Dom cei gru vah gaiy ba anek saih nao bac 

Duah jalan klah rabha song pambuak talei rohim hong dom boh sang song anek saih dahlau di tuk  menyai habar ka mik va brei anek kamuan nao bac lac bruk bo dom cei gru, anai gru urang bangsa takik tuk halei jeng sahneng duah jalan ngak piah ba dom adei tal sang bac. Nan lac bruk oh mbuan bo dom cei gru anai gru kham merat ngak piah pachreih ba dom boh sang mik va bangsa, abih di nyu nan lac ngan song dom bangsa hu oh ka tal 10 ribau menuac. 

Gru  K'Dĩnh, Tổng phụ trách sang bac Tiểu học Tân Phúc 1 (Hàm Tân, Bình Thuận) brei thau lac  di pak ni, anek saih  tiểu học bhian takik klaak bac, min tapa pakat 2, tal tal  7, tal 8 ye klaak bac rilo. Rilo adei oh khin nao bac bo khin nao ngak công nhân di dom ban prong. Dom thun tapa, cei gru  K’Dĩnh bhian salih bahrau bruk  sinh hoạt đội song bruk uranaih, rik dong tame labik taom gaok main sambai dong ka dom adei hu labik brei mboh prein khang, bruk naih gheih di drei. Cei gru  K’Dĩnh brei thau:

"Nao rilo, thau rilo, mboh rai duik kan kandah rilo, drei ndua naong trak jang, sahneng lac khin ngak hagait nan piah dong ka dom adei meng bruk main sambai tal ilamu, doh tamia, pachreih dom adei takre nao bac. Bruk iek glang di sang  ngan song dom adei oh tal labik tal dhua. Hulin biak anit nan ye bhian dong ba piah ka dom adei hu nao bac, jak ba maik ame, bloh drei nao tal dom labik hu rilo menuac,, hu dom menuac meda daong pachreih  ka dom adei nao bac".

Lac sa urang dok di pak ni, anai gru  Đinh Thị Kem, bangsa  H’re, gru pato di sang bac Tiểu học Hành Dũng, tỉnh Quảng Ngãi thau cambaih bruk rambah rambeip di dom bhap bini dok kurang meng pandap panda tal labik me-in sambai nan ye takik sangka tal bruk iek glang, pato pakai uranaih. Kayua yau nan ye, anai   Đinh Thị Kem kham merat nao tal yaok boh sang, jak ba amaik ame  brei ka anek bhik nao bac song pachreih dom adei nao bac :

"Hulin nao tal yaok boh sang sa mbang, oh jeng ye nao  2-3 mbang. Hu thun lin pato tal 1, dom adei dalam umo takre main, hulin nao tui tal sang pachreih ba piah adei nao bac. Hadar kanan tra lac dom adei bhian padeih bac kayua tagok hamu apuh  tui amaik ame , hulin jeng tui amaik ame tagok hamu apuh, tagok ceik, caluai chraoh  piah taduan dom adei mai bac. Urak ni jak  hu ye".

Pato bac atah di sang labaih  30km di bhum ceik nao mai kan kandah , labik pato bac dok kurang rilo janih, min anai gru  Pi Năng Thị Hải, bangsa  Raglai, gru pato sang bac mầm non Phước Bình, tỉnh Ninh Thuận jeng dok kham merat  piah iek glang song pato pakai  dom adei anek saih. Anai Gru Pi Năng Thị Hải cong khin hu rilo sarak pachreih cei gru anai gru mai pato di bhum atah bayah, bhum mik va bangsa takik:

  "Hulin cong khin anak tal, gru pato taduan hu rilo sarak daong brei jang , abih di nyu nan lac gru pato  mầm non. Ni lac bruk ngak biak gleih glar dut song dom pakat karei, nan ye  brei hu 2 anai sa tal bac. Pagap yau akaok thun hulin taduan tal pato hu 34 kamuan song sa anai gru , ye oh meda pabak hu, kayua dom adei ni bleik lo. Hulin sahneng lac pabak ginup gru pato piah khik siam mekre ka dom kamuan song bruk iek glang rong pato hu siam jang." 

Dalam danak dak  “Klah rabha hong cei gru anai gru ” thun ni, mBan peih bruk  pok meyaom  63 cei gru anai gru urang bangsa takik  naih gheih di  26 bangsa. Yaok kreih camin cei gru anai gru urang bangsa takik lac sa baoh bingu siam, tuk halei jeng kham merat yam tapa kan kandah, glaih glar, pabak ilamu piah ba akhar haroh mai ka anek saih bangsa takik  di bhum atah bayah gam song gah  pato megru paglong ilamu, hatai sahneng ka bhum mik va bangsa takik, rik dong patagok kinh tế-xã hội di puk palei song taneh ia ./.

Urang lang: Hanipha- 20/11