Ndih tapui tabiak song prong tagok di xã Phong Dụ, sa xã bhum ceik kan kathaot saong daok kurang rilo janih, gru Vi Đức tuk daok sit biak rambah rambeip. Thau hu dom glaih glar ini nan ye gru dak thau lac hu bac da-a meng dong ka dom anek saih bhum glong hu rai duik trei sir haniem phol di harei hadei. Ngan saong 26 thun pato pakai di 2 xã kan kandah abih di Tiên Yên lac Phong Dụ song Hà Lâu, Gru tuk halei jeng iek bruk pato phổ cập lac sa jalan dong ka uranaih di labik ni hu ilamu piah jeng sa urang menuac hu kein ka XH harei hadei. Gru Phúc khan lac:

Pato pakai, pasram megru dom ilamu ka dom adei anek saih, ka sa lac ilamu sinh hoạt, ilamu taom gaok, ilamu ngak bruk, ilamu tự vệ, ilamu pacang caga bala song tong abih ilamu dalam rai duik ka dom adei anek saih hadei ni jeng menuac jeng urang.

Tuk vak ngak bruk di xã Hà Lâu, gru Vi Đức Phúc song dom cei gru anai gru dalam sang bac bhian nao tal dom puk, palei piah jak ba mik va urang bangsa takik brei anek kamuan drei nao bac. Anek saih di labik ni tok nao bac dalam harei pandiak, dok harei hajan ia sua ye dok di sang kayua jalan haluk sit bhian glut jaleih. Min dalam tal bac, meyah kurang 1 anek saih halei ye gru Phúc nao tal sang piah jak ba adei nan nao bac.

Tui bruk biak karei di bhum glaong labik ini, dom gru pato langiu bruk pato pakai tui danak dak pato megru phổ thông, daok bhian peih dom bruk ndung bak ilamu bangsa bhum ceik piah dui pachreih anek saih nao tal sang bac. Padang dom kalup kapul doh then, doh sap Dao atau peih dom bruk pakacah thể dục thể thao, ngak pamedeih tagok bruk jum pataom di kapul nyaom yau dui co, jhul gaiy, nao cà kheo, ngak tabiak “bein njam adei khik” atau “ tapon menuk khăn quàng đỏ”… nan lac dom bruk ngak yaok harei ba mai bui sambai, ngak ka dom adei anek saih labik ni chreih chrai hu mbaok tame, dong ka anek saih song gru pato di sang bac Hà Lâu anit ranam gauk jang.

Thun bac 2014 - 2015, xã Hà Lâu mek hu tanut chuẩn phổ cập tiểu học song THCS, tong abih anek saih jeng hu tốt nghiệp song bac bloh danak dak njauk tui tuk vak ba tabiak, bruk anek saih klah bac meteh dhi oh dok tra. Ni lac dom bruk biak njauk pok meyaom di sa sang bac dok di xã atah bayah song kan kandah di abih di huyện Tiên Yên, sa huyện ralo meng lac mik va bangsa Dao, Sán Chỉ, Sán Dìu. Ong Lã Tiến Cường, sa gru pato dalam sang bac brei thau

Tong abih urang di labik ni jeng thau bruk abih hatai jai di gru Phúc. Gru Phúc pato tal urak ni lac nhiệm kỳ ka 2 , taong abih dom gru pato dalam sang bac, urang dalam palei song anek saih di labik ni jeng anit ranam song iek prong gru.

Bahrau ni, sang bac bangsa gam bac gam dok TH&THCS Hà Lâu hu karja huyện Tiên Yên brei adat padang ngak sang gam dok ka anek saih song taneh prong labaih 1.400 m2, hu 3 tal, dalam nan hu 19 balik dok, sa balik mbang, 1 sang ging, sa balik quản sinh song 4 labik vệ sinh. Abih tih phun jien padang ngak sang gam dok ni tagok tal 12 tỷ meteh meng phun jien buh brei ka danak dak bruk ngak pakat nega. Bruk siam mekre nan jeng hu mai meng dom rik dong oh sit di hiệu trưởng Vi Đức Phúc, gru lac sa dalam dom urang camereip cong khin padang ngak sa labik mbang labik dok piah dong ka dom anek saih, cei gru, anai gru daok atah di sang trun takik glaih glar. Gru thau lac kan kandah prong di abih di bruk pato megru bhum ceik nan lac jalan dhuan atah bayah, nao mai kan kandah meng sang tal sang bac , rilo tuk njauk “ tapa ceik caluai ia” meng nao tal sang bac hu. Meng dom suh sah, sahaneng duah jalan ngak yau habar samar ba danak dak sang gam bac gam dok hu jeng biak, gru Phúc eng drei buh tame 65 triệu đồng, sa yaom jien biak prong ngan song sa urang luac rai tui bruk pato pakai, piah blei 2 gian sang jiak tapen sang bac piah caga labik ka bruk padang ngak. Sa bruk ngak njauk pok meyaom, brei mboh hatai khin padang sa labik pato pakai khang kajap ka uranaih bhum ceik di xã Hà Lâu ni. Ong Kiều Xuân Cao, ame di sa anek saih dok bac di sang bac Hà Lâu brei thau :

”Dut song dom thun dahlau ye urak ni hu Đảng song karja caik hatai sangka, dong ka dom  kamuan mbang bac biak siam. Sang bac hacih saat, siam mekre dom anai gru biak sangka, tacei ba dom anek saih kham merat nao bac.

Piah khik hu dom jak jeng di bruk pato pakai phổ cập di xã Hà Lâu jang yau di huyện Tiên Yên brei hu bruk njauk gauk, sa hatung hatai hong gauk di taong abih urang meng dom pakat karja, sang bac, tal dom anai gru, cei gru jang yau amaik ame, anek saih di labik ni. Ong Vũ Nhật Quang, akaok jabat pato megru huyện Tiên Yên khan lac:

Hu mbaok tame bruk pato phổ cập oh lac ta-eng hagait gah pato megru, bo daok hu dom kapul nyaom menuac urang ba drei tame saong gah pato megru. Gru Phúc jeng lac sa kreik camin, saong lac oh ta-eng hagait gru Phúc bo urak ni hu rilo đơn vị sang bac daok kham merat peih bruk pato phổ cập.

Tabiak truh sang bac, thaot binguk sarak dalam hatai sahaneng di hulin nan lac bruk abih hatai jai di gru Vi Đức Phúc, hulin thau lac dom kham merat ba akhar haroh tagok bhum ceik di gru nyu mai meng hatai anit ranam bhum taneh song anek menuac Tiên Yên. Anak meta dok rilo kan kandah, tavak tavaiy, min meng hatai anit ranam, hatai jia tame bruk pato pakai di bhum ceik glong ni, cong khin uranaih hu nao tal sang bac, piah bac akhar, bac haroh, bac ngak menuac, gru Vi Đức Phúc song dom gru pato bhum ceik Tiên Yên dok pabam dom boh yamen ka bruk pala menuac di labik ni./.