Urang kamei camereip klauk  vac xin pacang caga Covid 19 

Di mbang nyaom Rajaei bilan 12, Thủ tướng Nguyễn Xuân Phúc njauk hatai haong bruk patabiak tanut kathaot rilo gah pakat negar vaktu 2021-2025. Tui Mintri LĐTB saong XH, ini lac jalan piah tacei tabiak, piah mboh, piah thau ginup jang ka sang kathaot, sang jaik si kathaot, piah tapa nan ba tabiak dom sarak, jalan ngak pamaong tal patrun kathaot rilo gah, khang kajap. Tui nan, tanut kathaot bhum palei pala lac 700.000 đồng sa urang sa bilan, di ban sit, ban praong lac 900.000 đồng sa urang sa bilan; baoh sang jaik si kathaot bhum palei pala hu jien mek tame kuhria tui akaok menuac lac 1 triệu đồng, di ban praong, ban sit lac 1 triệu 300 rabau đồng.

Học viện Quân y (Mintri Quốc phòng) brei thau: harei ni (30/12) meda ngak salah bruk klauk iek di labaih 20 urang, kapul jru 50mcg daok veik, dahlau di tuk salih tapa klauk iek di 20 urang puac abih gam haong kapul jru 75mcg. Tal urak ni, dom urang halain hatain hu klauk iek vắc-xin bahrau mboh pandiak njuan, oh njauk iek ruak. Dalam tukvak klauk iek patui di nan, dom urang halain hatain brei hu iek ruak dahlau, piah thau hu ruak dị ứng halei oh, dut iek darak, chụp X-quang... khik ginup tanut siam abih di prein yava dahlau di tuk klauk iek.

Pambuak tal bruk ba urang ruak 1440 tame negar suan hukum, CA tỉnh An Giang brei thau lac daok ngak harak gar piah ba tabiak kaoh tui hukum. Tal urak ini, tỉnh duah hu dom urang F1, F2 di urang ruak 1440. Tỉnh ủy An Giang hu panuac ieu dom urang jakar, dom gah pambuak tal bruk nan pasang iek veik saong ngak catang dom bruk oh ka lagaih dalam pacang caga jit. Gam haong nan, brei patagok bruk pambuak gauk haong dom gah mesruh pacang bruk ba menuac tame negar suan hukum, jak ba bhap bini bhum taphia negar samar tacei tabiak kol ngak suan, pacang cakak jit ruak njaom mbak.

Abih 8 urang F1 di urang ruak 1452 daok di Đồng Tháp jeng âm tính mbang ka 1 haong SARS-CoV-2. Langiu di nan, 1 urang tame negar suan hukum meng Campuchia hu ba nao daok karei jeng mboh âm tính. Urang ruak ka 1452 lac sa dalam 6 urang meng Myanmar mai Campuchia tame negar Việt Nam suan hukum di harei 24/12 tapa jalan sit, jalan haluk. Tal urak ni, 4 dalam 6 urang njauk njom Covid-19, 2 urang daok veik âm tính mbang ka 1.

UBND quận 10 (TPHCM) bahrau tabiak mbaok Jalan nao takai melam di labik Kỳ Đài Quang Trung daok di phường 6. Meng 29 labik pablei pandap mbang menyum saong 20 labik pablei pandap karei, Jalan nao takai melam quận 10 peih tabiak meng mon 6 biar harei sup tal mon 11 melam, meng harei ngar tal harei adit yaok adit, di harei sanecar yaok adit saong dom harei karei dalam adit meda hu danak dak daoh takơ pamere bhap bini. Tapa nan padang hu labik chreih chrai piah nao tal, ravang me-in pambuak haong patagok bruk ngak mbang melam, jhul bruk ngak mbang di quận cakrok khang kajap.

Dalam harak ndom puac uan rok thun bahrau 2021, Tổng Thư ký Liên hiệp quốc Antonio Guterres hu panuac ieu dunya ngak brei thun 2021 jeng “sa thun di bruk pambuak gauk” – padang saron mbon di anek manuac haong langik tasik, langyah dom kan kandah di langik tasik, pacang cakak jit praong Covid-19. Ong jeng ndem lac dom caong maong di LHQ dalam thun 2021 lac sa thun peih bruk padang ngak sa liên minh dunya ka bruk trung hòa khí carbon meng urak ni tal thun 2050.

Harei ini (30/12), Liên minh châu Âu mbaoh tangin tame Harak sanya njauk gauk hadei di Brexit. Dahlau di nan, Harak ini hu urang lambaok 27 taneh ia di Liên minh châu Âu njauk gauk brei tapa. Tui kuhria, taong abih asal kadha dalam harak nan hu 1250 blah hu ba tagok “Công báo châu Âu” di harei paguh (31/12) piah peih jalan ka bruk ba tame ngak iek meng harei 01/01/2021. Tui kuhria, Quốc hội châu Âu meda pataom gauk veik dalam bilan 2 anak tal piah brei tapa. Daok gah negar Anh, Hạ viện taneh ia ini jeng hu peih mbang nyaom di harei ini (30/12) piah brei tapa harak sanya gauk hadei Brexit.

Ấn Độ bahrau peih jalan radaih pasei ala mbaok haluk oh hu menuac peih camereip abih di taneh ia ini. Radaih pasei nan nduac tui lập trình ala bruk tui iek di pasak tacei ba haong rilo camera bahrau, hu caik vil val sang ga haong mangaok radaih pasei. Ấn Độ urak ini hu 18 ban hu jalan radaih pasei ala mbaok haluk saong daok kham merat tal thun 2025 hu 25 ban hu radaih pasei nduac ala mbaok haluk. Ini lac sa dalam dom janih radaih nao mai praong, pabak hu bruk nao mai di yaok triệu menuac yaok harei./.

Urang lang: Thu Thảo -Mousaphuong- 30/12