai di harei suk yeng jeng daok kandong veik dalam hatai di yaok urang./.