Ong Võ Văn Phải daok di palei Mỹ Phú A, xã Hòa Mỹ, huyện Phụng Hiệp lac: bhum taneh palei ong njom likhun trak, dahlau diah tok pala tabau saong sa bilan padai min ba mai kein laba glaong. Sang ong hu 1ha taneh pala tabau min tal tuk jaik yuak ye njauk ia sua tuh mai dauk gha ngak trun năng suất, oh ginup saradang, urang blei kateik yaom yau nan ye thun halei jeng khat lahik.      Dom thun tapa, ong saong urang nong labik ini tak tabau klak salih tapa pala me-mbat (mãng cầu xiêm). Meng janih phun pala bahrau ini, ong saong mikva urang nong labik ini duah jien tame yaok rituh trieu dong sa ha, glaong jang pluh dom mbang duk saong pala padai: “ Salih janih phun pala nan hu kein laba ka urang daok di bhum taneh ini, hu rilo baoh sang pala yaok pluh cong taneh jien mek tame meng 700 tal 800 trieu dong. Thun blaoh, adei hulin duah hu 800 – 900 trieu dong, meng nan raidiuk hu tagok.”

Oh lac eng xã Hòa Mỹ, bo tukvak tapa dom palei dalam huyen Phụng Hiệp jak gauk salih bein phun mbang baoh takik kein laba tapa pala dom janih phun brei kein laba glaong. Tui nan langiu bruk pala me-mbat ralo di xã Hòa Mỹ ye dom xã, ban sit karei dalam huyện jeng hu mboh rilo bruk ngak birau yau pala cam xoàn, cam sành, tamun lưới, thanh long hatai bhong merih, la-u dứa…Dom bruk ngak nan jeng ba mai rilo kein laba ka urang nong. Ong Đoàn Văn Vân daok di Mỹ Thuận 1, xã Phụng Hiệp brei thau: Ong klak tabau salih tapa pala cam xoàn hu 3 thun ini mai. Yaom lac ini thun akaok meti ong paik baoh min tui kuhria jeng laba hu dom rituh trieu dong. “ Thun ini lac thun akok meti cam xoàn paik baoh pablei, dahlak kuhria mboh laba hu labaih 600 triệu đồng. Thun hadei meng hu laba rilo jang, kayua thun akok brei bayar abih jien pah mac jamraih, phun pajaih, khak, jru khik caga phun pala dom janih karei karei abih jien ye, thun camereip buh tame labaih 300 triệu, oh hu laba rilo, tapa thun kadua meng hu laba 80 -90%.”

        Tui ong Nguyễn Thế Tự - Pho akok jabat Ngak nong saong patagok palei pala huyen Phụng Hiệp: Dahlau diah huyen hu labaih 9.550 ha tabau. Jaik 3 thun tapa, urang nong dalam huyện salih labaih 2 ribau hecta tabau langiu ar pacang kraong ia  bhian njauk ia dauk, takik năng suất saong labiah 200 ha bein phun brei takik baoh tapa pala phun karei, paglaong taneh pala phun mbang baoh di huyện tagok labaih 7.600 hecta. Huyện salih janih phun pala njauk saong hu jak jeng meng thau palih ruah phun pala lagiah saong taneh riya, tacei pato urang nong ilamu pala, karaj palei daok ba mbuan lagaih ka dom baoh sang hu phun jien piah salih phun pala. Thun blaoh, bruk pala phun mbang baoh di huyện Phụng Hiệp hu patagok khang, mek hu 470 tỉ đồng. Ini yau brei mboh bruk salih janih phun pala nan, lac jalan ngak njauk di huyện dalam tukvak tapa. Tui dom urang jakar huyện Phụng Hiệp dalam dom thun anak tal brei patui bruk cak rok, peih praong taneh pala dom janih phun hu kein laba glaong, dak harei dak padang bhum taneh pala phun mabng baoh, saong brei pambuak bruk haong dom doanh nghiệp ngak pandap piah hu labik pablei tani tanat ka dom janih kaya nong di palei, paglaong raidiuk urang nong dalam huyện./.