Pathau mikva saong taong abih gauk! Yaom lac hu ba tabiak ngak rilo jalan pacang caga min  bruk glut jaleih haluk tapen kraong, ribaong di tỉnh Hậu Giang jeng daok rah tabiak kan si thau dahlau, mbuan ba tal metai menuac saong lihik drap ar di yaok ribau baoh sang. Kadha vak di Tấn Phong- urang vak di rayo sap ndom VN daok di bhum taneran kraong CL brei thau ka bruk nan.

           Menuac urang daok di palei Thạnh Lợi, xã Tân Phú Thạnh, huyện Châu Thành A jeng oh var hu bruk glut jaleih taneh tapen kraong Ba Láng di akaok bilan 5 bahrau ini. Tuk nan, canah jalan atah jaik 50 mét, praong 3,5 m nyu jaleih trun kraong dui tui paga anak sang bhap bini, rilo phun kayau saong sa gheng điện trung thế. Bruk glut jaeih ngak gar jalan saong lihik điện abih bhum dalam rilo tuk.

          Ong Nguyễn Văn Vẻ daok di palei Phú Thạnh brei thau: labik kraong Ba Láng anak sang ong glut jaleih gam dalam 2 thun tapa. yaom lac bhap bini hu buh jien tabiak ngak kè min oh pacang hu. Urak ini dom labik gut jaleih ini daok hu karja palei pasiam veik meng bruk ngak bờ kè meng bê tông min bruk glut jaleih, talah ra-ai jeng daok rah tabiak, yau brei mboh lac bruk glut jaleih tuk halei jeng meda rah tabiak hu.

 “Urak ini daok ngak, daok tuh đà min nyu daok glut trun, daok talah tabiak yau nan. Nyu glut trun labaih 5 tấc jalan saong talah tabiak jaik 3 tấc. daok di labik ini mbang ndih oh bingi, oh thau nyu glut jaleih tuk halei, huac lô”.

     Tui ong Hồ Thanh Triết- akaok UB bhap bini xã Tân Phú Thạnh, huyện Châu Thành A: labaih 1 thun tapa, dalam xã hu 3 labik glut jaleih khang. Urak ini daok hu dom labik mbuan si glut jaleih. Xã daok jak ba mikva tabiak truh dom labik ini piah khik salamat ka menuac sia, khik siam mekre ka drap ar, saong daok likau brei padang ngak ar pacang riyak di palei Tân Thạnh Tây saong Thạnh Lợi ngan saong yaom jien jaik 400 triệu đồng. Tui nan, yaok ar pacang riyak atah abih tih 60m, pandar gheng  li-u atah 10m, yaok mbaik gheng atah di gauk 1,5m, kreh gheng li-u lac gheng bạch đàn atah 7m, saong daok mek bạch đàn kiềng ala takai, di kreh ar saong di akaok gheng. Bruk padang ngak ar pacang riyak ini meda patrun bruk glut jaleih takai kraong Ba Láng rah tabiak dalam tukvak tapa. Anak meta brei ngak biển báo, ngak paga pacang, peih jalan tạm ka bhap bini saong radaih nao mai labik glut jaleih tapen kraong Ba Láng hu siam mekre. Ong Hồ Thanh Triết daok brei thau lac:

“Jak ba mikva brei nyim sa jalan tạm di palei Thạnh Lợi piah tuh patau ka mikva nao mai mbuan lagaih jang. Daok sa labik di palei Tân thạnh Tây ye kol dahlak jeng likau jien di huyện daong piah ngak tatua tạm, tui kuhria abih jaik 60 triệu dalam tuk cang rami pasiam dom labik glut jaleih dalam xã”.

          Kuhria meng akaok thun tal ini, tỉnh Hậu Giang hu 10 labik glut jaleih. Palei hu rilo labik glut jaleih di abih lac huyện Châu Thành. Tui kuhria mboh, 2 thun jaik ini, yaok thun huyện ini hu jaik 60 labik glut jaleih takai kraong ngak ka yaok ribau mét vuông taneh lihik nao. Tapa pasang iek tapak bahrau ini brei mboh lac, urak ini dalam huyện hu 22 kraong, ribaong hu labaih 50 labik mbuan glut jaleih. Dalam nan hu rilo labik talah ra-ai daok ngak kan kandah tal jalan nao mai. Kuhria meng akaok thun tal ini, dalam huyện hu 6 labik glut jaleih takai kraong, ngak lihik labaih 1.200 mét vuông taneh.

          Makna ba tal glut jaleih lac kayua lingik pandiak, ia trun biar ngak ka taneh hu rilo labik talah ra-ai. Lingiu di nan, bruk padang ngak jalan palei, sang daok tapen takai kraong jeng ngak ka bruk glut jaleih rah tabiak samar jang. Tui kuhria dalam bilan hajan ini bruk glut jaleih daok rah tabiak nan ye tinh daok ba tabiak rilo jalan ngak piah pacang caga.

Tui pasang iek, urak ini Hậu Giang hu labaih 100 labik mbuan glut jaleih. Lingiu di bruk peih ngak rilo jalan pacang caga glut jaleih, dom urang dang akaok tỉnh jeng hu tacei pato dom puk palei pambuak bruk haong dom mban, ngành, jak ba dom baoh sang daok di dom labik mbuan glut jaleih panduan nao labik karei piah khik caga siam mekre, salamat ka menuac sia saong ka drap ar. Daok gah tỉnh meda daong jien brei ka dom baoh sang nan nao daok di labik daok bahrau./.