Atah di ni jiak 20 thun, tuk dok pan akaok mban Tuyên giáo Hội Liên hiệp urang kamei tỉnh Đắc Lắc, amuk H’Luộc N’Tơr (bangsa M’nông) hu hội nghị hiệp thương ba tame ứng cử Đại biểu Quốc hội. Meng angan je saong ilamu ngak bruk di sa urang kamei jakar bangsa takik daok ranaih umo, amuk H’Luộc hu cử tri tỉnh Đắc Lak palih ruah, pok ngak urang Quốc hội khóa 10.

Sang dok di palei bhum atah bayah huyện Lak, atah di ban sit Buôn Ma Thuột labaih 50km, pasang nao ngak bruk atah, amuk H’Luộc N’Tơr iek glang 4 urang anek dok dalam umo mbang, umo bac, anek sit di abih bahrau 4 thun. Biak rilo kan kandah, min meng hatai kham merat, oh phụ lòng cử tri pilih ruah, amuk H’Luộc tame bruk ngak di drei meng bruk nao tapak tal puk palei, duah thau cambaih rai duik di bhap bini. Tapa nan, amuk song kapul urang QH tỉnh hu panuac kiến nghị song karja tỉnh song gah chức năng, langyah. Nan ye, meng dom thun camereip, amuk H’Luộc N’Tơr hu caik veik dalam hatai bhap bini rilo siam mekre. Cử tri Nguyễn Thị Thanh dok di palei 3, xã Ea Tiêu, huyện Chư Quynh hadar veik:

Thun 1983, hulin tame ni tuk nan biak rambah tame palei bak gluh baok. Thun 1997, kapul urang Quốc hội tame ni, khol hulin hu pok panuac caong tagok kapul urang Quốc hội, saai H’Luộc biak sangka lac haong kapul ndom haong QH ngak jalan ka bhap bini. Hadei di nan, khol hulin hu dong ngak jalan. Dom palei dok jiak ni, dahlau deih biak kan kandah, saai H’Luộc hu panuac lac haong kapul urang QH nan ye hu bruk sangka, dong brei. Urak ni mik va dalam palei takik glaih glar jang.

Hatai sahneng siam mekre di cử tri ka sa urang kamei lambaok bangsa takik sami samar, naih gheih, ngak bruk hu siam lagaih yau nan, dok ngan saong amuk H’Luộc N’Tơr ye nan lac dom bruk oh var hu dalam rai ngak urang lambaok bhap bini. Hu rilo mbang, amuk nao taom gaok cử tri di bhum atah bayah, njauk nao takai tapa dom jalan gluh bok, gam mbang, gam dok, gam ndih hong mik va, piah thau dom cong khin di mik va. Hadar veik dom bruk nan, H’Luộc N’Tơr lac:

Tuk khóa 10, meda lac jalan meng huyện tal pasak xã oh ka hu jalan nhựa, tok hu jalan huluk min. Yau nan ye, khol hulin nao taom gaok cử tri, khol hulin ndih veik melam piah dok song cử tri ngak ka nyu salah bruk taom gaok di drei, oh nao dalam harei hu. Tal urak ni, điện, jalan, sang bac, bilai iek ruakhu ngak biak siam, meda lac siam di abih dut song dom tỉnh bhum ceik dalam taneh ia.

Angan je, ngak bruk naih gheih saong lợi thế di urang kamei lambaok bangsa takik, H’Luộc N’Tơr dak harei dak brei mboh cambaih oh lac di nghị trường, bo dok hu pambak khang dalam rai duik bhap bini puk palei. Kayua yau nan ye, amuk hu cử tri tỉnh Đak Lak jia tame, pok ngak urang Quốc hội mbang 11 song 12 mbiah tal tuk padeih hưu. Ngan song cử tri Đak Lak jang yau mik va bangsa M’nông di huyện Lăk, urang kumei Quốc hội H’Luộc N’Tơr hu ngak ka urang mboh hadah mbaok meta. Kayua tapa bruk ngak di drei, amuk jeng sa boh tatua pambuak bhap bini haong đảng song karja. Amuk H’Măng dok di palei Pây Bi, xã Đắc Nuê, huyện Lắc, tỉnh Đắc Lắc brei thau: 

Tuk H’Luộc trun taom gaok tapak cử tri jeng khan hu asal kadha di QH song bhap bini, tapa nan bhap bini hu ndom tagok hatai cong khin di drei piah ka H’Luộc ba tagok QH. Sarak dong sang danaok, dong anek pajai, phun pajaih, hadei di nan hu ngak jalan, pabak điện di bhum atah bayah.            

Kreik thun 2005, amuk H’Luộc N’Tơr hu pok ngak phaok kapul urang Quốc hội tỉnh Đắc Lắc, saong lac urang dalam Hội đồng bangsa di Quốc hội. Meng ilamu di sa urang jakar, urang gru pato lavik thun, hu rilo ilamu, abih di nyu nan lac urang kumei bangsa M’nông hu ndik tapui tabiak song prong tagok di bhum ceik Đak Lak, amuk H’Luộc dak thau cambaih jang ka dom bruk di puk palei. Pagap yau bruk pato megru, likei kamei samu gauk, bruk bangsa, bhum ceik, urang ngak, bruk ngak…

  15 thun kak kajap haong bruk ngak di QH, muk bà H’Luộc N’Tơr sami samar dalam bruk ngak, ngak siam bruk lac urang lambaok bhap bini. Taphia bruk đột xuất, yaok thun 3 bilan, muk tabiak truh Tây Nguyên nao Hà Nội hu mbaok dalam nyaom biai. Dahlau song hadei di yaok mbang nyaom jeng hu taom gaok cử tri, piah peih ngak hu siam dom sarak di Đảng song karja ngan saong bhap bini. Meng dom rik dong ka bruk ngak di QH jang yau ba mai kein laba ka cử tri song bhap bini puk palei, amuk H’Luộc N’Tơr hu akaok negar alin brei Huân chương Lao động hạng 3, Thủ tướng rajaei brei harak meyaom song rilo phần thưởng prong glong karei karei. Min tui amuk H’Luộc N’Tơr, bruk pok meyaom prong di abih ngan saong muk lac tuk mboh cử tri song bhap bini njauk hatai tuk  ngak urang Quốc hội di drei ./