Urang ngak gah jik pet

Baoh sang sa-ai Thông Minh Tý daok di palei Bình Thắng, xã Phan Hòa, huyện Bắc Bình, tỉnh Bình Thuận lac baoh sang jaik kathaot, hu rai diuk kan kandah. Oh ngak hu padai bilan Đông Xuân kayua tua riya pandiak bhang, diuk pasang sa-ai ba gauk nao tame Đồng Nai piah ngak pah. Diuk pah pablei kuan lisei, daok sa-ai nao galam pandap, yaok harei duah hu labaih 300.000 đồng piah raong 3 anek sit. Jit ruak rah tabiak, diuk sa-ai lahik bruk kayua kuan lisei kareik pabah mbang, sa-ai Tý jeng lahik bruk ngak. Kayua yau nan ye, baoh sang sa-ai biak bui sambai tuk urang jakar xã  daa tagok mek jien daong di Raja-ei. Yaom jien nan hu daong ka sang sa-ai trun meneng kan kandah.

  Tui yaok pataom oh ka ginup abih, tỉnh Bình Thuận hu labaih 190.000 urang hu mbang tui pok jien daong di Raja-ei. Tal urak ini, tỉnh hu daong blaoh ka labaih 113.593 urang. Ong Thông Minh Linh, akaok UB bhap bani xã Phan Hòa, huyện Bắc Bình brei thau: kan kandah urak ini nan lac bruk yaok pataom ba-yar jien daong ka urang ngak tự do. Dom urang ini gaok kan kandah min njauk hu yaom jien mek tame tui tiêu chuẩn baoh sang jaik kathaot. Yau nan biak kan ka puk palei. Kayua yau nan ye njauk nao duah thau ka nyu cambaih, njauk jak ba tổ dân phố, pakat ủy Chi bộ, blaoh akaok ban Công tác mặt trận gam hu mbaok tame piah plaih bruk daong  oh njauk manuac urang. "Urak ini, dom urang hu ba-yar jien blaoh nan lac baoh sang sarak karja, baoh sang hu buh rilo pren yava ka cách mạng, dom urang hu daong jien yaok bilan, baoh sang kathaot saong jaik kathaot. Kan kandah di abih nan lac bruk duah thau urang ngak tự do. Urak ini jeng daok duah thau dom urang nan, ini lac bruk biak kan kandah".

Amuk Trần Thị Thanh Nhàn, Phaok Akaok Sở Lao động - Thương binh saong xã hội tỉnh Bình Thuận brei thau, kan kandah prong abih di dom puk palei nan lac duah thau ka bruk ngak dalam nyaom urang ngak njauk lahik bruk oh hu harak pambuak bruk: "Tui Sarak 42 saong Sarak 15 ddi Thủ tướng Raja-ei, Mentri Lao động – TB&XH oh hu harak tacei pato cambaih laih ka nyaom urang  ini. Tapa dom mbang khan brei thau, pok panuac caong, ye Mentri jeng oh ka hu harak tacei pato cambaih, nan ye hu rilo jalan saneng karei di gauk, ba tal bruk peih ngak oh dreh gauk, oh samu gauk.     

   Piah lang talaih kan kandah ka dom puk palei, Sở Lao động Thương binh saong xã hội tỉnh Bình Thuận hu tabiak harak tacei ba dom asal kadha taduan mek, pasang iek hồ sơ dom nyom urang ngak tự do saong baoh sang pablei salih. Taphia di nan, peih dom van pathram ka urang pal akaok saong dom urang jakar ngak bruk di dom xã, phường peih ngak harak yaok pataom saong duah thau manuac urang. Urak ini Bình Thuận taduan mek hu 22.785 harak gar caong khin daong nan lac urang ngak tự do saong baoh sang pablei salih.

   Dom urang ngak tự do lahik bruk ngak lac urang njauk gaok kan kandah rilo di abih kayua jit prong Covid-19. Kyua YAU nan ye, dom puk palei dalam tỉnh Bình Thuận jeng daok samar pasang iek, piah ka bruk daong di Raja-ei  nao tal tangin bhap bani samar di abih. Bruk pasang iek njauk peih ngak ka nyu tani tanat saong hu bruk pasang iek di bhap bani jang yau di dom jabat chính trị - xã hội. Hu yau nan meng peih ngak njauk haong jalan ngak di Raja-ei lac oh brei kurang urang caong khin daong saong oh caik rah tabiak bruk mbang cakak jien daong./.

Urang lang: Jasi-22/6