Bruk rik dong tame kadung jien vacxin piah urang klauk jru pacang caga 

Tal harei ini, dom urang jakar di UBMT negar phường 15, quận 8, bal raya HCM jeng daok mboh drut droi tuk khan veik bruk urang kamei prong thun mai rik daong jien padai saong ndom lac: “Dahlak tok hu sa blah 500.000 ini, dahlak likau rik daong 400.000, dom cei anai brei veik ka dahlak 100.000 piah ba-yar jien radaih kuan nao sang”. Yaom lac rai diuk kan kandah, min tuk mahit Raja-ei tabiak panuac ieu, abih di nyu lac mong mboh rai diuk di dom urang daok jaik taphia gaok kan kandah biak rilo kayua jit ruak, amuk taha umo 70 thun oh saneng hagait ba jien patak pataom hu takik di drei mai rik daong:  

"Dahlak pang khaw tin, mahit Akaok negar Nguyễn Xuân Phúc ndom, dahlak mboh biak drut droi, blaoh mong mboh dom gru jru, dom urang lin daok ngak bruk, dahlak mboh biak anit. Min dahlak oh hu rilo jien  yau nan ye hu du halei rik du nan. Drei rik daong oh ginup sa mbang jru min rilo urang rik tame ye ginup. Caong khin lac vaccine samar pacang cakak hu jit Covid-19, ka bhap bani hu khang kadang, piah ngak mbang”  

Oh lac tok hu amuk Sữa bo daok hu biak rilo urang karei vak jeng dom dalikan biak drut droi di dom labik taduan mek jien rik daong di UBMT negar dom phường, xã, quận, huyện pak bal raya HCM. Yau urang dahlau diah ngak bol lin Đỗ Văn Thơ (daok di quận 1) hu buh tabiak 100 triệu đồng meng jien patak pataom lương hưu luac dom thun gam piah rik daong; atau amuk Nguyễn Thị Thảo (77 thun, daok di quận 5) hu buh tabiak 81.250.000 đồng meng jien manuac sia mai caruh ndam metai di pasang brei ka kadung jien. Amuk Thảo jia lac nan jeng lac hatai caong khin di urang plang lahik – ong Nguyễn Văn Sự, sa urang hu 55 thun Đảng, dahlau diah daok guk chính trị.

Taphia dom kareih camin urang taha prong thun daok hu dom anek saih, SV jeng rik daong tame kadung jien. Pagap yau dua adei sa-ai Võ Diễm Sang (5 thun) haong Võ Triệu Sang (4 thun), anek saih sang bac mầm non Tân Thông Hội 2, bal sit Củ Chi, hu likau amaik jan dua drei pabui haluk caik piah labaih 2 thun tapa piah rik daong kadung jien. Tuk thau caong khin di anek, sa-ai Ngô Thị Thúy Diễm – amaik di dua uranaih ini jeng njauk hatai chip saong pajeng ba dom anek nao tal UBMT bal sit Củ Chi piah rik daong:

“Daok pak sang, ong akaok bhian pato dua anek brei thau anit ranam ka urang karei, sa tacao tuk eik samu sa pok tuk trei. Dom panuac ini dua anek nyu kanar hadar miat. Dahlak jeng caong khin dom anek ngak bruk siam, nan ye tuk mehit anek ndom ye mboh biak drut droi, pachreih tui dom anek”)  

Di quận 11 hu adei Phan Tuấn Minh, anek saih tal 7, Sang bac THCS Phú Thọ hu ba 100 USD hu lì xì tuk Tết piah rik daong blei vaccine; di bal Thủ Đức hu sang amuk Nguyễn Thị Mai Lan ngan haong 3 rai rah hu jan 5 drei pabui haluk piah rik daong 44.337.000 đồng. Di phường Thảo Điền, bal Thủ Đức, sa kapul urang pablei salih jak gauk rik daong kadung jien vaccine. Dalam labaih 1 thun tapa, bruk ngak mbang pablei salih gaok biak rilo kan kandah, jien mek tame trun biak rilo, min oh lac yau nan bo bruk gul pataom, hatai anit ranam oh hu brei nao.  

Menghatung hatai anit ranam nan, tok hadei di labaih sa bilan peih mbang tabung glaong, Kadung jien pacang caga jit Covid-19 bal raya HCM taduan mek hu panuac sanya daong brei jaik 2.300 tỷ đồng. Amuk Tô Thị Bích Châu - Akaok UBMT negar Việt Nam bal raya HCM brei thau yaok harei, yaok tuk UB jeng taduan mek hu jien rik daong tame kadung jien, hu yaom jien yaok pluh, yaok rituh triệu đồng min jeng hu dom chuyển khoản tok 100.000, 200.000 đồng. Taong abih jeng hu taduan mek, jeng hu iek prong yau gauk kayua nan lac hatung hatai di urang bal raya brei ka bhap bani, ka taneh aia, palei negar:

“Rilo atau takik nan lac prein di yaok urang min prong di abih nan lac hatung hatai. Hu dom cei anai padeih hưu, hu dom urang pablei salih yaom lac daok gaok rilo kan kandah, min jeng mai rik daong, hu dom adei sit rik daong jien pataom hu dalam drei pabui haluk. Nan lac dom bruk daok ngak megei hatung hatai manuac sia saong ngak ka khaol dahlak mboh drei brei hu trách nhiệm piah pandar kadung jien ini yau habar ka nyu siam di abih.”

Dalam tukvak kan kandah ini, hatung hatai di dom anek menuac di bal raya  angan Wa dak brei mboh cambaih jang tuk halei karei. Taong abih daok ba tangin tame haong taneh aia mesruh pacang saong jayah jit prong Covid-19./. 

Urang lang: Jasi -18/6