Mbaik tatua pasei tapa kraong Vàm Thuật pambuak pagam phường 5 (quận Gò Vấp) haong phường An Phú Đông

An Phú Đông daok di gah Đông Bắc bal raya HCM, tapen kraong Bei Gon ngan haong bein phun mbang baoh, mblang hamu, kraong ribaong biak rilo. Thun 1944, bhum taneh ini daok dalam tổng Bình Trị Thượng, quận Gò Vấp, tỉnh Gia Định; hadei di harei peih paha gah meraong negar, An Phú Đông lac 1 xã di huyện Hóc Môn; urak ini lac 3 phường An Phú Đông, Thạnh Lộc, Thạnh Xuân di quận 12 saong jeng hu Karja pok brei angan Anh hùng Tapon nyom bol pan phao kraong bhap bani. Dalam vaktu  Đảng daok ngak bruk kandauk dahlau di Cách mạng Bilan 8 thun 1945, labik ini gam haong xã Bà Điểm hu jeng labik ngak bruk di dom urang taha cách mạng dahlau diah di Đảng. Saong tuk kaol Prang mai meblah veik taneh aia drei, An Phú Đông hu jeng labik mesruh – labik brei mboh dom jayah prong di bol lin saong bhap bani Bei Gon - Gia Định. Urak ini, An Phú Đông daok salih bahrau yaok harei.

Nao abih jalan Nguyễn Thái Sơn (quận Gò Vấp) lac tal bến đò An Phú Đông. Jeng daok bruk lac manuac sia saong radaih patuh tapa phà dalam samar drah di rai diuk min angaok mbaok meta di yaok urang jeng brei mboh bruk chreih chai bui sambai kayua bruk hu mbaok di mbaik tatua pasei khang kajap sambo màu hijao xám daok hu ngak tapa kraong Vàm Thuật di taphia nan.

Mbaik tatua pasei tapa kraong Vàm Thuật pambuak pagam phường 5 (quận Gò Vấp) haong phường An Phú Đông hu peih tabiak ngak di harei 2-2-2020, meda hu ngak blaoh saong ba tame pandar di puac thun ini daong pabak hatai caong khin di bhap bani bhum mesruh metak meng kan. Tuk mbaik tatua hu ba tame pandar, dom baoh sang bahrau meda patui gauk tamuh tagok angaok dua gah jalan, daong dui ka nyu jai gauk jang raidiuk saong jien mek tame dut haong bhap bani dom  quận pasak, rik daong tame bruk panduan ba bhap bani di bal raya HCM. Bí thư Đảng ủy phường An Phú Đông Phan Văn Nam oh padauk hu bui sambai, khan lac: “Tatua daok padang ngak nan ye taneh riya di dua gah tapen jalan tagok yaom gam gam, abih di nyu lac dom mblang taneh prong di taphia jalan daok hu rilo gilang pariak duah blei, tatua ngak blaoh meda hu rilo jang duk giao dịch gilang pariak tamuh tagok”. Hu thau sa mét vuông taneh ngak sang daok di mbaok jalan Vườn Lài labik glaong abih jeng jaik 100 triệu đồng – yaom bo 5 thun dahlau oh thei saneng tal.

Angaok jalan Vườn Lài – lac jalan prong nduac tapa dom phường An Phú Đông, Thạnh Lộc saong Thạnh Xuân (quận 12) dalam chiến khu An Phú Đông meng kan, sang danaok tamuh tagok rilo, radaih sit pajeng pandap saong radaih patuh nduac nao nduac mai yau anek haluak; dom kuan mbang, cà phê mblang bein, labik pablei tạp hóa, pablei pandap padang ngak… hu mboh grauk labik, hu gam duk giao dịch di gilang pariak pablei salih piah duh ka hatai caong khin di bhap bani. Nao hasit ye hu mboh dom baoh biệt thự prong. Rilo canah jalan cagar cakak haong jalan Vườn Lài atah di ini 5-7 thun nan tok lac bê tông xi măng, min urak ini hu tuh menyek yau brei mboh ka bruk salih bahrau angaok bhum taneh anh hùng.

Mesruh metak kalin kan tapa blaoh, chiến khu An Phú Đông hu 783 baoh sang hu buh rilo pren yava ka cách mạng, dalam nan rilo di abih lac An Phú Đông hu 620 baoh sang. Jeng dreh yau dom puk palei njauk tayah tayac dalam mesruh metak, An Phú Đông meng tuk daok lac xã di huyện Hóc Môn jeng gaok biak rilo kan kandah tuk glaih glar yam tapa kathaot rambah, padang veik puk palei. Bruk bayar dhar phol ka dom baoh sang sarak karja tuk halei jeng hu Đảng ủy saong dom kapul nyaom puk palei ba tagok dang akaok taphia dom bruk cak rok patagok kinh tế; brei mboh ilamu “menyum aia hadhar tal halau aia” di bangsa saong ilamo đạo đức di Đảng ngan haong bhap bani dom bhum mesruh metak 1 hatung hatai nao tui Đảng, tui cách mạng.

Urak ini dalam jaman sron mbon, ilamu biak hu yaom ini daok hu dom urang đảng ranaih umo harei ini patagok piah ngak jeng bruk salih bahrau di dom bhum palei kathaot. Kathaot rambah, eik lipa urak ini nyu kadun nao atah salih tame nan lac dom puk palei kaya meda, sang danaok padang ngak siam mekre, dom sang mac công nghệ glaong dui pachreih hu rilo công ty praong dang akaok di dunya duah mai buh jien tame ngak mbang. Gam haong nan lac dom mblang glai tamo hu khik caga, mong iek piah pamaong tal cak rok patagok khang kajap sa bhum taneh chiến khu Đ prong./.

Urang lang: Jasi – 23/09