Gam saong bruk rik daong khik ramik ilimo bangsa Êđê, libik du lịch sinh thái ilimo bhapbini Kô Tam (xã Ea Tu, ban Buôn Ma Thuột, tỉnh Đắk Lắk) daok hu ba bruk ngak ka rilo urang ngak, abih di nyu nan lac bhapbini bangsa takik di dom buôn tabhia bhum hu jien mek tame tani tanat, paglaong raidiuk. Kadha vak di H Xíu - urang vak di rayo sap ndom VN daok di bhum Tay Nguyen:

Meng jien bilan tani tanat 4 triệu 500 rabau đồng sa bilan, gam saong jien phụ cấp, Y Jo Ry Êban, (bangsa Ê Đê, daok di buôn Kô Tam) mboh biak takre saong bruk daok ngak di libik du lịch sinh thái bhapbini Kô Tam (ban Buôn Ma Thuột, Đắk Lắk). Y Jo Ry brei thau, thun 2013, bac tamat gah công nghệ thông tin sang bac Đại học Tây Nguyên, thau hu bruk lac libik du lịch daok di tukvak si ngak blaoh saong tuyển dụng menuac, saai nộp hồ sơ likau tame ngak.

-Hadei di dom bỡ ngỡ tuk akaok mereip, meng hu công ty tacei pato ilamu ngak bruk du lịch saong mein alat ragam, urak ini, gam ngak kỹ thuật di công ty, Y Jo Ry jeng lac urang dang akaok kapul parang me-in nghệ thuật bangsa, bhian hu mbaok tame dàn dựng saong parang mein duh ka tuai du lịch: Ngak di ini drei hu taom gaok haong rilo menuac, meng taha , uranaih tal urang taneh ia lingiu, meng di nan daong ka bruk ndom biai di drei hu siam jang. Tuk oh ka nao ngak di Kô Tam ye drei  oh ka thau mein dom janih capi halei, drei jeng oh ka thau taong cồng chiêng atau chiêng tre. Min, meng di tuk tame ini hu mban khik ramik cong ty brei ka nhan vien bac megru taong chiêng ban saong dom janih chiêng kreim.

-Hu apdang tagok meng bilan 3 thun 2013, urak ini, libik du lịch Kô Tam hu ba bruk ngak ka jaik 100 urang ngak, dalam nan rilo meng lac urang kumei bangsa takik ngan saong dom bruk ye: taduan tuai, ngak mbang huak, ngak beir, hướng dẫn viên du lịch…. Saai H Sinh Ê Ban, (bangsa Ê Đê, daok di buôn Kmrơng Prong B, xã Ea Tu), brei thau, labaih 3 thun kak kajap saong libik du lịch Kô Tam, lac  hướng dẫn viên, saai hu mbuan lagaih duah thau ka ilimo di bangsa drei, meng di nan mboh takre saong caong khin hu yaih khan dom ilimo ka tuai damuai grauk libik thau. Yau nan ye, saai kham merat ngak suai livik di libik du lich ini: drei ngak di ini lac kham merat ngak suai livik saong bruk ini jeng hu mbuak tal nganh drei bac lac sap negar lingiu. Drei caong thau rilo jang ka ilimo bangsa Êđe drei saong dom bangsa takik di ini jeng ye bangsa VN. Ka dua veik, drei caong khin bac dom ky nang ka ndom biai, thuyết trình saong sap negar lingiu piah drei meda khan ka oh lac urang dalam taneh ia bo urang taneh ia lingiu thau ka ilimo di drei veik.

-Dahlau dhiah lac dom urang nong, tok randap saong bruk puh cakak, min tuk hu tame ngak bruk, hadei di 2 tal 3 balan bac bruk, rilo urang di Kô Tam hu thau ngak du lịch saong dak harei dak randap saong bruk pasang iek phun cảnh, yaih khan dom ilimo kheih mekre, ngak dom kaya mbang mengkan di bangsa drei… Bruk ngak jaik tabhia min daong ka dom urang nan hu jien mek tame tani tanat piah kuhri kuhria ka sang saong jien bac ka dom urang anek. Saai Đỗ Thị Trang (daok di khối 4, phường Tân Hòa) chreih chrai brei thau, dahlau dhiah kayua oh hu taneh pala drah yau nan ye saai nao ngak pah, jien mek tame oh tani tanat. Meng tuk hu tame ngak di libik du lịch Kô Tam, ngan saong jien mek tame 3 triệu 500 rabau đồng yaok bilan, saai hu jien raong dua urang anek sit daok mbang bac.

-Amuk Nguyễn Thị Ngọc Anh, akaok Hội đồng Quản trị Công ty Cổ phần Du lịch cộng đồng Kô Tam brei thau, rilo menuac ngak di Công ty lac urang bhapbini daok di dom buôn dalam bhum, raidiuk di dom urang nan biak kan kandah. Piah ka urang ngak sahanang hatai ngak bruk, Công ty hu ba mbuan lagaih meng bruk pato bruk ngak tal brei ginup dom sarak ka urang ngak ye kak jien bảo hiểm, brei ginup pandap bảo hộ lao động, tanyi ravang pachreih ba urang ngak dalam tuk ruak kik, atau alin pandap ka urang ngak dalam dom tuk lễ, Tết; daong ka rilo urang ngak caong nyim jien oh kuhria laba piah padang sang daok.

-Pataom mek dom haniem siam hu blaoh meng lingik tasik saong anek menuac, libik du lịch sinh thái ilimo bhapbini Kô Tam hu duah tabiak jalan nao siam piah gam mek jien tame ka drei, gam ba bruk ngak ka rilo urang. Bruk tabiak rai di libik du lịch sinh thái ilimo bhapbini Ko Tam hu rik daong biak rilo tame bruk ba bruk ngak ka urang ngak lac urang bangsa takik daok di puk palei./.