Kol dahlak nao tal xã Lộc Tấn, huyện Lộc Ninh tuk daok lac bilan thu, langik pandiak oh hu ngin. Min jaik 100 urang jakar, urang lin BĐBP Bình Phước jeng daok abih drei ngak bruk. Ka-ing ao urang halei jeng bak ia hauk, mbaok meraih bhong kayua pandiak. Di labik jalan daok ngak dalam tổ 3, ấp K57, xã Lộc Tấn, Đại úy Bùi Ngọc Đôn, Chính trị viên phó Đồn Biên phòng Chiu Riu brei thau, jaik 1 bilan ini mai, urang đoàn, dam dara dom đồn Biên phòng daok dalam huyện Lộc Ninh kham merat abih drei piah ngak 4km jalan nao tal dom palei dalam xã Lộc Tấn, nan ye urang halei jeng oh caik hatai tal tukvak.

Jeng hu mbaok tame ngak jalan haong BĐBP, ong Nguyễn Thanh Triều, Trưởng ấp K57, xã Lộc Tấn chreih chrai khan lac: Dahlau daih, jalan haluk meriah bhong ini thur mur par bak dalam bilan pandiak saong gluh baok dalam bilan hajan. Hu harei hajan khang, anek saih oh nao bac hu kayua gluh baok gam khang baoh kong radaih juak. Urak ini hu bộ đội mai daong ngak jalan, bhap bini dalam xã bui sambai lô.

Chủ tịch UBND xã, ong Giang Minh Hiển brei thau: Meng hu bruk daong pren abih drei di  dom đơn vị BĐBP, Bộ Chỉ huy Quân sự, Công an tỉnh..., dalam sa tukvak katut panak, jaik 30km jalan hu haluk hu jeng jalan xi măng praong 3m, kapal 16cm, nao tapa dom palei.

Thiếu tá Cao Sỹ Hoàng, kapul ngak bruk puk palei Đồn Biên phòng pabah mbang negar pakat dunya Hoa Lư bui sambai brei thau, jaik 1 bilan ini mai, adei sa-ai mbang, ndih dalam sang bhap bini. Hadei di 1 harei ngak bruk glaih glar, bộ đội haong mikva tangi sua gauk, pachreih ba gauk bloh ba gauk daoh takơ biak bui sambai. Talei rohim anit ranam gauk dak hu kak kajap jang. Sa-ai Trần Văn Đức, Bí thư Chi bộ ấp K57 khan lac: “Adei sa-ai Biên phòng biak siam hatung hatian, daok pak halei jeng hu mikva anit ranam. Urak ini jaik calah gauk, mboh anit lô yau ikan haong ia”.

Đại tá Hoàng Văn Thành, Phó Chính ủy BĐBP Bình Phước brei thau, tỉnh hu 15 xã biên giới di 3 huyện. Raidiuk dom sang bhap bini bhum biên giới daok rilo kan kandah, abih di nyu nan lac di bhum bhap bini bangsa takik. Rilo thun tapa, đơn vị hu tham mưu ka karja dom pakat ba tabiak rilo jalan ngak piah jhul patagok kinh tế, ilamu, xã hội, patruh eik patrun kathaot ka bhap bini daok di bhum biên giới, ba mai kein laba mboh di anak meta. Dom danak dak “Daong adei yam takai tal sang bac”; “Limo pajaih daong ka urang kathaot bhum biên giới”; “Khang brah anit ranam”... hu peih ngak di grauk labik, peih ngak gam gam di dom đồn, đơn vị Biên phòng dalam tỉnh.

Trung tá Phạm Văn Hoàn, Chính trị viên Đồn Biên phòng cửa khẩu Tà Vát,  xã Lộc Thịnh, huyện Lộc Ninh khan brei kol dahlak pang dalikan drut drui ka talei rohim bol bala haong bhap bini bhum taphia negar ini. Nan lac thun 2014, đơn vị alin hadiah ka ong Lâm Pưng 2 drei limo pajaih, tal harei ini tagok jeng 8 drei. Ong Lâm Pưng alin hadiah veik ka đồn 1 drei piah sik ngak ralow mbang di tuk Tết Nguyên đán 2019. Taduan hu hatuang hatian anit ranam nan di ong Pưng, urang dang akaok đơn vị ginum gauk ba drei limo nan nao alin hadiah ka sa sang kan kathaot karei. Bruk ngak ini hu mikva saong ong Pưng biak pok meyaom.

Thun 2018, BĐBP Bình Phước pambuak bruk haong dom sang iek ruak dalam saong lingiu tỉnh mai iek ruak, brei jru, alin hadiah pandap brei ka jaik 3.000 bhap bini bhum tphia negar, yaom labaih 500 triệu đồng; alin hadiah mikva 7 baoh sang anit ranam, sang Đồng đội, 3 drei limo pajaih, daong pandap piah ngak mbang duah jien yaom jaik 500 triệu đồng. Dom đơn vị BĐBP dalam tỉnh hu daong gam gam ka 69 anek saih, yaok bilan 500.000 đồng, dalam nan hu 9 anek saih urang Campuchia; jak ba 35 anek saih klaak bac mai bac veik; alin hadiah pandap ka dom anek saih bac da-a naih joi saong yaom jien abih tih jaik 310 triệu đồng; daong ka bhap bini 5.000 harei ngak jalan, kaoh paik njam patam baoh kraoh, pasiam dom khut khat kayua bala meng lingik tasik; daong tuh bê tông jaik 5km jalan palei; lngak 2.000m2 mblang sang bac...Meng dom bruk ngak ndung bak hatai anit ranam nan nyu ngak brei talei jum pataom di bol bala saong bhap bini dak khang kajap jang. Tuk bhap bini njauk hatai, rik pren yava tame ye tantu chủ quyền di bhum taphia negar, tasik pulao di taneh ia tuk halei jeng hu khik kajap./.