Chủ tịch Quốc hội Vương Đình Huệ

Mesup ni, Hội đồng palih ruah pakat negar nyaom biai ala bruk  pal akaok di  Chủ tịch Quốc hội, Chủ tịch Hội đồng palih ruah pakat negar Vương Đình Huệ tong yaom abih gah bruk palih ruah.  Tapa pataom veik pathau khan  di dom tỉnh ban, cử tri nao palih ruah labaih 99,6%; Cử tri hu palih ruah ginup 100% dom urang QH tui hukum; urang HĐND pakat tỉnh, huyện song xã palih ruah hu jeng glong jang dut song mbang dahlau. Hadei di nyaom biai, tal harei  12/6 Hội đồng palih ruah meda khan brei thau angan dom urang  hu pilih ruah ka QH mbang  XV song urang ka  HĐND dom pakat  tui njauk tuk vak hukum ba tabiak song pasang iek langyah dom bruk hu pagam tal bruk palih ruah…Hội đồng palih pakat negar, Ủy ban palih ruah dom pakat xác nhận tư cách urang hu palih ruah piah pok tagok Quốc hội song  HĐND mbang bahrau.

Harei 9-6, Jabat Rajaei hu harak brei thau panuac tacei pato di Phó thủ tướng Lê Văn Thành ngan saong danak dak Pasak Chí Linh dalam tỉnh BR-VT  hu buh jien tame ngak meng 25 thun dahlau min oh ka ngak salah. Tui nan, Phaok Thủ tướng jao ka Mintri Tài nguyên - môi trường dang tabiak, pambuak bruk haong dom mintri: Jien padai, padang ngak saong Thanh tra Rajaei duah thau cambaih suan, njauk dalam bruk peih ngak danak dak, langyah tui adat hukum. Hu thau, ini lac labik đô thị camereip abih dalam taneh ia hu Thủ tướng Rajaei pasang iek, mbaoh tangin brei ngak, min mbiah tal harei ini, hadei di 10 thun peih ngak saong 15 thun brei dui atah tukvak padang ngak, danak dak jeng daok ka oh ngak salah.

  Yaom lac dunya daok hu jit ruak, min yaom menyek tamo di dunya dok gam gam tagok glong, ngak kan ka yaom  xăng menyek di drak pasa dalam negar. Piah patrun bruk tagok yaom pablei rai  xăng menyek dalam negar , dong tani tanat yaom pandap panda di drak pasa, dong ka rai duik, bruk ngak mbang pablei salih  di bhap bini  song doanh nghiệp, dalam mbang ramik tacei pato yaom kaom jiak di abih di puac bilan 5, dua Mintri  Công thương – jien padaibrei buh tabiak meng kadung jien khik tani tanat di tanut glong  ngan song dom janih  xăng menyek piah dong ngak hu bruk pasang iek lạm phát song tani tanat drak pasa.

Pasak pasang iek ruak kik TP.HCM (HCDC) mboh lac, dalam bruk nduac pakacah pacang cakak njom mbak, kadha praong di abih nan lac samar duah mboh taong abih urang taom gaok jaik F1, F2 piah brei daok karei, brei dut iek, hu jalan piah patui duah. Bruk dom F0 khan brei thau oh ginup, ba tal kurang dom F1 meda ngak brei jabat chức năng oh duah samar hu dom F2, dalam tuk virus, daok njaom mbak samar, dom F2 meda pambak ka urang karei, ngak jeng bruk njaom mbak ka 3 saong daok patui veik yau nan. Piah cakak klaoh dom bruk njaom mbak patui veik, lingiu bruk kham merat di gah pacang caga jit dalam bruk nao duah urang ruak, brei hu bruk kuhria caga di rahra. Tuk kol drei thau lac drei daok dalam kapul mbuan njaom ruak tuk taom gaok F0, F1, njauk khan brei gah y tế palei thau, oh cang tal tuk mboh yau khin ruak meng khan brei thau.

Mon 7 mesup ni, di canah 4 jalan Võ Văn Kiệt - An Dương Vương, di  phường An Lạc, quận Bình Tân, TPHCM gah  chức năng mboh sruh radaih  ô tô hu biển kiểm soát 66A-12219 dok peih tui jalan meng gah tỉnh Long An mai TP.HCM mboh medil nan ye ieu padeih veik piah pasang iek. Sruh radaih kayua urang angan  Nguyễn Ngọc Long, ndih tapui thun 1987, di phường An Lộc, ban  Hồng Ngự, tỉnh Đồng Tháp peih, pajeng Võ Văn Hưng, ndih tapui thun  1982, palei di negar Campuchia, urak ini dok di  xã Thường Phước, ban Hồng Ngự. Gah  chức năng duah mboh dalam  cốp gah likuh radaih hu sa kadung nhựa hu  20 paok dreih yau paok te  , labaih 20kg, medhi lac jru phiel. Gah angaok hu dauk boh kayau. Tapa duah thau, Võ Văn Hưng khan lac pajeng pandap nan  meng  Đồng Tháp tagok TP.HCM.

Harei kabroi (9/6), Trung Quốc bahrau brei adat gac ka 1 janih vắc xin Covid-19 dalam taneh ia, tapa nan bruk ngak tabiak vắc xin di taneh ia ini meda tagok hu jaik 6 tỷ mbang yaok thun. Piah samar ngak hu bruk ba tabiak, Trung Quốc hu brei adat ngak rilo janih vaccine jang piah peih praong labik pabak, saong ba angan rilo rahra tame jang piah klauk vaccine.

Rajaei Mỹ njauk hatai brei buh tabiak 1,2 tỷ đôla Mỹ piah blei  1,7 triệu mbang jru Mô-nu-pi-ra-vi (Molnupiravir) dok hu ngak iek piah taong ruak  COVID-19, meyah bruk ngak iek prong urak ni  mboh lac jru hu siam saong hu jabat khik ramik jru tavoa mỹ brei adat. Jru pacang virus Mô-nu-pi-ra-vi janih menyum meda pacang cakak ruak COVID-19 cakrok patagok, hu pandar piah taong ruak dalam tuk camereip di ruak.

Gah Y tế dom taneh ia châu Mỹ harei kabroi brei thau, meyah bruk njaom mbak di jit COVID-19 daok hu yau urak ini, châu Mỹ meda lahik dom thun piah pasang iek jit praong. Urak ini bruk njaom mbak di rilo labik dalam bhum glaong jang tuk halei karei dalam luac jit praong. Dom biến thể bahrau nbuan njaom mbak jang, ngak ka bruk pasang iek kan kandah jang. Urak ini bahrau hu oh ka tal 10% menuac sia Mỹ Latinh haong Ca-ri-bê hu klauk vắc-xin. Gah y tế dom taneh ia châu My taong yaom glaong bruk daong brei vắc-xin di dom taneh ia yau Mỹ, Ca-na-đa haong Tây Ban Nha, min ndom lac bhum taneh ini cong hu rilo prein khang jang./.

Urang lang: M.P – H.Pha  10/6/2021 15:48:59