Ong Vũ Quốc Trọng, daok di ban sit Cam Ranh, Khánh Hòa rilo thun daok dalam pandik harao kayua tame hóa chất. Dom harei jaik di ini, hu bruk sangka di dom urang y tế Sang iek ruak Chợ Rẫy, ong Trọng bui sambai lo kayua yaok harei hu dom urang ngak di labik ini da-a tal tangin cavan ia baoh kayau, pok ahar, ndom puac bingi pang:“Dahlak mboh hu duh biak siam. Kol dahlak mai iek ruak di labik ini bo hu bruk sangka tani tanat di Sang iek ruak Chợ Rẫy, nan ye thei jeng mboh bui sambai.”

Nan lac 1 dalam rilo bruk duh ka urang ruak ung thư di khoa Hóa trị, Pasak Ung bướu, Sang iek ruak Chợ Rẫy kayua Bilik ngak bruk pahla sang iek ruak peih tabiak ngak. Yaok harei, meng mesup aval, dom urang di bilik jar var kuhria caga ia baoh kayau, dom janih ahar mbang me-in, ba tal quầy ia menyum brei saoh anak Bilik taong ruak 2 piah ka urang ruak mai mek. Lingiu di nan, yaok harei 2 mbang,  tuk maong 8 meteh saong maong 3 biar harei, di bilik taong ruak 1 saong Taong ruak 2, urang jhul radaih ia menyum nao tal kik tame jru piah ba ia haong ahar brei saoh ka urang ruak.

Piah daong ka urang ruak mboh chreih chrai dalam hatai, labik ini daok hu peih tabiak rilo bruk ngak brei bui sambai. Dalam tuk daok cang tal mbang iek ruak, urang ruak meda iek phim hoạt hình angaok màn hình LCD, atau pambuak wifi peih iek web, ndom biai haong gauk gar. Dom bilik taong ruak daok hu peih nhạc nhẹ, hu báo puac piah thau bruk thời sự xã hội, daong ka urang ruak var nao dom duh hatai ka ruak kik.

Ong Nguyễn Văn Thọ (umo 70 thun, daok di Quận 2, TP.HCM) njauk ung thư pruac taha, bhian mai tal ini piah tame jru, brei thau: “Dom y bác sĩ, menuac ngak pak ini ndom puac biak bingi pang, hu ilamu ngak bruk siam. Dahlak taong ruak pak ini, mboh bruk iek ruak dak harei dak hu siam jang.”

Bác sĩ Chuyên khoa 2 Nguyễn Tri Thức, Yam ndok Sang iek ruak Chợ Rẫy brei thau, tuk thau lac njauk ruak ung thư, drei mboh biak huac. Rilo urang ruak tame jru hóa chất meda hu dom phản ứng oh plaih hu, ba tal kan daok, pandik harao rup pabhap. Bruk ini ngak ka mBan giám đốc Sang iek ruak mboh suh sah, ngak habar piah trun meneing dom duh hatai, dom pandik harao di rup pabhap urang ruak. Abih di nyu nan lac, bruk daok pamaong ngak di Sang iek ruak lac “tuk urang ruak ung thư ndih angaok kik tame jru ye baoh kik nan brei hu duh yau tuk nao kapal haoh”, ngak habar ka urang mboh hu chreih chrai: “Dalam dom bruk ngak nan, kol dahlak caong ndom lac, yaok candiah ahar, cavan ia bo urang ruak hu duh dalam tuk taong ruak, lac hatung hatian, lac hatai anit ranam di dom urang ngak, dom y bác sĩ Sang iek ruak Chợ Rẫy brei ka urang ruak.”

Dom bruk ngak yaom lac sit min biak hu makna, hu daong ka urang ruak mboh sambai hatai, bui hatian, mboh hu bruk anit ranam, klah rabha, pachreih ba di dom y bác sĩ, urang ngak y tế. Meng nan, urang ruak hu hatai jia jang, pambuak bruk siam saong hu pabak prein khang piah mesruh veik haong ruak kik, brei ka raidiuk siam jang ka rup drei eng./.

Urang lang: M.Phương  22/8/2020