Lac sa dalam 60 anek saih di  xã Cư Suê hu saai  H’Hen pok brei pok jien bac , H’Ngân Niê, anek saih tal 6, sang bac Trung học cơ sở Lê Hồng Phong, xã Cư Suê bui sambai lo.  H’Ngân brei thau : Adei lac urang dok dalam palei song saai H’Hen, adei biak iek prong hatai khang di saai H’Hen. Meng harei saai  H’Hen mek hu angan urang siam binai di  Việt Nam 2017 adei mong iek saai lac kreih camin hadah piah ngak tui. Hadei di sa thun kham merat, adei mek hu angan anek saih naih joi song harei ini taduan hu pok jien bac di saai . Ngan song adei, pok jien bac yaom 1 triệu đồng, lac pok pandap Tết avar bo saai  H’Hen hu alin brei ka adei

 “Anek bui sambai lo tuk taduan hu pok jien bac di saai  H’hen. Anek sinya bac da-a biak siam piah pabak hatai sa-ai H’nen. Saai H’hen lac kreik camin piah nek kham merat jang .”

Uak samar dom tanyaok ia meta kayua drut droi tuk khol hulin tangi sua bruk urang siam binai H’Hen dong ka drei ngak sang bahrau, ong Y Cil Niê, cei taluac di H’Hen brei thau: Hu kamuan  Hen bo sang taik tahak hu salih tapa sang pakat 4 siam mekre hacih saat.

 “Hulin gam bui sambai gam tatuak drei oh thau biai, kamuan nyu daong ka sang lin biak rilo, hulin tok thau likau haong pô lingik brei ka nyu hu pren yava khang kajap song jak jeng rilo jang.”

Meng di tuk mek hu angan urang siam binai Việt Nam 2017 bloh tal Top 5 urang siam binai dunya, H'Hen Niê oh ka tuk halei padauk bruk anai mai meng palei  Ê Đê kan kandah, labik daok hu dom adat cambat biak trak damak ka urang kamei yau tok pasang tuk umo sit, ndik tapui anek tuk daok ranaih, padeih bac avar. Song anai khin salih bahrau bruk nan.

Dok hadar, dalam panuac javap jalei di mbang pakacah urang siam binai  Việt Nam 2017, H'Hen Niê lac kaoh tabiak 70% jien  thưởng piah ngak pahla. Urak ni, H'Hen Niê caik jaik abih jien thưởng piah ngak pahla. Mai veik palei hadei di mbang jak jeng praong di  Miss Universe 2018, H'Hen Niê hu rilo nhà tài trợ thưởng brei yaom jien tagok tal yaok tỷ đồng. Salih ka bruk pandar jien nan ka eng drei atau ka sang drei ngak phun dhar, H'Hen Niê khan lac caik tong abih ien nan ka dom danak dak brei ka bhap bini. Dom pok jien bac; padang ngak sang cộng đồng; khik ramik akhan haroh di urang Ê đê, ngak pambah mbang palei , duah halau ia hacih saong ba điện truac hadah ka palei … lac dom bruk bo H’Hen dok ngak ka palei  Sut M’Đưng di drei:

 “Hen sahaneng lac Hen njauk mai veik palei di drei  piah dong dom bruk hagait dok kurang pak ni. Amaik bhian biai haong  Hen lac tong abih bruk gait nek hu, dom pok jien  thưởng bo urang brei ka anek, pok jien nan nek oh haok ia huak ngak tabiak ye anek meda parabha veik ka dom adei saai dok kurang. Nan lac panuac pato biak gheih bo amaik hu pato  ka Hen”

Yaom lac daok di labik halei, H'Hen Niê jeng brei mboh jalan diukrai siam mekre, tuk halei jeng njauk hatai song yaok janih bo oh cang kham merat piah njauk hatai, dar phol tong abih dom bruk hagait bo rai duik ba mai ka drei. Nan lac jalan duik rai di sa urang oh kuhri kuhria ka eng rup drei, boh tuk halei jeng abih hatung hatian ka bhap bini. Kayua yau nan ye bo H’Hen tuk halei jeng halan hatian, anit ka urang . Amuk H’ức Ê ban, akaok palei  Sút M’đưng, xã Cư Suê brei thau, jalan duik rai song ngak bruk di  H’Hen hu ba chreih chrai ka puk palei, ngak brei salih bahrau jalan sahneng, jalan duik rai klak oh daok lagaih meng lavik mai di palei Sút M’đưng.

 “Hu Hen nyu ba chreih chrai ka puk palei nan ye, urak ni amaik ame thau hu hatai khin di anek bhik, nan ye amaik ame oh pacap nek tok pasang tuk daok sit, oh kateik greik anek ngak dom bruk hagait bo anek oh takre. Urak ni Hen nyu dong gait ye lin lac akaok palei lambaok ka mik va palei  Sut Mđưng kol hulin biak bui sambai. Mik va biak kan, urak ni hu Hen dong yau nan ye khol lin biak uan tabuan taduan mek dom hagait nyu ngak ka khol hulin .”

Khan aow  meng khan bac meriak bhong, cambuai kalao rak grauk puk palei song sap cồng chiêng dalam palei Sút M’đưng hu yava tagok yau brei thau thun bahrau ini hu rilo bui sambai  jang song siam mekre jang. Song panuac di  H’Hen Niê sa mbang tra hu menyi tagok dalam chreih chrai, bui sambai di puk palei./.