Thun bahrau  mai veik angaok bhum palei ba tui ralo caong khin ka dom siam mekre bahrau di gah anak.  Harei Xuân, taphia di bruk caong hu pren yava khang kajap, ngak mbang hu ginup meda ka rup babhap, ka sang drei, thei jeng caong hu sa harei hadei siam mekre jang ka  taneh aia, palei negar. Ái Nghiêm, Urang vak di rayo sap ndom Việt Nam daok DI bal raya Hồ Chí Minh hu taom gaok saong brei thau veik hatai caong khin di sa-ai Thạch Thị Đã, urang ngak nong bngasa Cam ngak mbang naih jioy di palei Phước Đồng 2, xã Phước Hậu, huyện Ninh Phước, tỉnh Ninh Thuận dalam dom harei akaok thun:

Thun bahrau, ngan haong dom urang nong yau sa Thạch Thị Đã di palei  Phước Đồng 2, xã Phước Hậu, huyện Ninh Phước, tỉnh Ninh Thuận ye oh hu hatai caong takre halei prong jang lac hu sa thun bahrau angin siam hajan laghaih, padai brah mek hu ralo. Danak dak padang ngak palei pala bahrau bo Đảng, Karja peih ngak, daok hu peih ngak khang saong praong dalam jang, daong ka mbaok meta palei pala dak harei dak hadah hadai.

Tui sa-ai Thạch Thị Đã diuk njauk hu hatai jia, caong khin saong ngak ka bruk caong khin nan hu jeng biak. Sa-ai khan gilac: 20 thun dahlau, tok hu 2 drei kubao saong labaih 1,2 hecta taneh apuh hu amaik ame gah pasang brei, sa-ai haong pasang nan lac Quãng Ngọc Cát ba tangin tame dak padang kinh tế baoh sang, ngan haong hatai caong khin ngak meda. Mblang taneh  1,2 ha nan, diuk pasang sa-ai pala tangiey lai, lange. Daok dua drei kubao diah, diuk pasang sa-ai ba nao la-ua pah. Dom thun hadei,  kubao menek hu 8 drei. Sa-ai pablei kubao mek jien blei mai mac li-ua piah cơ giới hóa bruk pala drak saong nao la-ua pah ka mikva dalam palei. Ngak hu jien min sa-ai cai pandar kali kalih piah pataom jien blei taneh peih prong bruk pala drak. Meng 1,2 ha taneh tuk akaok mereip, tal harei ini, sang sa-ai hu tal 20 ha taneh pala tangeiy lai, medar, nyo, 2 ha padai. Langiu di nan, sa-ai daok hu sang sang mac chai padai, 2 sruh mac yuak jan liên hợp, radaih công nông, 15 drei kubao…Urak ini jien mek tame di sang sa-ai yaok thun hu labaih 100 triệu đồng.

Sa-ai Đã oh lac ngak meda ka drei saoh, sa-ai daok ba bruk ngak tani tanat ka 6 dam dara Cam pak trang trại di sang drei. Sang hu ginup meda, sa-ai mbaiy tapa  daong ka mikva dalam palei jalan ngak meda. Meng hatai kham merat ngak meda ka drei saong puk palei, sa-ai Thạch Thị Đã njauk lac sa kareih camin hadah lambaok ka dom bangsa takik di tỉnh Ninh Thuận dalam bruk patruh eik, patrun kathaot. Meng dom jak jeng siam mekre nan, Thạch Thị Đã taduan mek hu ralo harak pok meyaom di huyện, tỉnh brei ka dom urang nong ngak mbang naih jioy ./.