Sang amuk Bạch Yến alin hadiah pandap piah trun meneing kan kandah ka dom urang jaoh jo, urang pablei vé số
Dom harei bilan 6/2021, tuk jit covid-19 rah tabiak khang di Tiền Giang, anak sang amuk Phan Thị Bạch Yến daok di xã Đạo Thạnh, bal sit Mỹ Tho tuk halei jeng hu urang kan kathaot mai labik ini taduan mek pandap daong. Nan lac urang pablei vé số, urang jaoh jo dalam bal Mỹ Tho hu daa mai taduan mek 10 kg brah pahe saong sa thùng mì. Yaom lac pandap oh rilo, min nyu ngak bui hatian dom urang sang kan kandah, abih di nyu nan lac urang pablei vé số daok lahik bruk ngak. Amuk Bùi Ngọc Mỹ, urang pablei vé số di phường 8, bal Mỹ Tho hadei di tuk taduan mek pandap khan lac: “ Dahlak taduan hu 10 kg brah haong thùng mì, biak bui sambai kayua hu brah mbang. Dahlak padeih bruk pablei vé số paje, daok sang trọ sa drei mboh biak rambah. Rai diuk kan kandah bo hu urang ngak pahla brei brah mbang, drei biak uan tabuan”.
Dalam mbang jit Covid-19, sang amuk Bạch Yến pataom veik jien ndo meng bruk pablei salih, blei 250 pok pandap alin hadiah ka dom sang kan kandah. Dalam 10 thun tapa, sang urang kamei ini tuk halei jeng khik bruk alin brei pandap ka urang kan kathaot, parabha jeng rilo mbang dalam thun. Amuk Phan Thị Bạch Yến brei thau, thun ini kayua jit ruak tamuh khang, rilo urang lahik bruk ngak nan ye patagok bruk alin hadiah pandap piah trun meneing kan kandah ka dom urang jaoh jo, urang pablei vé số . “Yaok thun dahlak brei pandap 3 mbang: bilan sa, bilan 7, bilan 10. Daok thun ini hu Covid-19 drei brei rilo pandap jang. Mbang Covid-19 ini, daok hu alin brei bilan 4, bilan 5 tra. Dahlak daong hu ka mikva tuk kan kandah ye mboh biak bui. Tuk vak anak tal, sang dahlak meyah hu jien ye daong rilo jang”.”
Hatung hatai siam mekre di sang amuk Phan Thị Bạch Yến jeng yau dom urang ngak pahla karei di tỉnh Tiền Giang tuk halei jeng sangka, daong ka dom sang kan kandah, hu truac tagok dalah apui ghang pandiak, bak hatai anit ranam, daong ba gauk yam tapa jit prong ini./.
Urang lang: Jasi – 05/07
Viết bình luận