Di Tiền Giang, durian dok tame bilan paik baoh song yaom pablei biak glong

Harei kabroi, Quốc hội peih bruk pilih ruah, brei padeih ngak, brei tapa angan dom urang ngak bruk pakat glaong di kanja, Quốc hội, rajaei. Meng rilo phiếu pachreih tui, Quốc hội hu brei tapa sarak ka bruk brei padeih ngak akaok Quốc hội, akaok Hội đồng pilih ruah pakat negar ngan haong muk Nguyễn Thị Kim Ngân. Ong Vương Đình Huệ - ủy viên Mintri Chính trị, bí thư Thành ủy Hà Nội – hu pok tagok piah ka Quốc hội pilih ruah ngak akaok Quốc hội, akaok Hội đồng pilih ruah pakat negar. Harei ni (31-3), UBTVQH meda pathau khan QH dom bruk ndem mayai nao mai saong langyah, pang dom panuac khan brei thau di urang lambuak Quốc hội. Patui di nan, Quốc hội ndem mayai nao mai, brei tapa angan saong pilih ruah akaok Quốc hội, akaok Hội đồng pilih ruah pakat negar meng jalan buh phiếu kandauk. Jeng dalam harei ni, akaok Quốc hội bahrau hu pilih ruah tuyên thệ tanduan bruk.

Hội đồng bangsa di Quốc hội mbang 14 hu tamat sa vaktu ngak bruk siam lagaih. Hội đồng bangsa mbang XIV tui jalan ngak meng kan song ilamu di dom mbang dahlau, patagok hatai sahneng song bruk ngak, jum pataom, hadah krah, hu rilo salih bahrau dalam bruk ngak song mek hu rilo jak jeng prong, tong abih 3 gah lac: padang ngak hukum, pasang iek song brei panuac ka dom bruk prong di taneh ia, rik dong jhul pakhang bruk salih bahrau. Pagap yau tui panuac caong di Hội đồng bangsa, mbang camereip dalam dakrai Quốc hội batabiak 2 sarak ka sarak bangsa, pasang iek brei tapa danak dak tong abih gah song danak dak pakat negar patagok kinh tế-xã hội bhum bangsa takik song bhum ceik tuk vak 2021-2030.

Tukvak maong 10 melam 30/3 pui khuah di mblang radaih angaok jalan Thống Nhất, phường Bình Thọ kayua Cảnh sát jalan mbak ban Thủ Đức khik ramik. Tuk mboh pui khuah, urang ba gauk duah jalan padam pui min oh jeng. Kayua pui khuah biak khang jaik labik bhap bini daok nan ye rilo bhap bini klaak nduac. Meng di tuk taduan hu panuac khan, kapul pacang khuah padam khuah ban Thủ Đức samar drak hu mbaok di labik khuah nan. Hadei di nan dom minipui padam hu abih, rilo drap ar, radaih mac njauk pui mbang abih. Patuah lac meuac sia oh hu thei njauk hagait. Labik khuah lac mblang radaih khik dom sruh radaih ngak suan adat jalan mbak kayua Cảnh sát jalan mbak ban Thủ Đức khik ramik.

Di Tiền Giang, durian dok tame bilan paik baoh song yaom pablei biak glong. Dom urang nong hu bein durian paik boh dalam tuk vak ni biak bui sambai kayua hu laba glong meng phun pala ni ba mai. Tui gah ngak nong tỉnh Tiền Giang, năng suất tui kuhria 20 tấn/ha song yaom labaih 90.000 đồng/ sa kg yau urak ni, yaok hecta durian mek hu labaih 1,8 tỷ đồng. Hadei di tuk kaoh abih phun jien urang nong laba hu jiak 1 tỷ đồng.

Tui panuac khan meng Tổng công ty jalan pasei Việt Nam, dalam 2 bilan lac bilan 4 saong bilan 5/2021, dom doanh nghiệp jalan pasei peih danak dak pachreih tuai nao mai ngan haong labaih 10.000 vé radaih pui trun meteh yaom di dom sruh radaih pui nudac Bắc-Nam. Tui nan, danak dak hu pandar ka tukvak nao radaih pui meng harei 5/4 -28/4 saong meng harei 4/5- 26/5/2021. Daok radaih pui SE5/SE6 pandar meng harei 5/4- 28/4 saong meng harei 4/5- 24/5/2021. Danak dak pachreih tuai nao pandar ka tuai blei vé dahlau di harei radaih pui nduac meng 3 harei tagok. Yaom vé samu meteh yaom vé nao dalam tukvak nan. Min, yaom takik di abih di 1 vé sa tuai (dalam nan hu gam jien je VAT saong jien bảo hiểm tuai) lac 30.000 đồng/vé.

Harei kabroi (30/03), Ngoại trưởng Nhật Bản Mô-tê-gi Tô-si-mít-su (Motegi Toshimitsu) brei thau karja negar ni brei padeih pabak jien dong bahrau ka Myanmar , hadei di tuk bol bala negar ni chap khik dom urang pal akaok karja, dom urang dang akaok bang song dom urang pakat glong di đảng Liên đoàn negar kayua dân chủ (NLD) di bilan 2 meng bloh, ba tal bruk srau kadau urak ni. Theo Ngoại trưởng Mô-tê-gi, Nhật Bản hu mong lac sa negar pabak pok jien dong kinh tế prong abih ka Mi-an-ma song negar ni urak ni oh batabiak danak dak ka pok jien dong bahrau halei dalam tuk vak anak tal.

Urang pan akaok 23 negar gam haong gah Y tế dunya harei 30/3 hu tabiak panuac ieu dom negar di dunya hu mbaok tame padang ngak sa sarak dunya ka pacang caga jit praong, ngan haong jalan ngak lac patrun dom khat lahik ka manuac sia dunya tuk dang anak dom jit praong di anak tal. Jalan ngak praong di abih di bruk padang ngak sarak dunya ka pacang caga jit praong lac paglaong prein pacang caga di dunya anak jit praong dalam vaktu anak tal tapa bruk padang sa hệ thống brei thau dahlau, klah rabha dữ liệu saong bruk ngak tabiak, parabha dom janih vắc-xin, dom janih jru, dom jalan pasang iek saong taong ruak ka nyu cambaih laih saong samu gauk di taong abih dom negar.

Yaom meh dunya gam gam trun khang, dalam oh ka tal sa harei nyu trun labaih 40 USD/ounce song laik trun tanut 1.700 USD/ounce. Yau nan dalam sa harei, yaom meh dunya lahik labaih 1 triệu 120 rabau đồng/sa mbiah, di tanut 1.689,9 USD/ounce. Hu thau tui yaom di gilang pariak, yaom meh dunya meda dok 47 triệu 190 rabau đồng/sa mbiah. Yaom lac yaom meh dunya trun samar, min yaom meh dalam negar trun biak suai./.

Urang lang: Thu Thảo – Hani Pha – 31/01 10:53:48